Read Zotung Chin MARKA 8 Bible Online

MARKA 8 - Zotung Chin bible

MARKA 8

¹Tuin nin hae kya ccungccaw zapi tuh myarya lung lan oun sueluakuh hae zah ae lanpaw hoi khyh hae, Jesu nynh a zuitu hae kha a kalan ko hae zah,

²“Ccungccaw zapi hynh ngaethya ka umsah hae, pawccecize ka kya nin thum cia um vae hae zah ae lanpaw hoi khyh hae.

³Ae leite mih inn lang ka cciasah hae ze laanryng kya a baw cih hae, pawccecize abang tuh laansawpi te oun thua hae paw nynh thua,” a cipya hae.

⁴A zuitu hae nynh, “E ramkaw kyahin hynhzeih ccungccaw hae hynh sanlou phe a byn lan hae pawtemou dang kho a um cih?” cite a khung hae.

⁵Jesu nynh, “Sanlou hohzeihmou na hoi oh?” cite khia hae zah minmin nynh, “Phe sari,” a ci hae.

⁶Ccungccaw zapi hae kha laekhu kya haung lan kaw a pya hae; te sanlou phe sari kha lah zah lungtuabya a ho koute sanlou kha eih zah ccungccaw hae kha nee khylan a zuitu hae kha a pya hae; te minmin nynh ccungccaw hae kha a nee hae.

⁷Minmin tuh ngasaw taraw mah beihtaraw hoi hae zah hythua a pya koute ccungccaw hae kalan nee lan kaw a pya hae.

⁸Minmin tuh ae hae zah phe a byn hae, te a eihpaw alaepaw kha khuin hae zah kee sari phe abeih.

⁹A aepaw ccungccaw hae tuh thong pali loukaw acih hae; te minmin kha a kisah hae.

¹⁰Te a zuitu hae ryte kohlung lungkhu lang arangte tee hae zah Dalmanutha pee lang a cceih hae.

¹¹Farasi hae nynh oun cceih hae zah Jesu ryte bya a eikuh hae, amaw kha syntawtua khylan vaawlang e muihsahnaw kha a ngia hae.

¹²A thinlung kya a hy puin saw zah, “Pawccepei e ciihan nynh muihsahnaw hynh a ngia? Byaccaccing kae hopya oh, e ciihan hynh pawpaw muihsahnaw sanmah pya thua lan khyh,” a ci.

¹³Te minmin kha cciataw hae zah kohlung lungkhu lang bua tee zah khuraw lang a zua.

¹⁴Zuitu hae nynh sanlou phuku lan phe ning hae zah kohlung kya sanlou phe kheit kyalya nynh a hoi hae.

¹⁵Jesu nynh minmin kha, “Farasi hae ransi te Herod ransi kha raeringkuh oh,” a cipya hae.

¹⁶Minmin nynh, “Sanlou ah hoi khyh oh pawte nynh hynhte a ho,” cite a hoku hae.

¹⁷Jesu nynh tuh-e tuh nyh zah minmin kha, “Sanlou na hoi khyh oh paw kong tuh pawccemou na hoku oh? Na nyhthya loh khyh oh tou? Na thaethya loh khyh oh tou? Nae thinlung tuh phang akhung ung tou?

¹⁸Mit phang na hoi oh pite na muih khyh oh tou? Nakaring phang na hoi oh pite na thae khyh oh tou? Na syntaw vae khyh oh tou?

¹⁹Ccungccaw thong pangaw hanlan sanlou phe pangaw ka ia lya kha a eihpaw kee hohzeihmou phe beih lan na khuin oh?” cite a khia hae. Minmin nynh, “Kee haw lae ning,” a ci hae.

²⁰“Ccungccaw thong pali hanlan sanlou phe sari ka ia lya kha so, a eihpaw kha kee hohzeihmou phe beih lan na khuin oh?” cite a khia hae. Minmin nynh, “Kee sari,” a ci hae.

²¹Jesu nynh, “Na thaethya loh khyh oh tou?” a cipya hae.

²²Minmin tuh Bethsaida khua a thua hae. Abang ccungccaw hae nynh mitmohpaw lu kheit kha Jesu kalan oun cciakhae hae zah a kuih te hae lan a ngia hae.

²³Jesu nynh mitmohpaw kha a kuih te kyng zah khua atolang a cciakhae; a mit kha thoi zah a tungvaw a kuih a khang koute, “Ngaw na muih vae tou?” cite a khia.

²⁴Aning nynh dothung zah, “Ccungccaw hae kha ka muih kho, thuasalama thingku hae a cceih hae paw nynh a lo hae,” a cipya.

²⁵Tukoute a kuih kha mitmohpaw mit vawlan bua a khang. Te aning tuh amaw thathyh lan ngawmuih zah ccungccaw miakaw kha ccaerarih lan a muih vae.

²⁶Jesu nynh, “Khua lungkhu lang la tee nan,” cite hopah zah a inn lang a cciasah.

²⁷Jesu tuh a zuitu hae ryte Sisaria Filipi khua pepan e khua taraw hae kalan cceih hae zah laanpi khe a zuitu hae kha, “Ccungccaw hae nynh kae hynh hum oun ci hae mou?” cite a khia hae.

²⁸Minmin nynh, “Abang nynh baptisma pyatu Johan ae ci hae; abang nynh Elijah ae ci hae; mingccang hae nynh profeh lukhakheit ae ci hae,” cite a khung hae.

²⁹Jesu nynh minmin kha, “Nanning so hum nae ci oh mou?” cite a khia hae. Peter nynh, “Nang tuh Messiah nynh na thua,” a ci.

³⁰Te Jesu nynh amaw kong kha humhung mah a hopya khyh nawlan hae tynkaring lan bya a kin hae.

³¹Jesu nynh a zuitu hae kya ccangpyanaw kha tho zah: Ccungccaw Ccapaw tuh myarya ccihpaw vawsawnaw kha yn teing hahe cih; piccan hae, ranpibawi lepaw hae te kawbya sazae hae nynh oun vua cih hae zah chia yn thua cih; te nin thumnaw kya yn thoothui cih, a cipya hae.

³²Tuh-e bya tuh ccaerarih lan a ho. Tukeiccuze Peter nynh ccanglang cciakhae zah a seisah.

³³Thuasalama Jesu nynh maenuakuh zah a zuitu hae kha do biate Peter kha, “Satan, ka nulang cceih! Pawccecize na tuanaw hynh Pachia kyate yn thuapaw thua khyh, ccungccaw kyate yn thuapaw nynh thua,” cite pe zah a hopya.

³⁴Te a zuitu hae te ccungccaw hae kha ko hae zah, “Humhung zemah kae yn zui ry lan thua ze, amaw te amaw kha vuakuh sah lah a vaelantung kha puihkute yn zui sah.

³⁵Pawccecize humhung zemah a hiinnaw a khumkuh rypaw tuh a hiinnaw kha a shung cih; kae te thehoypaw keiccuze a hiinnaw a shungpaw tuh a hiinnaw kha a khumkuh cih.

³⁶Ccungccaw lu kheit nynh laephi pynpi hynh pong a ccou zeso a hiinnaw a shung lanze pawmou athane?

³⁷A hiinnaw kha pawtemou a muethui kho ung cih?

³⁸Tukeiccuze a ohhuakuhpaw te a seipaw hynh-e ciihan kyahin humhung zemah kamaw te ka bya kha mae yn thyakhaepaw tuh Ccungccaw Ccapaw nynh mah vaaw mithyaa hae ryte a Paaw phu-enaw te yn thua vae ze a maethyakhae ru cih,” a cipya hae.