Read Zotung Chin MARKA 9 Bible Online

MARKA 9 - Zotung Chin bible

MARKA 9

¹Jesu nynh minmin kha, “Byaccaccing kae hopya oh, thungnaw ryte yn thuapaw Pachia peenaw kha a muih hae cia a chih cih lei hae paw ccungccaw abang hein kya a thadyn hae,” a cipya hae.

²Nin taruh koute Jesu nynh Peter, James te Johan kha hoeibua hae zah ahangpaw mua lang mih makhaete a cciakhae hae; mih malang khe Jesu tuh a muinsan yn rulaekuh.

³A boeining tuh myarya raw zah lahlah ak; tuhcih araw lante uccaw a suh khopaw laephi vawlan um lan khyh.

⁴Tuin kya Elijah te Moses tuh minmin kya oun langkuh hae zah Jesu ryte bya a hokuh hae.

⁵Peter nynh Jesu kha, “Sazae, hein kya ah um oh paw hynh myarya ahoy; bu buthum kae sak sah lah, nang na hanlan bu kheit, Moses hanlan bu kheit, te Elijah hanlan bu kheit,” a cipya.

⁶Minmin tuh myarya a ri hae keiccuze Peter nynh paw byaho lan cipaw nykuh khyh zah tuhte a ho.

⁷Te maeking yn zi zah minmin kha pong a khong hae, te maeking kyate, “E paw tuh ka sungsahpaw ka Ccapaw nynh thua, amaw bya kha la ngae oh,” cite roi yn ccae.

⁸Minmin nynh vaekheihmawte mih pepan he a do hae tuh, mimaw kyakhe Jesu laelan hum sanmah muih vae khyh hae.

⁹Mua langte he oun rungbung hae tuh, Ccungccaw Ccapaw nynh chinaw kyate yn thoothui mawlaezung minmin nynh a muih hae paw kha hum kya sanmah a ho khyh nawlan hae kaw a pya hae.

¹⁰Minmin nynh tuh-e a hopaw bya tuh ccykekuh hae zah, chinaw kyate thoothui cipaw tuh pawmou a ho ry cite mimaw te mimaw a khiaku hae.

¹¹Te minmin nynh Jesu kha, “Pawccemou kawbya sazae hae nynh Elijah tuh yn thuaty cih a ci hae?” cite a khia hae.

¹²Jesu nynh, “Pawpaw balyn paccyn ty khylan Elijah tuh yn thuaty ccaccing cih. Thuasalama pawccemou Ccathya nynh, ‘Ccungccaw Ccapaw nynh vawsawnaw a teing cih zah oun vua cih hae,’ a ci?

¹³Thuasalama kae hopya oh, Elijah tuh phe a thua ccaccing vae; Ccathyaa nynh amaw kong a zei thyhte ccungccaw hae nynh mih rythyte a tungvaw phe a cyi vae hae,” cite a hopya hae.

¹⁴Ccangpaw zuitu hae kya a thua hae tuh ccungccaw zapi patae nynh a koihlu hae paw te kawbya sazae hae ryte bya a eiku hae paw kha a muih hae.

¹⁵Ccungccaw hae balyn nynh Jesu kha ccahe a muih hae tuh myarya mih ngaeangthua zah a kalan ccue hae zah bya a beih hae.

¹⁶Jesu nynh kawbya sazae hae kha, “Minmin ryte pawmou na eiku oh?” cite a khia hae.

¹⁷Ccungccaw zapi laku e lu kheitpaw nynh, “Sazae, muisaw bahkuh zah bya a ho kho leipaw ka ccapaw kha na kalan kae cciakhae.

¹⁸Muisaw hoyleipaw nynh he a thuanua vae ze laephi kya vuakuh zah a khalang kyate a taraphue a pou, a hawzy zah karae aho; tuh-e muisaw a dee ccaw hae cite na zuitu hae ka hopah hae zah dee kho khyh hae,” cite a hopya.

¹⁹Jesu nynh minmin kyakhe, “Pou zynnaw a hoi leipaw ciihan, hohseciamou nae kya ka um ung cih? Hohseciamou kae ngaesangpah ung cih oh? Imuapaw kha ka kalan oun cciakhae oh,” a ci.

²⁰Minmin nynh imuapaw kha a kalan a cciakhae hae. Tuh-e paw nynh Jesu kha he a muih tuh vaekheihmawte muisaw nynh dungsah zah laephi kya khuliakuh zah a toukuh; a khalang kyate a taraphue athua.

²¹Jesu nynh imuapaw a paaw kha, “Hynhte a cyinaw asaw vae tou?” cite a khia. A paaw nynh, “A imua lya mawte a cyih vae.

²²Imuapaw hynh ro khylan maee lungkhu lang te tui lungkhu lang palei a phungsaku. Na cyi kho zetuh thaw oun ccih lah oun bawm,” a cipya.

²³Jesu nynh, “Na zyn kho tou! Zynnaw a hoipaw elang tuh pawpaw tynre acyihkuh kho,” a cipya.

²⁴Imuapaw a paaw nynh vaekheihmawte sia zah, “Bawipaw, ka zyn, ka zyn leinaw hynh beih yn bawm!” a cipya.

²⁵Ccungccaw hae nynh pynkheihlan oun ccue hae paw kha Jesu nynh he a muih tuh, muisaw hoyleipaw kha pe zah, “A nawpansahpaw te bya a hosah leipaw muisaw, imuapaw kyate pou lah bua na tee vae khyh nawlan kaw kae pya!” a cipya.

²⁶Muisaw tuh raerae sia zah imuapaw kha dungsah sya zah a poutaw vae; imuapaw tuh achihpaw hawte thua zah ccungccaw patae nynh, “A chih vae,” a ci hae.

²⁷Thuasalama Jesu nynh imuapaw kha a kuih te kyng zah he a tho tuh po a tho vae.

²⁸Inn lungkhu lang he a tee tuh a zuitu hae nynh, “Pawccemou kaening nynh muisaw kha kae dee kho khyh,” cite mih makhae kyakhe a khia hae.

²⁹Jesu nynh, “Hynhcihawpaw tuh sawsangnaw te, looh-ae sungnaw te rou nynh dee kho athua,” a cipya hae.

³⁰Minmin tuh tuin kyate pou hae zah Galilee ram kya po a cceih hae. Tuh-e tuh Jesu nynh humhung mah nysah ry khyh.

³¹Pawccecize a zuitu hae kha ccangpah hae zah, “Ccungccaw Ccapaw tuh ccungccaw hae kuih kya oun ap cih hae zah oun theih cih hae; a theih kou hae te nin thumnaw kya yn thoothui cih,” cite a hopya hae.

³²Tuh-e a hopaw kha minmin nynh a thaethya khyh hae zemah amaw kha khia lan a rih hae.

³³Jesu tuh Kapernaum khua thua zah inn lungkhu a um lyakhe a zuitu hae kha, “Laanpi kya paw konglang mou na eiku oh?” cite a khia hae.

³⁴Thuasalama minmin tuh yccae khyh hae; pawccecize minmin nynh laanpi kyakhe hummou a lehua cipaw kha mimaw te mimaw a eiku hae.

³⁵Jesu tuh haung zah lu haw lae ning kha ko hae zah, “Humhung zemah masatypaw lang a tang rypaw tuh ccungccaw balyn kyaze nyathyakoupaw lang a tang cih zah ccungccaw hae ryalawpahtu lang a tang cih,” a cipya hae.

³⁶Imua lu kheit kha lah zah mih laku khe a nung; te a kuih kya dua zah,

³⁷“Humhung zemah e tahawpaw imua lu kheit kha ka min te leh a khanpaw tuh kae kha leh yn khanpaw nynh thua; humhung zemah kae kha leh yn khanpaw tuh kae kyalya kha leh yn khanpaw thua leite kae yn sawtupaw kha mah leh a khanpaw nynh thua,” cite a hopya hae.

³⁸Johan nynh Jesu kha, “Sazae, na min te raerangsaro a deepaw lu kheit kha kae muih zah kae khee; pawccecize aning tuh aening phu kya-e thua khyh,” a cipya.

³⁹Jesu nynh, “Tuh-e paw tuh khee nan oh; pawccecize ka min te ngaeangnaw a rae koute ka thethya palou yn ho khopaw humhung mah um lan khyh.

⁴⁰Pawccecize aening oun rawse leipaw tuh oun pankhaepaw nynh thua.

⁴¹Byaccaccing kae hopya oh: Khri ccungccaw na thua oh keiccuze ka min liate nia lanpaw tui banang nang kheit ae pya oh paw tuh a ryalaw mee shung lan khyh.

⁴²“Humhung zemah kae yn zynpaw e imua taraw lukhakheit kha seinaw a raesahpaw tuh a nging kya mianawpaw lung kha sae lan zah rili lungkhu lang phung lanze amaw hanlan ahoyhua.

⁴³Na kuih nynh seinaw ae raesah ze, thoh tya. Kuih voi ning hoite a chih kho leipaw hell maee lungkhu lang ccia laeze kuihccung te hiinnaw kalan tee tuh na hanlan ahoyhua.

⁴⁴Tuin kya tuh zanpaw chih khyh zah maee mah chih khyh.

⁴⁵Na ccu nynh ae seisah ze, tuh-e tuh thoh tya; ccu voi ning hoite a chih kho leipaw hell maee lungkhu lang vuaku lanpaw lae tuh ccukhou te hiinnaw lungkhu lang tee lanpaw kha na hanlan ahoyhua.

⁴⁶Tuin kya tuh zanpaw chih khyh zah maee mah chih khyh.

⁴⁷Na mit nynh seinaw ae raesah ze, poh khoi; mit voi ning hoite hell maee lungkhu lang vuaku laeze mit voi kheit te Pachia peenaw lungkhu lang tee tuh na hanlan ahoyhua.

⁴⁸Tuin kya tuh zanpaw chih khyh zah maee mah chih khyh.

⁴⁹“Pawccecize silawnawpaw miakaw kha loi phing athua hawte ccungccaw miakaw kha maeeloi phing athua cih.

⁵⁰Loi tuh ahoy, thuasalama loi nynh a enaw kha azo vae ze, pawtemou na esah kho ung cih? Naemaw kyakhe loi kha hoi oh, lu kheit te lu kheit daenaw te la um oh,” a cipya hae.