Read Zotung Chin LUKA 1 Bible Online

LUKA 1 - Zotung Chin bible

LUKA 1

¹Ccungccaw patae nynh aening kya acyihkuhpaw konglang kha ccaw te zei lan a zuaku hae.

²Tuhawte atakaw lyaze mit te a muih hae paw ccaekia hae te thehoypaw a phytu hae nynh a ho hae thyhte a zei hae.

³Tukeiccuze sawtua lan kou umpaw Theofilas, kae mah atakaw te pawpaw balyn kha akaw-aleih ka thaethya koute, po akyngkuh lante na kalan zei lanze ahoy cih cite ka tua,

⁴tuhteze nynh ae ccangpya vae hae paw uccaw hae konglang ahmepaw kha na nyh cih.

⁵Judea ram kya Herod Siapharan ccyh lyakhe Abijah ranpibawi aphu kya a um buapaw Zekhariah a ci hae paw ranpibawi lu kheit a um; a zu tuh Aaron ciihan thua zah a min tuh Elizabeth acikuh.

⁶Minmin lu ning tuh Bawipaw kawbya hae te phung hae balyn kha ccaenaw um lei lan a zui hae paw thua zah Pachia malang parouh mawte a ding hae paw nynh thua.

⁷Elizabeth tuh a tiin keiccuze ccaawsaah khyh hae, parouh mawte myarya taw vae hae.

⁸Vaekheih tuh Zekhariah nynh amaw a phu hae ryte atue nynh a phya thyhte Pachia malang ranpibawi rya a law lyakhe,

⁹ranpibawi ryalaw phung thyhte, ccungthydung hae zah aning tuh Bawipaw beikinnthyaa lungkhu lang tee lan zah mynkhuhpaw u lan accan.

¹⁰Mynkhuhpaw a u lyakhe ccungccaw hae balyn tuh atolang khe saw a sang hae.

¹¹Bawipaw vaawpaw tuh a kya yn langkuh zah mynkhuhpaw unawpaw silawhang ranglang khe a thadyn.

¹²Zekhariah nynh he a muih tuh siikuh zah a rih.

¹³Thuasalama vaawpaw nynh, “Zekhariah, rih nan, pawccecize na sawsangnaw tuh thaepya athua, na zu Elizabeth nynh ccapaw ae saahpah cih zah a min tuh Johan cite na phu cih.

¹⁴Na lungtua cih zah na lungpaw cih; tuh-e ccapaw a pui keiccuze ccungccaw patae mah mih lungtua cih.

¹⁵Pawccecize aning tuh Bawipaw muihnaw kya a lesae cih. Misutui te ruithyapaw kha kharouh neih lan khyh; aning tuh a pui mawze Thyaa Muisaw te abeih cih.

¹⁶Israel ccungccaw patae kha Bawipaw mih Pachia kalan a kikhae cih hae.

¹⁷Bawipaw malang zeccuetu athua cih zah profeh Elijah hawte a thungpaw te huhan hoipaw athua cih. Paaw hae te ccaaw hae kha oun ccawsakuh thui cih hae zah kawngae lei hae paw kha miding hae hawnaw kalan oun kikhae cih hae. Bawipaw hanlan ccungccaw hae kha a paccyn ty cih,” a cipya.

¹⁸Zekhariah nynh vaawpaw kha, “Tuhte yn cyiku lanpaw tuh pawtemou ka nyh cih? Pawccecize kae tuh a taw vae paw ka thua zah, ka zu mah a kum phe tang vae,” a cipya.

¹⁹Vaawpaw nynh, “Kae tuh Gabriel nynh ka thua. Pachia malang a thadynpaw ka thua zah, aning nynh hynh-e thehoypaw hynh na kalan hopya lan te phypya lan yn saw.

²⁰Nang nynh accyh yn zaw te accing cih paw ka bya hynh na zyn khyh keiccuze hynh-e uccaw hae accing makhia byaho kho leite na um cih zah bya na ho lan khyh,” a cipya.

²¹Ccungccaw hae nynh Zekhariah kha phang ngaw hae zah beikinnthyaa lungkhu khaw aro keiccu mih ngaeangthua.

²²Aning nynh he yn pou tuh byaho kho vae khyh zah, beikinn lungkhu kya vizin nynh a muih cih cite a tua hae; aning nynh a kuih te a tangpya hae, bya tuh ho kho vae khyh.

²³Zekhariah tuh a ryalaw ccyh athang te a inn lang a ki.

²⁴Aro mawze a zu Elizabeth tuh ccaawpoi zah sawpaw sah pangaw lungkhu inn kya a khungkuh.

²⁵Elizabeth nynh, “Ccungccaw hae laku kya ka teingpaw maethyanaw kha lawpya khylan Bawipaw nynh yn bawm zah, e hynh yn cyipya,” a ci.

²⁶Sawpaw sah taruhnaw lyakhe Pachia nynh vaawpaw Gabriel kha Galilee ram, Nazareth a ci hae paw khua kya umpaw liaccady[1] kalan a saw,

²⁷tuh-e liaccady tuh David ciihan athuapaw a min Josef a ci hae paw ccungccapaw elang a dypya vae hae paw thua zah a min tuh Mary acikuh.

²⁸Vaawpaw nynh tuh-e nung kalan yn thua zah, “Maehoynaw a ccounung, na tungvaw hythuanaw um sah! Bawipaw tuh na kya a um,” a cipya.

²⁹Mary nynh tuh-e bya a thae te, a lungriathae zah, e byabeihnaw hynh pawcihawpaw mou athua cite a tua.

³⁰Vaawpaw nynh, “Mary, rih nan, pawccecize Pachia nynh nang kha maehoynaw ae pya.

³¹Ccaaw na poi cih zah Ccapaw na saah cih, a min tuh Jesu cite na phu cih.

³²Aning tuh a lesaepaw athua cih zah Ahang Huaccepaw Pachia Ccapaw cite ko athua cih, Bawipaw Pachia nynh amaw tuh a minpaaw David kya-e bawitungkhung kha a pya cih.

³³Aning nynh Jakob ciihan kha zungzae a uk cih zah a peenaw tuh thang boi lan khyh,” a cipya.

³⁴Mary nynh vaawpaw kha, “Kae tuh liaccady nynh ka thua, pawtemou tuh-e tuh athua kho cih?” a cipya.

³⁵Vaawpaw nynh, “Thyaa Muisaw tuh na tungvaw yn thua cih zah Ahang Huaccepaw thungnaw tuh na tungvaw yn um cih; Tukeiccuze na saah lanpaw Ccapaw tuh athyaapaw athua cih zah Pachia Ccapaw cite ko athua cih.

³⁶Dotua, na pui oh paw Elizabeth, a tiinnung a ci hae paw mah a taw vae mawte ccaawpoi zah atu hynh sawpaw sah taruh acih vae.

³⁷Pawccecize Pachia nynh a cyi kho leipaw pawpaw mah um khyh,” a cipya.

³⁸Mary nynh, “Kae tuh Bawipaw seenung nynh ka thua, na bya hawte ka tungvaw thua vae sah,” a ci. Te vaawpaw tuh Mary kyate phe a cceih.

³⁹Tuin nin hae kyakhe Mary tuh thokuh zah Judea muaram kya a umpaw khua langkhe arangte a cceih,

⁴⁰Zekhariah inn lang tee zah Elizabeth kha a beih.

⁴¹Mary nynh bya a beihpaw kha Elizabeth nynh he a thae tuh, a vue lungkhu e imua tuh a thohkuh. Elizabeth tuh Thyaa Muisaw te phe beih zah,

⁴²aning nynh roi accae lante a hopaw tuh: “Nopi hae lakuze nang tuh hythua a ccounung nynh na thua, na vue kya-e imua mah hythua a ccoupaw nynh thua.

⁴³Ka Bawipaw a nung nynh ka kalan paebua lan ciate pawccemou hynh-e maehoynaw hynh kae nynh ka mue?

⁴⁴Pawccecize bya nae beihpaw roi ccahe ka thae te, ka vue lungkhu e imua tuh a lungtua zah a thohkuh.

⁴⁵Bawipaw nynh a hopyapaw bya kha accing cih cite a zynpaw nopinung tuh hythua a ccounung nynh thua,” a ci.

⁴⁶Mary nynh, “Ka thinlung nynh Bawipaw kha the a hoysah,

⁴⁷ka hiinnaw tuh yn Khumtu Pachia kya a lungtua.

⁴⁸Pawccecize a seenung a nyaanaw kha ningpah khyh. Atu te she takyh kya hythua ccounung cite yn ko vae cih hae.

⁴⁹Pawccecize Athungpaw Pachia nynh myarya lepaw uccaw hae kha ka hanlan yn cyipya vae; a min tuh athyaa.

⁵⁰A thawccinaw tuh amaw raw a rih hae paw tungvaw kya she takyh atyn.

⁵¹A thungnaw khate a thawzung kha a langsah; mih thinlung kya a lysakuh hae paw kha pong a phiasaku hae.

⁵²Athungpaw ccungccaw hae kha mih bawitungkhung kyate sahbung hae zah, a nyaa hae paw kha a hangthung hae.

⁵³Mih vuelaw hae paw kha uccaw hoypaw te a kua hae, mihoi hae kha mih kuih ccakaete a cciasah hae.

⁵⁴Ah minpaawhae kya, Abraham kya te a ciihan hae kya a hosya vae hawte, a ngaethya-umsahnaw kha liathui zah a seepaw Israel kha phe a bawm vae,” a ci.

⁵⁵

⁵⁶Mary tuh Elizabeth ryte sawpaw sah thum loukaw a umkheih kou hae te, a inn lang a ki.

⁵⁷Elizabeth tuh aninsaw yn kyh zah ccapaw yn saah.

⁵⁸Bawipaw nynh Elizabeth tungvaw kya myarya lepaw a thawccinaw a langsahpyaku cipaw kha a innpaw hae te a vaeccaw hae nynh he a thae hae tuh, amaw ryte mih lung atua.

⁵⁹Nin taryanaw nin kya imua tuh vingdungaw lan a cciakhae hae, a paaw min kha kisah te Zekhariah cite a minphu lan a ci hae.

⁶⁰Thuasalama a nung nynh, “Thua khyh, Johan cite a minphu lan,” a ci.

⁶¹Minmin nynh, “Na pui oh paw kya tuh-e min a phukuhpaw lu kheit san um boi khyh,” a ci hae.

⁶²Tuinte minmin nynh a paaw kha pawtemou min na phu ry cite tangpyate a khia hae.

⁶³A paaw nynh zei nawlan ccalung kha ngiakuh hae zah, “A min tuh Johan nynh thua,” cite a zei. Mih balynte mih ngaeang pong thua.

⁶⁴Zekhariah tuh vaekheihmawte a munglae yn hoythui zah bya yn hothya, te Pachia kha the a hoysah.

⁶⁵Mih innpaw hae balyn tuh a rih hae, tuh-e thongpang tuh Judea muaram balyn kya azeihkuh.

⁶⁶A thae hae paw balyn nynh tuh-e tuh mih thinlung kya ccykekuh hae zah, “E imua hynh pawlang vema yn tang?” a ci hae. Pawccecize Bawipaw kuih nynh imuapaw kha a umkhae.

⁶⁷A paaw Zekhariah tuh Thyaa Muisaw te phe beih zah profehbya a ho:

⁶⁸“Israel Pachia Bawipaw tuh thehoysah oh sih, pawccecize a ccungccaw hae kha bawm hae zah a shawkhaw hae.

⁶⁹A seepaw David ciihan kyate aening hanlan athungpaw khumtu kha a langsaku vae.

⁷⁰Langmawlya mawte athyaapaw a profeh hae munglae kyate a ho hawte,

⁷¹ah rhaw hae te oun huatu hae kuih kyate khum ah thua cih oh.

⁷²Ah minpaaw hae kya bya a kinkupaw a thawccinaw kha langsah zah athyaapaw a byakinnaw kha a liathui vae,

⁷³Ah minpaaw Abraham kyaze, ‘Nae rhaw hae kyate kae luesah cih oh; rinaw hoi leite ka rya na lah cih oh,

⁷⁴

⁷⁵nae hiin lungkhu balyn ka malang khe adingpaw te athyaapaw lang na tang cih oh,’ cite thyalawkute bya a kinku.

⁷⁶Imuapaw, nang tuh Ahang Huaccepaw Pachia profeh cite ko na thua cih, pawccecize nang tuh Bawipaw laanpi kha paccynpya khylan amaw malang na cceih ty cih,

⁷⁷a ccungccaw hae kha, mih seinaw ngaethyanaw liate khumnaw kong nynaw pya khylan hae na cceih ty cih.

⁷⁸Ah Pachia kya-e nevyalyapaw ngaethyaumsahnaw liate vaawlang e khuaninpaw nynh aening tungvaw yn thua cih,

⁷⁹mohnaw te chinaw mynlyh kya a haung hae paw kha awnaw pya khylan, daenaw laanpi langkhe aening ccu kha cciakhae khylan nynh thua,” cite a ho.

⁸⁰Imuapaw tuh lethung zah muisaw kya a thawsae, te Israel hae kalan a langku maw tuh ramkaw kya nynh a um.