Read Zotung Chin LUKA 10 Bible Online

LUKA 10 - Zotung Chin bible

LUKA 10

¹Tukoute Bawipaw nynh ccangpaw sung sari kha mah khang hae zah amaw a cceih cihnaw khua te hmin takyh langkhe lu ning ccite a saw lalo hae.

²Minmin kha, “Loohrue lanpaw tuh myarya alung, thuasalama ryalahtu hae tuh azya. Tukeiccuze loohrue lanpaw a hoitu Bawipaw nynh a loohruenaw kalan ryalahtu hae a saw nawlan sawsang oh,” a cipya hae.

³Nanning la cceih oh; suizaw hae laku lang tuutaw hae saw hawte kae saw oh.

⁴Phuabu thuasah, sohrae thuasah, phanah thuasah phukuh nan oh; laanryng kya humhung mah bya la beih nan oh.

⁵Pawpaw inn kya na tee oh zemah, ‘E inn kya daenaw um sah!’ cite masaty la ho oh.

⁶Tuin kya daenaw a rypaw a um ze, na ho oh paw daenaw tuh a tungvaw a um cih, a um khyh ze nae kalan bua yn ki cih.

⁷Tuh-e inn kyakhe um oh lah ae pya oh paw kha la ae oh lah la neih oh, pawccecize ryalahtu nynh a ninro tuh a mue lanpaw nynh thua. Inn kheit kyate inn kheit kalan la nuekuh nan oh.

⁸Khua khuakheit kya na tee oh zah ae thuasah oh ze, nae malang ae nyapya oh paw kha la ae oh,

⁹tuin khua e ngeccih hae kha la dansah oh lah, ‘Pachia peenaw tuh nae kalan yn naekuh vae,’ cite la hopah oh.

¹⁰Thuasalama khua khuakheit kya na tee oh zah ae thuasah khyh oh ze, khualae e laanpi hae kalan po la cceih oh lah,

¹¹‘Kae ccu kya abekuhpaw nae khua e vuiping hynh nanning rawsete kae khuanua oh, tuhzemah Pachia peenaw tuh nae kalan yn naekuh vae cipaw hynh la nyh oh,’ cite minmin kha la hopah oh.

¹²Kae hopya oh, byapia nin vae tuh tuh-e khua hanlan laeze Sodom khua hanlan ngaesang kho a umhua cih.

¹³Khorazin khua, nang na hanlan ngaethya lan kou um! Bethsaida khua, nang na hanlan ngaethya lan kou um! Pawccecize nanning kya ka raepaw ngaeangnaw hae hynh Tair khua te Sidon khua kya ka la rae ze, minmin tuh buri boeining lawkute buhhaw kya haungte khawlya mawte a ngaesikuh vae cih hae.

¹⁴Byapianaw kya nanning hanlan laeze Tair khua te Sidon khua hanlan ngaesang kho a umhua cih.

¹⁵Kapernaum khua, nang tuh vaawlang cia hangthungku na ry ii? Hell lungkhu lang sawbung na thua cih.

¹⁶“Nae bya a ngaepaw tuh ka bya a ngaepaw nynh thua; nanning ae vua oh paw tuh kae kha yn vuapaw nynh thua, kae yn vuapaw tuh kae yn sawtupaw kha a vuapaw nynh thua,” cite a hopya hae.

¹⁷Sung sari hae tuh lungtuate bua oun ki hae zah, “Bawipaw, na min te raerangsaro hae nynh heize kae kaw a ngae hae!” cite a hopya hae.

¹⁸Jesu nynh, “Khozawlaekuhpaw hawte Satan tuh vaawlang te a ccawbungpaw kha ka muih.

¹⁹Dotua oh, nanning tuh hupaw hae te zekang hae syde kho nawlan te nae rhaw hae balyn kha tae kho nawlan kawhoinaw kae pya vae oh; pawpaw nynh mah nanning kha vaemaw ae muesah lan khyh oh.

²⁰Tuhzemah muisaw hoylei hae paw nynh nae kaw ae ngae oh pawte nae lungtua nan sah; nae min tuh vaawlang kya zei athua keiccuze nae lungtuahua sah,” a cipya hae.

²¹Tuh ccyh lyakhe Jesu tuh Thyaa Muisaw kya a lungtua zah, “Vaaw te laephi Bawipaw, pou Apang, nang nynh ahawpaw te athyapaw ccungccaw kyate e uccaw hae hynh na thuruh zah imua hae kya na phy vae keiccuze na kalan lungtuabya kae ho; Athua, Apang, hynhte acyikupaw hynh ahoypaw na rynaw nynh thua.

²²Pawpaw balyn tuh Apang nynh kae kalan marya yn pya vae; Paaw laelan hum ccungccaw nynh sanmah Ccapaw hynh nyh khyh; Paaw hynh hum nynh thua cipaw kha Ccapaw te Ccapaw nynh a phypyapaw ccungccaw laelan hum nynh sanmah nyh khyh,” a ci.

²³Jesu nynh a zuitu hae kalan maekuh zah, “Na muih oh paw uccaw hae kha a muihpaw mit hae tuh lungtua hae paw nynh thua.

²⁴Pawccecize kae hopya oh, profeh hae patae te siapharan hae patae nynh na muih oh paw hynh a muih ry hae zemah muih khyh hae, na thae oh paw hynh a thae ry hae zemah thae khyh hae,” cite mih makhaete a hopya hae.

²⁵Kawbya thyapaw lu kheit nynh thadyn zah, “Sazae, zungzae hiinnaw rho ccou khylan pawmou ka cyi cih?” cite Jesu kha a syntawtua.

²⁶Jesu nynh, “Kawbya kya pawmou azeikuh? Pawtemou na ria?” a cipya.

²⁷Tuh-e paw nynh, “ ‘Bawipaw na Pachia kha na thinlung balyn te, na hiinnaw balyn te, na thawzung balyn te, na tuanaw balyn te na sungsah cih; te na innpaw kha namaw toulou hawte na sungsah cih,’ acikuh,” a cipya.

²⁸Jesu nynh, “Na hopaw tuh athua, tuhte la cyih lah na hiin cih,” a cipya.

²⁹Thuasalama, aning nynh amaw te amaw kha thyaaccousaku ry zah Jesu kha, “Ka innpaw tuh hummou?” cite a khia.

³⁰Jesu nynh, “Ccungccapaw lu kheit tuh Jerusalem kyate Jeriko khua lang cceihbung zah damiah hae kuih kya phe a phungkuh; damiah hae nynh a boeining kha phae hae zah vya chih lan a bua kou hae te a cciataw hae.

³¹Tuh-e laanpi kyakhe ranpibawi lu kheit cceihbung zah tuh-e paw tuh he a muih tuh ccanglang te phe a sibia.

³²Tuhawte Levi phinpaw lu kheit nynh tuin kya he a thua te, tuh-e paw tuh muih zah ccanglang te sibia zah phe a cciataw.

³³Thuasalama Samariapaw lu kheit tuh khuaccong zah tuh-e paw umnaw kya a thua te he a muih tuh ngaethya a umsah.

³⁴Te ccianua zah a vaemaw kha chitui te misutui thuhpah zah a heepya, te amaw a sahiin tungvaw khe ccisakuh zah mikhia-inn langkhe cciakhae zah a do-oih.

³⁵Awkhualan tuh denari kia ning kha thuaakuh zah mikhia-inn ngawtupaw kha pya zah, ‘E paw hynh la do-oih lah tuhlae na thangpaw kha bua kae thua te kae pyaru cih,’ a cipya.

³⁶Tuh-e lu thum hae lakuze damiah hae kuih kya a phungkuhpaw tuh-e ccungccapaw a innpaw tuh hummou athua cih cite na tua?” a cipya.

³⁷Kawbya thyapaw nynh, “Tuh-e paw tungvaw ngaethyaumsahnaw a hoipaw nynh athua,” a ci. Jesu nynh, “La cceih lah nang mah tuh-e hawte la cyihbua,” a cipya.

³⁸Tuhcite Jesu te a zuitu hae tuh khua a ccong lya hae khe, Jesu tuh khua khuakheit kya tee zah Martha a ci hae paw nopinung lu kheit nynh Jesu kha a inn lang a thuasah.

³⁹Martha nynh Mary a ci hae paw a neitawnung lu kheit a hoi. Mary tuh Bawipaw cculeihpaw khe haung zah a bya kha a ngae.

⁴⁰Martha tuh thohae ryasuh pawte a thinlung sokhaekuh zah Jesu kalan cceih zah, “Bawipaw, ka neitawnung nynh ka makhaete thohae rya miakaw pong yn ngaeccepaw hynh pawlang na ria khyh tou? Kae hynh yn bawm nawlan hopah,” a cipya.

⁴¹Bawipaw nynh, “Martha, Martha, nang tuh uccaw patae konglang na lungvawsaw zah na thinphang.

⁴²Thuasalama ahoboupaw uccaw ccangkheit rou nynh a um; Mary nynh tuh-e ahoypaw uccaw tuh phe a poku vae, tuh-e tuh amaw kyate lawpya thua vae lan khyh,” a ci.