Read Zotung Chin LUKA 11 Bible Online

LUKA 11 - Zotung Chin bible

LUKA 11

¹Jesu tuh hmin san kheit kya sawsang zah he a thangsah te, a zuitu hae lakuze lu kheit nynh, “Bawipaw, Johan nynh a zuitu hae a ccangpya hae hawte, kaening hynh sawsangnaw oun ccangpah bua,” a cipya.

²Jesu nynh minmin kha, “Saw na sang vae oh ze: ‘Apang, na min sawtuanaw um sah. Na peenaw thua ccavae sah.

³Nin takyh kae aepaw looh kha nin takyhte oun pya.

⁴Kae tungvaw a sei hae paw miakaw kha kae ngaethya hae keiccu kae seinaw kha oun la ngaethyabua. Tuhounaw lungkhu lang oun cciakhae nan,’[3] cite la ho oh,” a cipya hae.

⁵Jesu nynh minmin kha, “Nanning lakuze lukhakheit nynh ruiban hoi zah ziraccyng khe a banpaw kalan cceih zah, ‘Ka ban, sanlou phe thum kae la koiibua hin.

⁶Pawccecize ka banpaw lu kheit tuh khua a ccongnaw kyate yn thua zah looh dang lanpaw ka hoi khyh,’ a cipya.

⁷Innthung te a banpaw nynh, ‘Mithyhmitpaw yn nung nan vae; thuakaw ka tou vae zah ka ccaaw hae ryte phe kae ih vae, ka tho ry vae khyh zah kae pya kho vae khyh,’ cite a khung cih.

⁸Nanning kae hopya oh, tuh-e paw nynh tho leite um zah a pya khyh zemah, a banpaw athua keiccu lungthang leite a ngiaku keiccu tuh a tho cih zah ahobou zeihte a pya cih.

⁹“Tukeiccuze kae hopya oh, ngia oh lah ae pya cih oh; ccung oh lah na muih cih oh; khua oh lah thuakaw kha hungpya na thua cih oh.

¹⁰Pawccecize a ngiapaw miakaw tuh a mue, a ccungpaw tuh a muih, thuakaw a khuapaw tuh hungpya athua cih.

¹¹Nanning lakuze nae ccaaw nynh ngasaw ae ngiaku oh ze ngasaw hanpaw huparepaw a pyapaw a um cih tou?

¹²Tuhkhyhze awtui kha a ngiaku ze zekang kha a pya cih tou?

¹³Ccungccaw hoy leipaw mang na thua oh pite nae ccaaw hae kha lasung hoypaw pya lan na ny oh ze, vaawlang umpaw nae Paaw nynh amaw kalan a ngiakuh hae paw kha Thyaa Muisaw tuh houh a pya cih hae!” cite a hopya hae.

¹⁴Bya a hosah kho leipaw raerangsaro kha Jesu nynh a dee. Raerangsaro he a pou te byaho kho leipaw tuh bya a ho vae, te ccungccaw zapi tuh mih ngaeangthua.

¹⁵Thuasalama ccungccaw abang nynh, “Aning nynh raerangsaro hae uktupaw Beelzebul liate nynh raerangsaro hae kha a dee,” a ci hae.

¹⁶Abang nynh Jesu kha syntawtua khylan vaawlang e muihsahnaw kha a ngia hae.

¹⁷Thuasalama Jesu nynh mih tuanaw kha phe nyh zah minmin kha, “Amaw te amaw aphiakuhpaw peenaw miakaw tuh aroh cih, te amaw te amaw aphiakuhpaw innbyn tuh a khuliakuh cih.

¹⁸Satan mah amaw te amaw a phiaku ze pawtemou a peenaw tuh atyn kho cih? Pawccecize nanning nynh kae kha Beelzebul liate nynh raerangsaro hae a dee nae ci oh.

¹⁹Kae nynh Beelzebul liate raerangsaro hae kha ka dee lanze, hum liate mou nae ccungccaw hae nynh minmin kha a dee hae? Tukeiccuze minmin tuh nanning bya ae piatu oh athua cih hae.

²⁰Thuasalama kae nynh Pachia kuihdung liate raerangsaro hae kha ka dee lanze, Pachia peenaw tuh nae kya a thua ccaccing vae.

²¹A thawsaepaw ccungccaw nynh zunghe phe ccing lante a inn kha a ngaw lya tuh a uccaw hae akhyn.

²²Thuasalama amaw laeze a thawsae huapaw nynh amaw kha a dou zetuh a tae cih, te a doliakupaw a zunghe balyn kha a lawpah cih zah a luapaw uccaw hae kha pong a nee cih.

²³Kae yn pankhae leipaw tuh kae yn rawsepaw nynh thua, te ka kya a sueluakuh bua leipaw ccungccaw tuh a phiakuhpaw nynh thua.

²⁴“Athyaa leipaw muisaw nynh ccungccapaw kyate he a pou te, umnaw hmin zahku lan ramrou kalan a khiakuh, thuasalama muihkuh khyh. Tetuh aning nynh, ‘Ka poutawnaw ka inn lang ka ki cih,’ a ci.

²⁵He a kithui tuh tuh-e inn tuh phe la phikuh zah ccynmamyh lan a ccawnghanpaw kha a muih.

²⁶Tetuh aning nynh cceih zah amaw laeze houh athahhua hae paw ccangpaw muisaw lu sari kha a hoeibua hae, te minmin nynh tee hae zah tuh-e paw kya a um hae; te tuh-e ccungccapaw tuh nyalang e a cyisahnaw tuh langmaw a cyisahnaw laeze houh athahhua vae,” cite a hopya hae.

²⁷Jesu nynh tuh-e bya a ho cciamang lyakhe ccungccaw zapi laku te nopinung lu kheit nynh sia zah Jesu kha, “Nang ae poipaw vue te nang ae kuapaw matei tuh lungtuapaw nynh thua!” a cipya.

²⁸Thuasalama Jesu nynh, “Pachia bya kha thae zah a zui hae paw hynh nynh lungtuapaw athuahua hae!” a ci.

²⁹Ccungccaw hae houhouh oun lungthung hae te, Jesu nynh, “E ccungccaw hae tuh ahoy leipaw ciihan nynh thua hae; minmin nynh muihsahnaw kha a ngia hae; thuasalama Jonah kya-e muihsahnaw laelan ccangpaw muihsahnaw kha pya thua vae lan khyh hae.

³⁰Pawccecize Jonah tuh Nineveh hae hanlan muihsahnaw athua hawte, Ccungccaw Ccapaw mah e ccungccaw hae hanlan muihsahnaw athua cih.

³¹Byapianaw kya Alia lang e siapharannung tuh e she kya-e ccungccaw hae ryte yn thadyn cih zah minmin kha yn seisah cih hae, pawccecize aning tuh laephi athangnaw langte Solomon hawnaw bya kha ngae khylan yn thua; te dotua, Solomon laeze alesae huapaw tuh hein kya mang um!

³²Nineveh khuaccaaw hae tuh e she kya-e ccungccaw hae ryte byapianaw kya oun thadyn cih hae zah, e she kya-e ccungccaw hae kha oun seisah cih hae, pawccecize minmin tuh Jonah phunghonaw kya a ngaesikuh hae, te dotua, Jonah laeze alesae huapaw tuh hein kya mang um!

³³“Humhung nynh mah maeekhua kha aw zah kee te khong boi khyh, oun tee hae paw nynh awnaw kha a muih ccaw hae cite maee awnawpaw vawlan nynh a nung.

³⁴Pyn kya-e awnaw tuh mit nynh thua, tukeiccuze na mit ahoy ze na pyn balyn mah awnaw te abeih cih, thuasalama na mit ahoy khyh ze, na pyn balyn mah mohnaw te abeih cih.

³⁵Tukeiccuze na kya umpaw awnaw tuh mohnaw athua khyh nawlan la raeringkuh.

³⁶Na pyn balyn tuh mohnaw um leite awnaw te phe abia lanze, maeekhua a awpaw nynh awnaw ae pya hawte, na pyn balyn tuh awnaw te phe abeih cih,” a ci.

³⁷Tuhcite bya a ho lyakhe, Farasipaw lu kheit nynh Jesu kha aepaw a kopya; Jesu tuh cceih zah ae lan a haung.

³⁸Zerya a ae mawze a kuih a singku ty khyhpaw kha Farasipaw nynh he a muih tuh a ngaeangthua.

³⁹Bawipaw nynh, “Nanning Farasi hae tuh banang te pake kha avawlan kyalya nynh na sing oh, thuasalama nae lungkhu tuh karankunaw te hoyleinaw te nynh phe abia.

⁴⁰Nanning mingaee hae! Avawlan a raetu nynh alungkhu kha mah raebia khyh tou?

⁴¹Tukeiccuze alungkhu umpaw uccaw hae kha ryachi hae pyabua oh lah, pawpaw balyn tuh nae hanlan athyaa cih.

⁴²“Thuasalama Farasi hae, nae hanlan ngaethya lan kou um! Pawccecize nanning nynh hangmae te pucinan te enaw phuin hae balyn kha pumhaw pumkheit na pya oh zah, Pachia byading te a sungsahnaw kha na sawphah oh; ccangpaw kha sawphah leite, hynh-e hae hynh mah na cyi lan oh paw nynh thua.

⁴³Farasi hae, nae hanlan ngaethya lan kou um! Pawccecize nanning tuh sinakok kya ahoy huapaw haungnaw kha na ry oh zah kungkunaw kya sawtuate byabeihku na ry oh.

⁴⁴Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning tuh alang leipaw shawku hae te nynh na loku oh. Ccungccaw hae nynh tuh-e shawku hae kha nyh khyh hae zah avawlan khe a ccia hae,” a cipya.

⁴⁵Kawbya thya hae paw kyaze lukheitpaw nynh, “Sazae, tuhte he na ho tuh kaening hynh mah nae saryabua vae,” a cipya.

⁴⁶Jesu nynh, “Nanning kawbya thya hae paw mah, nae hanlan ngaethya lan kou um! Pawccecize nanning nynh myarya ripaw phupaw kha ccungccaw hae tungvaw na khang oh zah naemaw tuh nae kuihdung te san na hae ry khyh oh.

⁴⁷Nanning hanlan ngaethya lan kou um! Pawccecize nae minpaaw hae nynh a chia hae paw profeh hae elang shawku kha na raepya oh.

⁴⁸Nae minpaaw hae nynh a cyi hae paw kha nae nawccah zah ccaekia na khan oh; pawccecize minmin nynh profeh hae kha theih hae zah nanning nynh mih shawku hae kha na raepya oh.

⁴⁹Tukeiccuze Pachia Hawnaw nynh, ‘Minmin kalan profeh hae te locceihtu hae kha ka saw cih hae; minmin nynh abang kha a theih cih hae zah abang kha a tuaa a sah cih hae,’ a ci.

⁵⁰Tukeiccuze laephi athonaw aleihpaw kyate aluapaw profeh hae chiise balyn mee kha hynh-e ciihan hae kya ngia athua cih.

⁵¹Abel chiise kyate tho zah silawhang te beikinnthyaa laku kya a chia hae paw Zekhariah chiise kyacia ngia athua cih hae. Byaccaccing kae hopya oh, tuh-e tuh e ccungccaw hae kya ngia athua cih.

⁵²Kawbya thya hae paw, nae hanlan ngaethya lan kou um! Pawccecize nanning nynh hawnaw tohccung kha na kyng oh zah, naemaw mah na tee khyh oh, a tee ry hae paw kha mah na khee oh,” a ci.

⁵³Tuin kyate Jesu tuh he a pou te, kawbya sazae hae te Farasi hae nynh bya patae yn hosei ccaw cite Jesu kha thinriasah khylan bya patae a khia hae.

⁵⁴A munglae kyate yn toikuhpaw kha kyngpya lan zah seibe lan cite amaw kha phang a dokhaw hae.