Read Zotung Chin LUKA 13 Bible Online

LUKA 13 - Zotung Chin bible

LUKA 13

¹Tuh ccyh lyakhe abang ccungccaw hae nynh Jesu kyakhe Pilat nynh Galilee hae chiise kha si a lawnaw hae paw ryte pong a pydepaw kong kha a hopya hae.

²Jesu nynh, “Tuh-e Galilee hae tuh tuhte a teing hae keiccuze ccangpaw Galilee hae balyn laeze a seihua hae paw cite tou na tua oh?

³Seihua khyh hae, nanning kae hopya oh; na ngaesiku khyh oh ze, tuh-e hawte marya na chih cih oh.

⁴Tuhkhyhze, Siloam kya innhangpaw nynh tingthin hae zah a chih hae paw lu haw lae tarya hae kha ccangpaw Jerusalem khuaccaaw hae balyn laeze a seihua hae paw cite tou na tua oh?

⁵Seihua khyh hae, nanning kae hopya oh; na ngaesiku khyh oh ze, tuh-e hawte marya na chih cih oh,” a cipya hae.

⁶Jesu nynh e tousenaw phungpaw hynh mah a ho: “Ccungccapaw lu kheit nynh a misu khokhu kyakhe thaeku ku kheit a lin; yn cceih zah tuh-e ku kya athae kha ccung zah muih khyh.

⁷Misu khokhu ngawtupaw kha, ‘Dotua, kum thum cia hynh-e thaeku ku kalan kae cceih zah athae ka ccung zah ka muih khyh; nge ccavae; pawlangmou laephi hynh a thangsah han?’ cite a hopya.

⁸Khokhu ngawtupaw nynh, ‘Sazae, kum kheit sankaw tuh hynhmawte um hin sah, a pepan kya laephi ka thualeihpah cih zah lae hoy ka pumnua ung cih.

⁹Khuavae kya athae yn thae ze ahoy; yn thae vae khyh ze na nge vae cih,’ a cipya,” a cipya.

¹⁰Jesu nynh sabbath nin kya sinakok ccangkheit kyakhe a ccangpya hae.

¹¹Tuin kyakhe muisaw hoyleipaw nynh kum haw lae tarya cia a ngoisahpaw nopinung lu kheit a um; tuh-e nung tuh a ke ky zah lawbabin lan umthya khyh.

¹²Jesu nynh tuh-e nung tuh he a muih te ko zah, “Nopinung, na ccinaw kyate na lue vae,” a cipya.

¹³Tuh-e nung tungvaw a kuih he a khang te, a ke tuh vaekheihmawte yn law zah Pachia kha the a hoysah.

¹⁴Tuhte Jesu nynh sabbath nin kya a dansah keiccuze sinakok uktupaw nynh a thinria zah ccungccaw hae kyakhe, “Ryalaw lawku nin nintaruh a um, tuh-e nin hae kyakhe oun cceih oh lah dannaw mue oh, sabbath nin kya tuh mue nan oh,” a cipya hae.

¹⁵Bawipaw nynh khung zah, “Thyaruh hae! Nanning lu kheit cci nynh sabbath nin kya nae tangnuapaw khyhze nae lann kha a inn kyate na supah oh zah tui nia lan na cciakhae khyh oh tou?

¹⁶Kum haw lae tarya cia Satan nynh phang a heepaw, Abraham ccanung athuapaw, e nopinung hynh hynh-e heenaw kyate sabbath nin kya luesah lan ccan khyh tou?” a cipya.

¹⁷Hynhte he a ho tuh, amaw a rawsetu hae balyn tuh maethya pong bongkuh hae; ccungccaw hae balyn tuh Jesu nynh a raepaw ngaeangnaw keiccuze mih lungtua.

¹⁸Jesu nynh, “Pachia peenaw tuh pawtemou aloku? Pawtemou ka touse cih?

¹⁹Ccungccapaw lu kheit nynh lawkuh zah a khokhu lungkhu lang a vuapaw mungngia cii te nynh aloku; tuh-e acii tuh lethung zah akupi lang yn tang, te vaawlang e pavaw hae nynh aran hae kyakhe bu a luaku hae,” a ci.

²⁰Jesu nynh bua ho zah, “Pachia peenaw tuh pawtemou ka touse cih?

²¹Hynh-e te nynh aloku. Nopinung lu kheit nynh ransi kha lah zah vaepoi ke kethum kya a phing, tuh-e vaepoi a thosahpaw ransi te nynh aloku,” a ci.

²²Jesu nynh Jerusalem lang khua a ccong lyakhe khuapi hae te khua taraw hae kalan po cceihpaw zah a ccangpya hae.

²³Ccungccaw lu kheit nynh, “Bawipaw, beihtaraw kyalya tou khumnaw a mue cih hae?” cite a khia. Jesu nynh minmin kha,

²⁴“Abypaw koikua kyate tee lan zuakuh oh; pawccecize, kae hopya oh, ccungccaw patae nynh tuh-e kya tee lan oun zuakuh cih hae zah tee kho lan khyh hae.

²⁵Inn hoitupaw nynh vaekheit thokuh zah thuakaw kha phe a khaw koute, nanning nynh atolang khe thadynte thuakaw kha na khua oh zah, ‘Bawipaw, thuakaw oun hungpah,’ na ci oh; aning nynh nanning kha, ‘Paw kyate nae thua oh paw cipaw kae nynh khyh oh,’ ae cipah cih oh.

²⁶Nanning nynh, ‘Namaw ryte ah ae ah neihkheih oh paw khaw! Kae khua laanpi kya balyn nae ccangpah khaw!’ nae ci cih oh.

²⁷Thuasalama aning nynh, ‘Paw kyate nae thua oh paw cipaw kae nyh khyh oh; nanning hoyleinaw a raetu hae, ka kyate cceih oh,’ ae cipah cih oh.

²⁸Nanning nynh Abraham, Isak te Jakob te profeh hae balyn kha Pachia peenaw kya na muih oh zah naemaw tuh atolang dae vua na thua oh paw kha he nae muih oh te, rawkhuinaw te hawzynaw oun um cih.

²⁹Ccungccaw hae tuh nithua, niccaw, thahlang, deilang te oun thua cih hae zah Pachia peenaw kya oun haung cih hae.

³⁰Nyathya hae paw kha masaty hae paw oun thua cih hae zah, masaty hae kha nyathya hae paw oun thua cih hae,” a ci.

³¹Tuh ccyh lyakhe Farasi hae abang oun thua hae zah Jesu kha, “Hein kyate toikuh lah pou, pawccecize Herod nynh chia lan ae ry,” a cipya hae.

³²Jesu nynh minmin kha, “Nanning la cceih oh lah tuh-e suizaw tuh, ‘Atunin te awkhualan tuh raerangsaro hae kha ka de cih hae zah ngeccih hae kha ka dansah cih hae. Tuinte nin thumnaw kya ka ryalaw ka thangsah cih,’ a ci cite la hopah oh.

³³Tuhzemah atunin, awkhualan te sarukheih tuh solei ka cceih ung cih; pawccecize profeh lu kheit nynh Jerusalem atolang kya a chi lanpaw tuh thua kho khyh.

³⁴Pou Jerusalem, Jerusalem, profeh hae kha na theih hae zah na kalan oun saw hae paw ccungccaw hae kha lung te na deih hae; awpinung nynh a taw hae kha a sake kaw a suelua hae hawte na ccaaw hae kha pynkheihlan suelua lan palei ka ry zah nang nynh na ry khyh!

³⁵Dotua oh, na inn tuh a muahanpaw lang a tang cih; nang kae hopya, ‘Bawipaw min te yn thuapaw tuh lungtuapaw nynh thua!’ cite na ho mawlaezung nae muih vae lan khyh,” a cipya.