Read Zotung Chin LUKA 15 Bible Online

LUKA 15 - Zotung Chin bible

LUKA 15

¹Ngunto khoitu hae te misei hae balyn nynh Jesu bya kha ngae khylan a kalan oun cceih hae.

²Farasi hae te kawbya sazae hae nynh ccohkuh hae zah, “E ccungccapaw hynh misei hae kha lehkhan hae zah minmin ryte a aekheih hae,” a ci hae.

³Tukeiccuze Jesu nynh e tousenaw phungpaw hynh a hopya hae:

⁴“Nanning kya tuu za kheit a hoipaw ccungccaw nynh sa kheit kha a zosah lanze, sung takua sa takua kha ramkaw khe cciataw zah azopaw kha a muih makhia ccung khyh tou?

⁵Tuh-e tuu tuh he a muih te, lungtuate a raw vawlan a khangku.

⁶Innvaw he a thua tuh a ban hae te innpaw hae kha ko hae zah, ‘Lung oun tuakhae oh, pawccecize azopaw ka tuu kha phe ka muih vae,’ a cipya hae.

⁷Nanning kae hopya oh, tuhawte ngaesiku aho leipaw miding hae sung takua lu takua hanlan laeze a ngaesikuhpaw misei lu kheit hanlan vaawlang khua kya lungtuanaw a umhua.

⁸“Tuhkhyhze, nopinung lu kheit nynh ngunphua pia haw hoi zah, pia kheit kha a zosah lanze maeekhua awkute inn kha phibia zah a muih mawlaezung pekite ccung khyh tou?

⁹He a muih te, a ban hae te innpaw hae kha ko hae zah, ‘Lung oun tuakhae oh, pawccecize ka zosahpaw phuapia kha phe ka muih vae,’ cite a hopya hae.

¹⁰Tuhawte, kae hopya oh, a ngaesikuhpaw misei lu kheit hanlan Pachia kya-e vaaw hae tuh mih lungtua,” a cipya hae.

¹¹Jesu nynh, “Ccungccapaw lu kheit nynh ccapaw lu ning a hoi.

¹²Asoipaw nynh a paaw kha tho zah, ‘Apang, ka ccou lanpaw rho kha yn pya ccavae,’ a cipya. Tukeiccuze mih paaw nynh a hoipaw uccaw tuh minmin kha a nee hae.

¹³Aro mawze asoipaw nynh a uccaw balyn kha lawkuh zah asawnaw ram lang a cceih, tuin ram kyakhe a rythyte um zah a uccaw tuh pasupalah pong a mang.

¹⁴A hoipaw balyn marya a mang kou tuh, tuin ram kya myarya ccakanccih zah aning tuh myarya a ryachi vae.

¹⁵Tukeiccuze tuin ram e ccungccapaw lu kheit kalan a ryalawpya lan cceih zah, tuh-e paw nynh a voh rin lan a loo lang a cciasah.

¹⁶Aning tuh voh hae nynh a ae hae paw bia kaleih kha heize phe byn lan a ae ry vae, thuasalama hum nynh san looh pya vae khyh.

¹⁷Amaw te amaw yn nyhkuh zah, ‘Ka paaw kya vaeluakuh hae paw patae tuh sanlou aetae lei a hoi hae, thuasalama kae tuh hein kya vuelawte ka chih vae cih!

¹⁸Ka thokuh cih zah ka paaw kalan ka cceih cih zah, “Apang, Pachia malang te na malang phe ka sei vae.

¹⁹Kae tuh na ccapaw ci lan ka ngaekuh vae khyh, na kya vaeluakuhpaw lu kheit hawte yn nungbua,” ka cipah cih,’ cite a tuaku.

²⁰Tukeiccuze thokuh zah a paaw kalan a cceih. Thuasalama laan sawpi yn thua lyakhe a paaw nynh muih zah ngaethya myarya a umsah; te ccuenua zah pom zah a myng.

²¹A ccapaw nynh, ‘Apang, Pachia malang te na malang phe ka sei vae, na ccapaw ci lan ka ngaekuh vae khyh,’ a cipya.

²²Thuasalama a paaw nynh a see hae kha, ‘Ahoy huaccepaw boeining kha arangte oun lah oh lah lawsakuh oh, a kuih kya kuihpu pusah oh lah, a ccu kya phanah nawsah oh.

²³Vaetua taraw athopaw kha hynhlang oun cciakhae oh lah theih oh; lungtuanaw poi tua oh sih lah, ae oh sih.

²⁴Pawccecize e ka ccapaw tuh chih zah atu bua a hiinthui vae; aning tuh zo zah atu muihthui athua vae,’ a cipya hae. Te lungtuanaw poi tuh a tua hae.

²⁵“A ccapaw atawccapaw tuh loo kya a la um; yn cceih zah inn pe he a thua tuh tyngdaw te lawpaw roi kha a thae.

²⁶See lu kheit kha ko zah tuh-e tuh pawmou cite a khia.

²⁷Aning nynh, ‘Na neitawpaw kha phe yn thua vae, ngedante bua a muihthui keiccuze na paaw nynh athopaw vaetua taraw a chiapya,’ cite a hopya.

²⁸Atawccapaw tuh a thinria zah inn lungkhu lang tee vae khyh, tukeiccuze a paaw nynh yn toinuakuh zah a soihbia.

²⁹Aning nynh a paaw kha, ‘Ngaetua, kum hynhsepi cia see hawte rya kae lawpah zah, na kaw kae ei boi khyh, tuhzemah ka ban hae ryte lungtuanaw poi kae tuaku nawlan miaa taraw sa kheit san nae pya boi khyh.

³⁰Thuasalama ohhuanung hae ryte na hoipaw uccaw marya a mangpaw e na ccapaw tuh he yn thua mawte, athopaw vaetua taraw kha na chiapya,’ cite a hopya.

³¹A paaw nynh, ‘Ka ccapaw, nang tuh ka kya tyty na um zah, ka hoipaw balyn tuh na kya-e nynh thua.

³²Na neitawpaw tuh chih zah atu a hiinthui vae, zo zah atu ah muihthui vae oh; tukeiccuze aening tuh ah lungtua zah lungtuanaw poi tua lanpaw nynh thua,’ a cipya,” cite a ho.