Read Zotung Chin LUKA 16 Bible Online

LUKA 16 - Zotung Chin bible

LUKA 16

¹Jesu nynh a zuitu hae kyakhe, “Mihoipaw lu kheit nynh synriatu lu kheit a hoi, tuh-e paw nynh a bawipaw uccaw hae kha phya a mang kou cite a bawipaw kha a hopya hae.

²A bawipaw nynh tuh-e paw tuh ko zah, ‘Na konglang ka thaepaw tuh pawtemou athua? Synriatu rya na lawnawpaw ccazing kha yn pya, pawccecize synriatu na thua kho vae lan khyh,’ a cipya.

³Synriatu nynh a lungkaw te, ‘Pawmou ka cyih vae cih? Ka bawipaw nynh ka ryalaw kyate phe yn phua vae, laephi thae lanze ka thae kho khyh, ngiaku lanze ka maethah.

⁴Ka ryalaw athang vae ze, ming hae nynh mih inn lang oun thuasah nawlan hae, pawte cyi lan cipaw ka nyku vae,’ a ciku.

⁵A bawipaw laebah um hae paw miakaw kha ko hae zah, masaty lukheitpaw kha, ‘Ka bawipaw kya hohzeihmou laebah na um?’ cite a khia.

⁶Aning nynh, ‘Chitui bath za kheit,’ a cipya. Aning nynh, ‘Na ccazing kha lawkuh lah arangte haung lah sung pangaw cite zeikuh,’ a cipya.

⁷Mingccangpaw kha, ‘Nang so hohzeihmou laebah na um?’ cite a khia. Tuh-e paw nynh, ‘Chanvuih kor za kheit,’ a cipya. Synriatu nynh, ‘Na ccazing kha lawkuh lah sung tarya cite zeikuh,’ a cipya.

⁸A hynhupaw synriatu nynh hawrarih lante a cyi keiccuze a bawipaw nynh the a hoysah. Pawccecize e laephi ccungccaw hae tuh mimaw she e ccungccaw hae te ccuepekunaw kya awnaw ccungccaw hae laeze a hawhua hae.

⁹Nanning kae hopya oh, atyn leipaw laephi sisua khate ruiban hae kha raekuh oh; tuhteze nynh tuh-e sisua he athang te, tuh-e ruiban hae nynh nanning kha zungzae tynpaw inn kya ae cciadue cih oh.

¹⁰“Adihpaw uccaw kya a lungzipaw tuh alepaw uccaw kya mah a lungzi; adihpaw uccaw kya a hynpaw tuh alepaw kya mah a hynpaw nynh thua.

¹¹Tukeiccuze atyn leipaw sisua kya nae lungzi khyh ze, ahmepaw hoirumnaw kha hum nynh mou ae pya cih oh?

¹²Ming hae uccaw kya nae lungzi khyh ze, naemaw na ccou lan oh paw uccaw thy tuh hum nynh mou ae pya ry cih oh?

¹³See lu kheit nynh bawi lu ning ryalawpah kho khyh; pawccecize bawi lu kheit kha a hua cih zah lu kheit kha a sungsah cih, tuhkhyhze lu kheit kalan a pan cih zah lu kheit kha pawlangria lan khyh. Nanning nynh Pachia te phuasui kha parouh na ryaa kho khyh oh,” a cipya hae.

¹⁴Phua a ry hae paw Farasi hae nynh tuh-e bya balyn tuh thae hae zah Jesu kha a nuinse hae.

¹⁵Jesu nynh minmin kha, “Nanning tuh ccungccaw hae malang naemaw te naemaw na dingsakuh oh paw nynh na thua oh; thuasalama Pachia nynh nae thinlung kha a ny; pawccecize ccungccaw nynh myarya aphute lante tuapaw uccaw tuh Pachia muihnaw kya anungsikuhpaw nynh thua.

¹⁶“Kawbya te profeh hae ccauh tuh baptisma pyatu Johan kyacia hanlan nynh thua. Johan ccyh kyate vae tuh Pachia peenaw thehoypaw kha ho thua vae zah ccungccaw miakaw nynh tuh-e peenaw lungkhu lang thawte a tee vae hae.

¹⁷Kawbya kya-e ccapyh loihpaw ccaw ccangkheit azo laeze vaaw te lae zo nynh azoihua.

¹⁸“Humhung zemah a zu kha mah zah ccangpaw nopi kha zu lang a hoipaw tuh milae zu a seikhaepaw nynh thua; a vawpaw nynh a myapaw nopi kha zu lang a hoipaw tuh milae zu a seikhaepaw nynh thua.

¹⁹“Sephaphuhpaw boeining te nebaleihpaw boeining kha lawkuh zah myarya hoysahte nin takyh leih umpaw mihoipaw lu kheit a um.

²⁰Lazaruh a ci hae paw ryachipaw lu kheit a um, aning tuh a pyn balyn vaemaw te phe beih zah mihoipaw thuakaw zung khe phang a huekuh.

²¹Mihoipaw ccaboi kyate accahpaw loohmoi kha ae lan a ry; ui hae nynh oun cceih hae zah a vaemaw hae kha leih a lyapya hae.

²²Tuh-e ryachipaw tuh chih zah vaaw hae nynh Abraham byvaw kalan a cciakhae hae. Mihoipaw mah chih zah a uu hae.

²³Mihoipaw tuh Hell lungkhu kya myarya ccih lan teing zah, a dothung tuh asawnaw e Abraham te a pe umpaw Lazaruh kha a muih hae.

²⁴Tetuh aning nynh sia zah, ‘Apang Abraham, thaw beih yn ccih lah Lazaruh kha beih yn sawpah, a kuihdung kha tui kya yn dungsah lah ka lae hynh yn kyaasah sah, pawccecize kae tuh hynh-e maeephu kya myarya ccih lan ka teing,’ a cipya.

²⁵Thuasalama Abraham nynh, ‘Ka ccapaw, na hiin lyaze uccaw hoypaw hae kha na mue zah, Lazaruh tuh uccaw thahpaw hae kha a mue cipaw liathuitua; thuasalama atu aning tuh hein kya ngaengansah athua vae, nang tuh myarya ccih lan na teing vae.

²⁶Tuhpiaze kaening te nanning laku kya myarya khupaw hunghuapi kha rae athua vae. Tukeiccuze hein kyate nae kalan a cceih ry hae paw nynh cceih kho khyh hae, khahlang te kaening kalan a cceih ry hae paw mah cceih kho khyh hae,’ a cipya.

²⁷Mihoipaw nynh, ‘Tuhteze, apang, Lazaruh kha ka paaw inn lang nae la sawpya nawlan kae ngia.

²⁸Pawccecize kae tuh uno lu pangaw ka hoi, minmin nynh hynh-e teingnaw hmin kalan oun thuabua khyh nawlan hae, aning nynh minmin kha raeringnaw la pya hae sah,’ a cipya.

²⁹Abraham nynh, ‘Minmin tuh Moses te profeh hae mang a hoi hae, minmin bya kha la ngae hae sah,’ a cipya.

³⁰Thuasalama aning nynh, ‘Apang Abraham, tuhte thua khyh; chinaw kyate lu kheit nynh thoothui zah mih kalan a ccia ze, minmin tuh a ngaesikuh cih hae,’ a cipya.

³¹Abraham nynh, ‘Minmin nynh Moses te profeh hae bya kha a ngae khyh hae ze lukhakheit nynh a chih hae paw kyate a tho zemah zyn lae vae lan khyh hae,’ a cipya,” cite a hopya hae.