Read Zotung Chin LUKA 17 Bible Online

LUKA 17 - Zotung Chin bible

LUKA 17

¹Jesu nynh zuitu hae kha, “Seinaw lungkhu lang a ccawsahpaw uccaw hae tuh palei a um cih, thuasalama tuh-e uccaw hae a umsahtupaw hanlan ngaethya lan kou um!

²E imua taraw hae lukhakheit kha seinaw a raesah lae tuh a nging kyakhe mianawpaw lung kha sae lan zah rili lungkhu lang ccaring vua lanze amaw hanlan ahoyhua.

³La raeringkuh oh! Na uno nynh a sei ze la thuihei, a ngaesiku ze la ngaethya.

⁴Nin kheit lungkhu na tungvaw vae sari sei zah nin kheit lungkhu vae sari na kalan yn ki zah, ‘Ka ngaesikuh,’ ae cipya ze, na la ngaethya cih,” a cipya hae.

⁵Locceihtu hae nynh Bawipaw kha, “Kae zynnaw hynh oun lesahthungpya tua,” a ci hae.

⁶Bawipaw nynh, “Nanning nynh mungngia cii cia zynnaw na hoi oh ze hynh-e thaeku ku hynh, ‘Na tharui kyate phohkuh lah rili lungkhu lang la bingkuh,’ na cipya oh ze, tuh-e nynh nae kaw phe ae ngae cih oh.

⁷“Nanning lakuze lukhakheit nynh see lu kheit hoi zah tuh-e see nynh lei a thue ze thuasah, tuhkhyhze tuu a rin ze thuasah, inn lang yn thua te, ‘Rang kangmaw lah, ae lan haung,’ cite hum nynh mou na ci cih oh?

⁸Tuh-e see kha, ‘Ka hanlan zerya yn hyngpah, anghyngnawpaw boeining kha lawkuh lah, ka ae ka nia lya yn ngawbia; tukoute nang tuh na ae na neih cih,’ cite na cipah lan khyh oh tou?

⁹Kaw na pya thyhte tuh-e see nynh a cyi keiccuze lungtuabya na hopah cih zawtou?

¹⁰Tuhawte nanning mah ryalaw ae naw oh paw balyn kha he na cyi vae oh ze, ‘Aening tuh angae-aduakuh leipaw see hae nynh ah thua oh, ah cyi lan oh paw rya kyalya nynh ah cyi oh!’ na ci cih oh,” cite a hopya hae.

¹¹Jesu tuh Jerusalem lang a ccia lyakhe Samaria te Galilee laku kyate po a cceih.

¹²Khua khuakheit lungkhu lang a tee tuh, vaethya ccinaw a kae hae paw lu haw nynh amaw kha a cciadue hae. Asawnaw khe thadyn hae zah,

¹³“Bawipaw Jesu, kaening hynh ngaethya oun umsah!” cite a sia hae.

¹⁴Jesu nynh he a muih hae tuh minmin kha, “La cceih oh lah ranpibawi hae kha la dosakuh oh,” a cipya hae. Minmin nynh a ccia lya hae khe mih ccinaw tuh phe athyaa.

¹⁵Minmin lakuze lukheitpaw nynh a dannaw kha he a muihkuh tuh, ki zah roi accae lante Pachia kha the a hoysah.

¹⁶Jesu cculeihpaw khe bakhung zah lungtuabya a ho; tuh-e paw tuh Samariapaw nynh thua.

¹⁷Jesu nynh, “Vaethya ccinaw a thyaa hae paw kha lu haw thua khyh tou? Lu takua hae so teimou a um hae?

¹⁸E minphuin ccangpaw holeite Pachia thehoysah lan yn kipaw lu kheit san um khyh tou?” a ci.

¹⁹Jesu nynh tuh-e paw tuh, “Thokuh, la cceih ccavae, na zynnaw nynh ae dansah vae,” a cipya.

²⁰Farasi hae nynh Pachia peenaw tuh hohtuhmou yn thua cih cite Jesu kha a khia hae. Jesu nynh, “Pachia peenaw tuh muihpaw uccaw te yn thua khyh.

²¹‘Dotua, hein kya nynh a um!’ Tuhkhyhze, ‘Khuin kya nynh a um!’ cite mah oun ci lan khyh hae; pawccecize Pachia peenaw tuh nae lungkhu nynh a um,” a ci.

²²Jesu nynh zuitu hae kha, “Ccungccaw Ccapaw nin ninkheit kha muih na ry oh ccyh yn thua cih zah, na muih lan khyh oh.

²³‘Hein kya nynh a um!’ Tuhkhyhze, ‘Khuin kya nynh a um!’ ae cipah cih oh; thuasalama la cceih nan oh, mih nulang la zuikuh nan oh.

²⁴Pawccecize vaawlui san kheit kyate khozaw laekuh zah ccangpaw san kheit kalan a aw hawte Ccungccaw Ccapaw mah amaw nin kya tuhawte yn thua cih.

²⁵Thuasalama aning tuh patae yn teing ty cih zah, e ciihan hae nynh oun vua cih hae.

²⁶Noah ccyh lya a la cyiku hawte Ccungccaw Ccapaw ccyh kya mah yn cyihkuh cih.

²⁷Noah nynh sanphalung lungkhu lang a tee nin cia, ccungccaw hae tuh aete, niate, zudykute, zudypyakute a um hae, te tuipayn yn ynkuh zah mih balynte marya a ro hae.

²⁸Tuhawte nynh Lot she lya mah a la cyiku; ccungccaw hae tuh aete, niate, uccaw reku zuakute, thingku ccoukute, inn sakkute a um hae.

²⁹Thuasalama Lot nynh Sodom khua kyate a pou nin khe vaawlang te maee te kemaee khuaa yn rah zah mih balynte marya a ro hae.

³⁰Ccungccaw Ccapaw yn langku nin mah tuhawte yn cyihkuh cih.

³¹Tuh-e nin kya, inn tungvaw umpaw ccungccaw nynh inn lungkhu umpaw a uccaw hae lawku khylan rungbung nan vae sah; tuhawte loo kya umpaw nynh mah inn lang ki nan vae sah.

³²Lot a zu kha liathui oh.

³³Humhung zemah a hiinnaw khumku lan a zuakuhpaw tuh a hiinnaw a shung cih, a hiinnaw a shungpaw tuh a hiinnaw a khyn cih.

³⁴Nanning kae hopya oh, tuh-e khuazi kya ikhung ccangkheit kya ccungccaw lu ning um hae paw kha lu kheit tuh law athua cih zah lu kheit kha cciataw athua cih.

³⁵Sungsuhkheih hae paw nopi hae lu ning kha lu kheit tuh law athua cih zah lu kheit tuh cciataw athua cih.

³⁶Loo kya a um hae paw lu ning kha lu kheit tuh law thua cih zah lu kheit tuh cciataw athua cih,” cite a hopya hae.

³⁷Zuitu hae nynh, “Teilangmou law athua cih hae, Bawipaw?” cite a khia hae. Jesu nynh, “Achihpaw rhua a umnaw kya lantaw hae mah a pumkuh bua cih hae,” a cipya hae.