Read Zotung Chin LUKA 18 Bible Online

LUKA 18 - Zotung Chin bible

LUKA 18

¹Jesu nynh lungthang leite zungzae sawsang lan accan cipaw kong kha tousenaw phungpaw te minmin kha hynhte a hopya hae.

²“Khua khuakheit kya Pachia raw a rih leipaw te ccungccaw mae a do leipaw byapiatu lu kheit a um.

³Tuin khua kya nomaenung lu kheit a um, aning nynh byapiatupaw kalan atu te atu cceih zah, ‘Kae yn rhawtupaw te kae hoipaw byathan kha hmerarih lan yn piapah,’ a cipya.

⁴Aning nynh khaw cia cyipya leite a um; thuasalama nyalang tuh byapiatu nynh, ‘Pachia raw mah ka rih khyh zah ccungccaw mae mah a do leipaw ka thua zemah,

⁵e nomaenung nynh kaccohkale yn nung keiccuze a hanlan ahmete ka cyipah cih, tuhkhyhze tuh palei yn thua cih zah yn bangsah cih,’ cite a lungkaw te a tuaku,” a ci.

⁶Bawipaw nynh, “Ahme leipaw byapiatu nynh a hopaw kha thaetua oh.

⁷Pachia nynh amaw kalan khuazi khuadae a sia hae paw, amaw nynh a po hae paw kha ahmete cyipya leite a um cih hae zawtou? Minmin bawm lanpaw kha a thysung cih zawtou?

⁸Nanning kae hopya oh, minmin kha arangte hmerarih lan a cyipah cih hae. Thuasalama Ccungccaw Ccapaw he yn thua te, laephi vawlan zynnaw kha a muih vema?” a ci.

⁹Mimaw kha miding lang riakuh hae zah mingccang hae a dothatheih hae paw kyakhe Jesu nynh e tousenaw phungpaw hynh a ho:

¹⁰“Ccungccaw lu ning tuh sawsang lan beikinn lang a cceihthung hae; lu kheit tuh Farasipaw thua zah lu kheit tuh ngunto khoitu nynh thua.

¹¹Farasipaw nynh thadyn zah a makhaete hynhte saw a sang: ‘Pou Pachia, kae tuh milae hawte ming hae uccaw a ruhpaw, atazae leipaw, milae zu a seikhaepaw ka thua khyh zah, e ngunto khoipaw hawte mah ka thua khyh keiccuze kae luung.

¹²Lonaw naw kheit ze vae ning looh-ae ka sung, ka muepaw abalyn kya-e pumhaw pumkheit kha ka pya,’ a ci.

¹³Ngunto khoitupaw tuh asawnaw langkhe thadyn zah vaawlang dothung ngan leite a by kha tukuh zah, ‘Pou Pachia, miseipaw kae hynh ngaethya yn umsah!’ a ci.

¹⁴Nanning kae hopya oh, tuh-e paw tuh Farasipaw laeze thyaaccoute a inn lang a ki; pawccecize amaw te amaw a hangthungkuhpaw balyn tuh sawbung athua cih; thuasalama amaw te amaw zakaw a sangsakuhpaw tuh hangthung athua cih,” a ci.

¹⁵Ccungccaw hae nynh nosi hae kha Jesu kalan haesah khylan oun cciakhae hae; tuh-e tuh zuitu hae nynh he a muih hae tuh minmin kha a pe hae.

¹⁶Thuasalama Jesu nynh minmin kha ko hae zah, “Imua taraw hae kha ka kalan oun cceih hae sah, kang nan oh; pawccecize Pachia peenaw tuh khahcihawpaw ccungccaw hae kya-e nynh thua.

¹⁷Byaccaccing kae hopya oh, humhung zemah Pachia peenaw kha imua taraw hawte a lawkuh leipaw tuh tuh-e peenaw lungkhu lang tee lan khyh,” a ci.

¹⁸Uktupaw lu kheit nynh Jesu kha, “Sazae hoypaw, zungzae hiinnaw ka ccou nawlan pawmou ka cyih cih?” cite a khia.

¹⁹Jesu nynh, “Pawccemou kae hynh ahoypaw cite nae ko? Pachia lu kheit laelan ahoypaw hum sanmah um khyh.

²⁰‘Milae zu milae vawpaw kya na sei lan khyh; ccungccaw na theih lan khyh; na ruh lan khyh; ahme leipaw ccaekia lang na tang lan khyh; na nung te na paaw kha sawtua hae,’ acikuhpaw kawbya hae kha na nyh khaw!” a cipya.

²¹Aning nynh, “Tuh-e hae balyn tuh ka di lya mawte pong ka zui vae,” a ci.

²²Jesu nynh tuh-e bya he a thae te, tuh-e paw tuh, “Ccangkheit na bou ung, na hoipaw balyn kha zua lah ryachi hae kha la nee hae, tetuh vaawlang khua kya sisua na hoi cih; tukoute yn cceih lah yn zui,” a cipya.

²³Aning nynh tuh-e bya he a thae tuh myarya a ngaethah, pawccecize aning tuh myarya a hoipaw nynh thua.

²⁴A ngaethyapaw kha Jesu nynh he a muih tuh, “Mihoi hae nynh Pachia peenaw lungkhu lang tee lanpaw tuh pawcihmou aru!

²⁵Mihoipaw nynh Pachia peenaw kalan tee lae tuh kalauh nynh phynbang khu kya tee nynh azoihua,” a ci.

²⁶Tuh-e bya a thaepaw ccungccaw hae nynh, “Tuhteze hummou khumnaw a mue kho cih?” a ci hae.

²⁷Jesu nynh, “Ccungccaw hanlan athua kho leipaw kha Pachia hanlan tuh athua kho,” a ci.

²⁸Peter nynh, “Dotua, kaening tuh pawpaw balyn marya kae cciataw zah namaw kha kae zui vae,” a ci.

²⁹Jesu nynh, “Byaccaccing kae hopya oh, Pachia peenaw keiccuze inn thuasah, zu thuasah, uno thuasah, nungpaaw thuasah, ccaaw hae thuasah a cciatawpaw tuh,

³⁰atu she kya aleit patae mue leite um lan khyh, yn thua cih paw she kya zungzae hiinnaw mue leite um lan khyh,” a cipya hae.

³¹Jesu nynh zuitu hae lu haw lae ning kha ccanglang cciakhae hae zah, “Dotua oh, aening tuh Jerusalem lang nynh ah cciathung oh, Ccungccaw Ccapaw konglang profeh hae nynh a zei hae paw balyn tuh marya yn ccing cih.

³²Aning tuh Zenta hae kuih kalan pya yn thua cih zah saryanaw, dothatheihnaw te tuing te thoinaw kha a teing cih.

³³A bua cih hae zah a theih cih hae, te nin thumnaw kya bua yn thoothui cih,” a cipya hae.

³⁴Minmin nynh tuh-e bya tuh thaethya khyh hae, a hopaw kha minmin kyate thuruh thua zah, asuilan nyh khyh hae.

³⁵Jesu tuh Jeriko khua te anaekunaw lang a thua lyakhe, mitmohpaw lu kheit tuh laanpi pe haung zah a ngiakuh hae.

³⁶Ccungccaw zapi nynh a ccia hae paw siho kha thae zah, “Tuh-e tuh pawmou?” cite a khia hae.

³⁷Minmin nynh, “Nazareth paw Jesu nynh yn cceih,” cite a hopya hae.

³⁸Tetuh aning nynh, “David Ccapaw Jesu, kae hynh ngaethya yn umsah!” cite a sia.

³⁹Malang a cceih hae paw nynh zya a dae ccaw cite tuh-e paw tuh a sianua hae, thuasalama aning nynh, “David Ccapaw, kae hynh ngaethya yn umsah!” cite houh a sia.

⁴⁰Jesu nynh thadyn zah tuh-e paw tuh amaw kalan cciakhae lan kaw a pya hae, tuh-e paw tuh a pe lang he a thua te Jesu nynh,

⁴¹“Na hanlan pawmou nae cyisah ry?” cite a khia. Aning nynh, “Bawipaw, ngaw bua yn muih sah,” a cipya.

⁴²Jesu nynh, “Ngawmuih ccavae, na zynnaw nynh ae dansah vae,” a cipya.

⁴³Vaekheihmawte ngawmuihthui zah Pachia kha thehoysah biate Jesu kha a zui; ccungccaw hae balyn nynh tuh-e tuh muih hae zah Pachia kha the a hoysah hae.