Read Zotung Chin LUKA 19 Bible Online

LUKA 19 - Zotung Chin bible

LUKA 19

¹Jesu tuh Jeriko khua lang tee zah khua lungkhu te po a cceih.

²Tuin kya Zakia a ci hae paw ccungccapaw lu kheit a um; aning tuh ngunto khoitu hae kyaze lupi thua zah myarya a hoi.

³Zakia nynh Jesu tuh hummou thua cite muih a ry; thuasalama ccungccaw lung zah aning tuh a ne keiccuze muih kho khyh.

⁴Tukeiccuze malang ccue khaw zah tuhlang yn cceih cih paw Jesu kha muih khylan thaeku ku kya a kae.

⁵Jesu nynh tuin kya he a thua te, dothung zah, “Zakia, arangte yn rung, atunin na inn ka thua cih,” a cipya.

⁶Zakia tuh arangte yn rungbung zah Jesu kha lungtuate a thuasah.

⁷Tuh-e a muih hae paw ccungccaw hae balyn nynh ccohkuh hae zah, “Miseipaw inn lang thua lan nynh a ccia,” a ci hae.

⁸Zakia nynh thadyn zah Bawipaw kha, “Bawipaw, dotua, ka uccaw hae angankuh kha ryachi hae ka pya hae; te lukhakheit kha ka ling zah hankhakheit ka lawkupaw a um ze, leit pali ka pyaru cih,” a cipya.

⁹Tetuh Jesu nynh, “E paw mah Abraham ccapaw athua keiccuze atunin hynh-e inn kya khumnaw a thua vae.

¹⁰Pawccecize Ccungccaw Ccapaw tuh azopaw ccung khylan te khum khylan nynh yn thua,” a ci.

¹¹Ccungccaw hae nynh tuh-e bya a ngae lya hae khe, Jesu nynh tousenaw phungpaw ccangkheit a hopya chih hae. Pawccecize Jesu tuh Jerusalem lang vyavya a thua vae keiccuze Pachia peenaw tuh palou yn thua vae cih cite a tua hae.

¹²Tukeiccuze a hopaw tuh: “Bawi lu kheit tuh asawnaw ram lang ccia lan zah, tuin ram kya siapharan lang tang koute bua ki lan cite a paccynku.

¹³A ccia mawkhe, a see hae lu haw kha ko hae zah mina phua kia haw pya hae zah, ‘E hynhte bua kae thua cia kung la kunah oh,’ a cipya hae.

¹⁴Thuasalama a ram kya-e ccungccaw hae nynh amaw kha a hua hae keiccuze a nulang te ccungccaw saw hae zah, ‘E paw nynh ukku lan kae ry khyh,’ cite a hosahpya hae.

¹⁵Tuh-e bawi tuh siapharan lang a tang koute he yn ki tuh, phua a pyasya hae paw see hae nynh kungkunaw kyate hohzeihmou a mue hae cipaw ny khylan a kalan a kosah hae.

¹⁶Masatypaw nynh yn thua zah, ‘Bawipaw, nae pyapaw mina phua kia kheit te mina phua kia haw amia ka mue,’ a cipya.

¹⁷A bawipaw nynh, ‘Ahoy, see hoypaw! Nang tuh myarya dihpaw uccaw kya na lungzi keiccuze khuapi khua haw kha na uk cih,’ a cipya.

¹⁸Lu ningnawpaw nynh yn thua zah, ‘Bawipaw, nae pyapaw mina phua kia kheit te mina phua kia pangaw amia ka mue,’ a cipya.

¹⁹A bawipaw nynh, ‘Nang tuh khuapi khua pangaw na uk cih,’ a cipya.

²⁰Ccangpaw lukheitpaw yn thua zah, ‘Bawipaw, hein kya na mina phua tuh a um. Pavua te ka tung zah ka ccy.

²¹Pawccecize nang tuh myarya a reipaw na thua zah kae rih; na ccyku leipaw kha na lawkuh zah na ccouku leipaw kha na ruekuhpaw nynh na thua,’ a cipya.

²²A bawipaw nynh, ‘See thyapaw, namaw bya thyhte bya kae pia cih! Kae tuh ka ccyku leipaw kha ka lawkuh zah ka ccouku leipaw kha ka ruekuhpaw myarya ka reipaw cipaw mang na nyh pite,

²³pawccemou ka phua tuh ban kya na nung khyh? He kae ki te, ka phua tuh ato ryte ka mue cih paw!’ a cipya.

²⁴A pe a thadyn hae paw kyakhe, ‘A mina phua kha lah oh lah kia haw a hoitupaw kha pya oh,’ a cipya hae.

²⁵Minmin nynh, ‘Bawipaw, aning tuh mina phua kia haw a hoi khaw tou!’ a ci hae.

²⁶Mih bawipaw nynh, ‘Kae hopya oh, a hoipaw ccungccaw miakaw kha pyachih athua cih zah a hoi leipaw kya-e a hoi thypaw kha heize lawpya athua cih.

²⁷Mih siapharan lang yn ry lei hae paw ka rhaw hae kha hynhlang oun cciakhae oh lah, ka malang maw hin theih oh,’ a cipya hae,” a ci.

²⁸Jesu nynh tuh-e bya a ho koute Jerusalem lang ccia lan mih malang te a cceih.

²⁹Oliv Mua a ci hae paw mua pe umpaw Bethfake te Bethani khua pe a thua tuh, a zuitu hae lu ning kha saw hae zah,

³⁰“Nae malang umpaw khua kalan la cceih oh lah tuh-e khua lungkhu lang he na tee oh te, hum nynh sanmah a cciku boi leipaw lann taraw a khii hae paw kha na la muih cih oh, tuh-e tuh oun supah oh lah hynhlang oun sue oh.

³¹Lukhakheit nynh, ‘Pawccemou na supya oh?’ cite ae khia oh ze, ‘Bawipaw nynh a peki,’ cite nae hopah cih oh,” a cipya hae.

³²A saw hae paw ccungccaw hae tuh cceih hae zah Jesu nynh a hopya hae hawte a muih hae.

³³Lann taraw kha he a supah hae tuh, a hoitu hae nynh, “Pawccemou lann taraw kha na supya oh?” a ci hae.

³⁴Minmin nynh, “Bawipaw nynh a peki,” a cipya hae.

³⁵Minmin nynh lann taraw kha Jesu kalan a sue hae, lann taraw tungvaw kya mih boei hae kha depah hae zah Jesu kha a ccisaku hae.

³⁶Lann tungvaw ccikuh zah he a cceih tuh ccungccaw zapi nynh mih boei hae kha laanpi kya a phaepya hae.

³⁷Oliv Mua kyate rungbungnaw kya he a thua tuh, a zui hae paw zapi balyn nynh a muih hae paw ngaeangnaw hae balyn hanlan lungtuate Pachia kha roi accae lante thehoysah hae zah,

³⁸“Bawipaw min te yn thuapaw Siapharan tuh hythuaccou sah! Vaawlang khua kya daenaw um sah lah ahang huanaw vaawlang khua kya phu-enaw um sah!” cite a sia hae.

³⁹Ccungccaw zapi laku e Farasi hae abang nynh Jesu kha, “Sazae, na zuitu hae hynh zya daesah hae,” cite a hopya hae.

⁴⁰Jesu nynh tho zah, “Nanning kae hopya oh, e hae nynh zya a dae hae zemah lung hae nynh a sia cih hae,” cite a khung hae.

⁴¹Jesu tuh Jerusalem pe thua zah khuapi kha a muih tuh, khuapi hanlan a rah:

⁴²“Atunin kya daenaw elang pawmou abou cipaw na ny ze ahoy cih paw! Thuasalama atu tuh-e hae tuh na muih khyh nawlan thuruh athua.

⁴³Na rhaw hae nynh na pepan kya rhawhohung ae sak khaw cih hae zah teitei langte balyn varyng ae koih hae ccyh yn thua cih.

⁴⁴Namaw te na lungkhu e na ccaaw hae kha laephi kya ae noinae cih oh. Na kalan Pachia yn thua lanpaw ccyh kha na ny khyh keiccuze na kya lung ccangkheit vawlan ccangkheit akhangthykuh lei lan ciate ae cciataw cih hae,” a ci.

⁴⁵Beikinn lungkhu lang tee zah tuin kya uccaw a zuatu hae te a retu hae kha a dee hae;

⁴⁶aning nynh, “Ccathyaa kyaze, ‘Ka inn tuh sawsangnaw inn nynh thua,’ cite azeikuh; thuasalama nanning nynh miruh hae karung lang na rae vae oh,” a cipya hae.

⁴⁷Jesu nynh nin takyhte beikinn kya a ccangpya hae. Thuasalama ranpibawi lepaw hae te kawbya sazae hae te ccungccaw hae cciakhaetu hae nynh amaw chiathyanaw laanpi kha a ccung hae.

⁴⁸Tuhzemah ccungccaw hae balyn nynh a bya kha myarya a ngae ry hae keiccuze chia khonaw ccyh muihkuh khyh hae.