Read Zotung Chin LUKA 21 Bible Online

LUKA 21 - Zotung Chin bible

LUKA 21

¹Jesu nynh ngawdo zah mihoi hae nynh sisua bawng lungkhu lang mih lungsing a sang hae paw kha a muih.

²A ryachipaw nomaenung lu kheit nynh daw phuapia pia ning a sangpaw kha a muih.

³Jesu nynh, “Byaccaccing kae hopya oh, minmin balyn laeze hynh-e a ryachipaw nomaenung nynh alunghua a sang.

⁴Pawccecize minmin balyn tuh mih hoirumnaw patae kya-e kha a sang hae; thuasalama e nung tuh a ryachi pite a hiinnaw hanlan a hoipaw balyn kha marya a sang,” a ci.

⁵Ccungccaw abang nynh beikinn tuh apuithyapaw lung hae te thuasah, a hlu hae paw uccaw hae te thuasah ccaan athuapaw kong kha a ho hae; Jesu nynh,

⁶“Atu na muih oh paw hynh-e uccaw hae hynh lung ccangkheit vawlan ccangkheit san a khangthykuhpaw um vae leite, marya tingsah bung ccyh yn thua cih,” a ci.

⁷Minmin nynh amaw kha, “Sazae, tuh-e tuh hohtuhmou yn cyihkuh cih? Tuh-e yn cyiku dyn kya paw muihsahnaw mou yn langkuh cih?” cite a khia hae.

⁸Jesu nynh, “Nanning kha ae ling khyh nawlan oh la raeringkuh oh, pawccecize ccungccaw patae nynh ka min te oun thua cih hae zah, ‘Kae tuh amaw nynh ka thua! Accyh a anae vae!’ oun ci cih hae; minmin nulang la zuikuh nan oh.

⁹“Nanning nynh rhawtukkunaw kong te rhawtho lanpaw kong kha na thae vae oh ze la rih nan oh, pawccecize hynh-e uccaw hae tuh masaty yn thuaty cih, thuasalama athangnaw tuh palou thua loh lan khyh,” a ci.

¹⁰Jesu nynh minmin kha, “Minphuin phuin kheit te phuin kheit, ram kheit te ram kheit oun rhawkuh cih hae;

¹¹myarya rupaw innry yn suekuh cih; ram takyh kya ccakan yn ccih cih zah shethya yn thua cih; vaawlang te ri lan umpaw syntawnaw te alepaw muihsahnaw yn langkuh cih.

¹²“Thuasalama tuh-e hae balyn acyiku maw, kae ka min keiccuze ccungccaw hae nynh ae kyng cih oh zah ae tuaa ae sah cih oh, sinakok hae te thonginn hae kalan ae ap cih oh, siapharan hae te uktu hae malang ae thuakhae cih oh.

¹³Tuh-e tuh nae hanlan ccaekiakhan nawlan ccyhhoy athua cih.

¹⁴Tukeiccuze pawtemou kae khung cih hae cipaw na tuaku ty khyh nawlan oh la raeringkuh oh;

¹⁵pawccecize nanning ae rawse oh paw balyn nynh a ei kho lei hae paw te a khee kho lei hae paw hawnaw te hothyanaw kha kae pya cih oh.

¹⁶Nanning kha nungpaaw hae te uno hae, vaeccaw hae te ruiban hae nynh ae phee cih oh, minmin nynh nanning abang kha ae theih cih oh.

¹⁷Ka min keiccuze ccungccaw balyn nynh ae hua cih oh.

¹⁸Thuasalama nae lu kya-e nae sangrua ccangkheit sanmah zo lan khyh.

¹⁹Na ngaesangnaw oh liate nae hiinnaw kha na mue oh.

²⁰“Rhawkaw hae nynh Jerusalem khuapi a koih hae paw kha he na muih oh te, tuh-e ronaw tuh anae vae cipaw la nyh ccavae oh.

²¹Tetuh Judea ram kya a um hae paw nynh mua lang ccue hae sah, khuapi lungkhu a um hae paw nynh khuapi kha poutaw hae sah; ramkaw a um hae paw nynh khuapi lungkhu lang tee nan hae sah.

²²Pawccecize Ccathyaa kya azeikuhpaw balyn accing nawlan tuh-e nin tuh detahnaw nin nynh thua.

²³Tuin ccyh kya tuh ccaaw a poipaw nopi hae te matei zupaw nosi a hoipaw nopi hae hanlan ngaethya lan kou um! Pawccecize laephi vaw kya myarya ccihpaw riathaenaw yn um cih zah, e ccungccaw hae tungvaw Pachia bungpawnaw yn ccah cih.

²⁴Minmin tuh ahepaw thaloi te chia athua cih hae zah minphuin balyn kalan see lang cciakhae athua cih hae; Jerusalem tuh Zenta hae ccyh athang mawlaezung Zenta hae nynh a syde cih hae.

²⁵“Khuanin kya, sawpaw kya te awsi hae kya muihsahnaw yn langkuh cih, laephi vawlan minphuin hae tuh rili tuileih tho zah a siarua keiccuze lungthang ngaemyng te oun um cih hae.

²⁶Laephi vawlan oun cyihkuh lanpaw kong kha tuate ccungccaw hae tuh mih bungzou cih zah oun khuliakuh cih hae; pawccecize vaawlang e thungnaw huhan hae tuh yn hy cih.

²⁷Minmin nynh Ccungccaw Ccapaw tuh alesaepaw phu-enaw te huhan ryte maeking kya yn rungpaw kha oun muih cih hae.

²⁸E uccaw hae he yn cyiku takaw vae ze thadyn oh lah dothung oh, pawccecize nanning shawkhawnaw tuh anae vae,” a cipya hae.

²⁹Jesu nynh minmin kha tousenaw phungpaw ccangkheit a hopya hae: “Thaeku ku te thingku hae balyn kha dotua oh.

³⁰Anaw yn toihpaw kha na muih vae oh ze hawnin ccyh anae vae cipaw na ny oh.

³¹Tuhawte hynh-e uccaw hae yn cyikupaw kha nae muih vae oh ze, Pachia peenaw tuh anae vae cipaw kha la nyh ccavae oh.

³²Byaccaccing kae hopya oh, hynh-e uccaw hae balyn acyiku kou makhia atu she e ccungccaw hae tuh zo lan khyh hae.

³³Vaaw te lae tuh zo salamah ka bya tuh zo lan khyh.

³⁴“La raeringkuh oh, tuhkhyhze tuh hoysahnaw, zu-aenaw te hynh-e hiinnaw elang thinphangnaw khate nae thinlung tuh a vawsaw cih, te tualeipite tuh-e nin nynh ae thuanua cih oh.

³⁵Pawccecize tuh-e nin tuh laephi pynpi kya ccungccaw balyn tungvaw khe kaang hawte yn thua cih.

³⁶Yn thua cih paw uccaw balyn kyate na lue kho nawlan oh te Ccungccaw Ccapaw malang na thadyn kho nawlan oh raeringkute tyty um oh lah sawsang oh,” a ci.

³⁷Jesu nynh beikinn kya nin takyh a ccangpya hae, khuazi ccyh kya pou zah Oliv a ci hae paw mua kya a rya.

³⁸Awkhua takaw te ccungccaw hae balyn nynh a bya kha ngae khylan beikinn lang oun cceih hae.