Read Zotung Chin LUKA 22 Bible Online

LUKA 22 - Zotung Chin bible

LUKA 22

¹Kawtaw Poi a ci hae paw, Ransi phing leipaw Sanlou Poi tuh anae vae.

²Ranpibawi lepaw hae te kawbya sazae hae nynh ccungccaw hae raw a ri hae keiccuze Jesu chiathyanaw laanpi kha a ccung hae.

³Satan nynh locceihtu lu haw lae ning kyaze lu kheit athua buapaw Judas Iskariot lungkhu langkhe a tee.

⁴Tuh-e paw nynh ranpibawi lepaw hae te beikinn ngawtu hae kalan cceih zah mih kuih kalan Jesu pya lanpaw kong kha a hokhae hae.

⁵Minmin tuh myarya mih lungtua zah phua pya lante mih nawccah.

⁶Judas nynh mah a nawccah zah ccungccaw zapi a um khyh lya hae khe Jesu kha mih kalan ap khylan ccyhhoypaw kha a ccungku vae.

⁷Ransi phing leipaw Sanlou Poi tua nin thua zah Kawtaw Poi elang tuutaw chia nin yn thua vae.

⁸Jesu nynh Peter te Johan kha, “La cceih oh lah, aening ah ae lan oh paw Kawtaw Poi zerya kha la paccyn oh,” cite hopah hae zah a saw hae.

⁹Minmin nynh amaw kha, “Pawkyamou la paccyn hae sah ci nae ry?” cite a khia hae.

¹⁰Jesu nynh, “Ngaetua oh, khua lungkhu lang he na tee oh te, dawre te tui yn phupaw ccungccapaw lu kheit nynh ae la tungkuh cih oh, aning nynh a teenaw inn lungkhu lang la zuikuh bua oh lah,

¹¹inn hoitu kha, ‘Sazaepaw nynh nang kha, “Ka zuitu hae ryte Kawtaw Poi zerya kae mangnaw lanpaw mikhia khaan tuh teisangmou a um?” ae ci,’ cite la hopah oh.

¹²Aning nynh a paccyn ty vae paw akopaw palung khaan kha ae la muihsah cih oh, tuin kyakhe aening hanlan la paccyn oh,” a cipya hae.

¹³Tukeiccuze minmin nynh cceih hae zah Jesu nynh a hopya hae hawte a muih hae, te minmin nynh Kawtaw Poi zerya kha a paccyn hae.

¹⁴Accyh azawte Jesu tuh locceihtu hae ryte ccaboi kya a haung hae.

¹⁵Jesu nynh minmin kha, “Ka teing maw hin nanning ryte hynh-e Kawtaw Poi zerya hynh mangkheih lan myarya ka peki.

¹⁶Pawccecize kae hopya oh, Pachia peenaw kya Kawtaw Poi eenaw accing makhia, e poi hynh ka ae boi vae lan khyh,” a cipya hae.

¹⁷Banang kha lah zah lungtuabya a ho koute, “E banang hynh lawkuh oh lah neekuh oh.

¹⁸Pawccecize kae hopya oh, Pachia peenaw yn thua mawlaezung misutui hynh ka neih boi vae lan khyh,” a ci.

¹⁹Tukoute sanlou kha lah zah lungtuabya a ho koute eih zah minmin kha a pya hae; te, “E tuh nanning kae pya oh paw ka pyn nynh thua, kamaw liathui nawlan mang oh,” a ci.

²⁰Tuhawte zerya a ae kou hae te, banang kha mah lah zah, “E banang tuh nanning hanlan ka laepaw ka chiise kya ka tynsahpaw byakin thawpaw nynh thua.

²¹Thuasalama dotua oh, kae yn pheetupaw kuih tuh ccaboi kya kamaw te kae umkheih.

²²Laerui-awde athua vae thyhawte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um!” a ci.

²³Zuitu hae nynh tuh-e uccaw tuh hum nynh mou yn cyih cih cipaw kha mimaw te mimaw laku a khiaku hae.

²⁴Zuitu hae laku kya hummou ale huapaw lang nung lan cipaw eikunaw a um.

²⁵Jesu nynh minmin kha, “Zenta siapharan hae nynh uknaw kaw te a uk hae, minmin a uktu hae paw kha hoynaw oun raepahtu cite a ko hae.

²⁶Thuasalama nanning tuh tuhte na cyih lan khyh oh; nanning laku ale huapaw tuh adih huapaw hawte athua cih; cciakhaetu athuapaw nynh ryalawpatu hawte athua cih.

²⁷Pawccecize aepaw a koihtupaw tou alehua? Tuhkhyhze a thohaepaw tou alehua? Aepaw a koihtupaw kha lehua khyh tou? Thuasalama kae tuh nanning laku kya a thohaepaw hawte nynh ka thua.

²⁸“Nanning tuh tuhounaw ka tung lyaze ka kya po na umbua oh paw nynh na thua oh.

²⁹Ka Paaw nynh peenaw kha yn pya hawte, kae nynh mah nanning kha peenaw kae pya oh.

³⁰Ka peenaw lungkhu ka ccaboi kya na ae na neih cih oh zah, Israel phin haw lae ning kha byapiate bawitungkhung kya na haung cih oh,” a cipya hae.

³¹Bawipaw nynh, “Simon, Simon, ngaetua! Chanvuih kha pasaryh te ryh hawte nanning kha Satan nynh ryh lan ae peki oh.

³²Thuasalama na zynnaw azo khyh nawlan saw kae sangpya; te ka kalan nae paleihku vae ze na uno hae kha thawzung na pya cih hae,” a cipya.

³³Peter nynh, “Bawipaw, nang ryte tuh thonginn lang thuasah, chinaw kalan thuasah ccia lan paccynkute ka um!” a cipya.

³⁴Bawipaw nynh, “Peter, nang kae hopya, nang nynh kae hynh ka nyh khyh cite vae thum nae vua maw, atunin aw khua lan khyh,” a cipya.

³⁵Jesu nynh zuitu hae kha, “Phuabu, sohrae, phanah phuku leite kae saw lya oh kha, hankhakheit na ho na bou oh paw um tou?” cite a khia hae. Minmin nynh, “Um khyh, ccangkheit san um khyh,” a ci hae.

³⁶Jesu nynh minmin kha, “Thuasalama atu tuh phuabu a hoipaw nynh phukuh sah lah sohrae a hoipaw mah vawkuh sah, te thaloi a hoi leipaw nynh a angkile kha zua sah lah thaloi kha rekuh sah.

³⁷Pawccecize, kae hopya oh, ‘Aning tuh misei hae ryte riakheih athua,’ cite azeikuhpaw tuh ka tungvaw yn ccing cih, pawccecize ka konglang a zei hae paw kha accing lalia vae,” a cipya hae.

³⁸Minmin nynh, “Bawipaw, dotua, hein kya thaloi zung ning a um,” a cipya hae. Jesu nynh minmin kha, “Azaw vae,” a cipya hae.

³⁹Jesu tuh yn pou zah leih a cyimae hawte, Oliv Mua lang cceih zah a zuitu hae nynh a zui hae.

⁴⁰Tuin kya he a thua te minmin kha, “Tuhounaw lungkhu lang na ccaw khyh nawlan oh sawsang oh,” a cipya hae.

⁴¹Minmin kyate lung deih khin loukaw asawnaw langkhe cceih zah ccukharutungte saw a sangpaw tuh:

⁴²“Apang, na rynaw athua ze, hynh-e banang hynh ka kyate yn lawpah; thuasalama kae ka rynaw hawte thua leite, na rynaw hawte thua sah,” a ci.

⁴³Vaawlang te vaawpaw nynh a kalan yn langkuh zah thawzung a pya.

⁴⁴Myarya a lungriathae pawte thawmawte saw houh a sang; a vaesaw tuh laekhu lang accawpaw chiise hawte nynh athua.

⁴⁵Saw a sangnaw kyate thokuh zah a zuitu hae kalan he a thua tuh ngaethyate a ih hae paw kha a muih.

⁴⁶Minmin kha, “Pawccemou na i oh? Tuhounaw lungkhu lang na ccaw khyh nawlan oh, tho oh lah sawsang oh,” a cipya hae.

⁴⁷Tuhte a ho cciamang lyakhe zuitu lu haw lae ning kyaze lu kheit athuapaw Judas nynh oun cciakhae hae paw ccungccaw zapi tuh oun thua vae hae, Judas nynh Jesu kha myng lan a naenuaku.

⁴⁸Thuasalama Jesu nynh, “Judas, Ccungccaw Ccapaw hynh nang nynh myngte tou na phee?” a cipya.

⁴⁹Jesu ryte a umkheih hae paw nynh yn cyihkuh lanpaw kha he a muih hae tuh, Jesu kha, “Bawipaw, thaloi te kae bae cih hae tou?” cite a khia hae.

⁵⁰Lukheitpaw nynh ranpibawi a seepaw kha a ranglang nakua thoh pae lan a bae.

⁵¹Jesu nynh, “Azaw vae!” a ci. Jesu nynh tuh-e paw nakua kha hae zah a dansah.

⁵²Jesu nynh amaw oun ccianua hae paw ranpibawi lepaw hae, beikinn ngawtu hae te piccan hae kha, “Kae hynh miruh hawte thaloi te tungbang te nae ccianua oh tou?

⁵³Beikinn kya nanning ryte nin takyh ka um lyaze nae kuih nae hangnua khyh oh; thuasalama atu tuh nae ccyh te mohnaw huhan athung ccyh nynh thua,” a cipya hae.

⁵⁴Minmin nynh Jesu kha kyng hae zah ranpibawi lupi inn lang a cciakhae hae. Peter nynh asawnaw te a zui.

⁵⁵Maepaw angaelung kya maeetua hae zah a haung lya hae khe Peter mah a haungbua.

⁵⁶Peter nynh maee pe a haungpaw kha ryalawpatu liaccanung nynh he a muih tuh riri do zah, “E paw mah Jesu ryte a mungkuh hae paw nynh thua,” a ci.

⁵⁷Peter nynh, “Nopinung, tuh-e paw tuh ka nyh khyh,” cite Jesu kha a vua.

⁵⁸Khuekheih aro koute mingccangpaw nynh Peter kha muih zah, “Nang mah minmin kya a um buapaw nynh na thua,” a cipya. Peter nynh, “Ccungccapaw, ka thua khyh!” a ci.

⁵⁹Suimilan ccangkheit loukaw aro koute mingccangpaw lu kheit nynh, “Thanccingte e paw mah Jesu ryte a mungkuh hae paw nynh thua, pawccecize aning tuh Galilee paw nynh thua,” cite tynkaring lan a ho.

⁶⁰Peter nynh, “Ccungccapaw, paw nynh na ho cipaw ka nyh khyh!” a ci. Tuhte a ho cciamang lyakhe aw ccahe yn khua.

⁶¹Bawipaw nynh maeleihkuh zah Peter kha a do. Tetuh, ‘Atunin aw a khua mawze, vae thum nae vua cih,’ cite Bawipaw nynh a hopyapaw bya kha Peter nynh a liathui vae.

⁶²Peter tuh atolang pou zah thawmawte a rah.

⁶³Jesu kha a kyngtu hae nynh sarya hae zah a bua hae.

⁶⁴Minmin nynh a mae kha phang bong hae zah a mae kha a bia hae, te “Hummou ae bua? Hotua!” cite a khia hae.

⁶⁵Minmin nynh saryanaw bya patae a honua hae.

⁶⁶Khua he adae tuh, piccan hae, ranpibawi lepaw hae te kawbya sazae hae nynh tungkuh hae zah Jesu kha kungsi malang poukhae hae zah,

⁶⁷“Khri na thua ze kaening hynh oun hopya tua,” a ci hae. Jesu nynh, “Kae hopya oh zemah na zyn lan khyh oh;

⁶⁸nanning kha bya kae khia oh zemah bya nae khunglae lan khyh oh.

⁶⁹Thuasalama atu tetuh Ccungccaw Ccapaw tuh Pachia thungnaw ranglang khe a haung vae cih,” a cipya hae.

⁷⁰Minmin balyn nynh, “Tuhteze, nang tuh Pachia Ccapaw tou?” a ci hae. Jesu nynh, “Na ho oh hawte ka thua,” a ci.

⁷¹Minmin nynh, “Ccangpaw ccaekia aho vae zawtou? Pawccecize a munglae kya-e bya kha ahmaw ccaccei nynh phe ah thae vae oh,” a ci hae.