Read Zotung Chin LUKA 23 Bible Online

LUKA 23 - Zotung Chin bible

LUKA 23

¹Ccungccaw zapi balyn nynh thokuh hae zah Jesu kha Pilat kalan a cciakhae hae.

²Minmin nynh Jesu kha seibe hae zah, “E paw nynh ah minphuin a cciakhae seipaw kha kae muih, te Sizar siapharan kalan ngunto pya lan a khee, amaw te amaw kha Khri a ci hae paw siapharan nynh ka thua a ciku,” cite a ho hae.

³Pilat nynh Jesu kha, “Nang hynh Judah hae Siapharan na thua tou?” cite a khia. Jesu nynh, “Na ho hawte nynh thua,” cite a khung.

⁴Pilat nynh ranpibawi lepaw hae te ccungccaw hae kha, “E ccungccapaw hynh a seinaw ka muih khyh,” a cipya hae.

⁵Minmin nynh houh sia hae zah, “Aning nynh Galilee kyate tho zah hynh-e hmin kyacia, Judea ram balyn po ccangpah hae zah ccungccaw hae kha mih lung a thosah,” a ci hae.

⁶Pilat nynh tuh-e bya he a thae tuh, “Tuh-e paw tuh Galilee paw athua tou?” cite a khia.

⁷Herod nynh a ukpaw ram kya a umpaw nynh thua cipaw a nyh tuh, Jesu kha Herod kalan a saw; tuh ccyh lyatuin Herod tuh Jerusalem kya nynh a um.

⁸Herod nynh Jesu kha he a muih tuh myaryamaw a lungtua, pawccecize Jesu konglang kha palei thae zah muih a rynaw khaw asaw vae; Jesu nynh ngaeangnaw ccangkhakheit a raepaw kha muih lan a ngaehoi.

⁹Herod nynh Jesu kha bya patae a khia; thuasalama Jesu nynh kaw kheit san khung khyh.

¹⁰Ranpibawi lepaw hae te kawbya sazae hae nynh thadyn hae zah Jesu kha thawmawte sei a be hae.

¹¹Herod te a rhawkaw hae nynh Jesu kha pawlangria leite a sarya hae; Herob nynh kou hoypaw boeining kha lawsakuh zah Pilat kalan bua a saw.

¹²Tuin nin ccaccei khe Pilat te Herod tuh ruiban lang a tang hae; tuh maw lya tuh a la rhawkuh hae paw nynh thua.

¹³Pilat nynh ranpibawi lepaw hae, uktu hae te ccungccaw hae kha pynkheihlan ko hae zah,

¹⁴“Nanning nynh e ccungccapaw hynh ccungccaw hae a cciakhae seipaw hawte ka kalan nae cciakhae oh; na muihnaw oh kya akaw-aleih bya ka khia zah, sei na benaw oh paw kya a seinaw ccangkheit san ka muih khyh.

¹⁵Herod nynh mah a seinaw a muih khyh keiccuze kaening kalan bua yn saw; thanccingte, e paw nynh chi lan accan lan ciate seinaw ccangkheit san rae khyh.

¹⁶Tukeiccuze ka bua cih zah ka luesah cih,” a cipya hae.

¹⁷Pawccecize Kawtaw Poi kya thongccahpaw lukhakheit kha minmin hanlan leih a sawpya hae.

¹⁸Minmin balyn nynh, “E ccungccapaw hynh theih lah, Barabbas kha oun sawpah!” cite ngingrarih lan a sia hae.

¹⁹Tuh-e Barabbas tuh khualae lungkhu rhawkunaw a raetu te ccungccaw a theihtu athua keiccuze thongccahpaw nynh thua.

²⁰Pilat nynh Jesu kha a luesah ry keiccuze minmin kha bua a hopya hae.

²¹Thuasalama minmin nynh, “Vaelantung kya khiade, amaw kha khiade!” cite a sia hae.

²²Pilat nynh vae thumnaw kya minmin kha, “Pawccemou? Paw hoyleinaw mou a rae? Chi lan accan lan ciate a tungvaw seinaw ka muih khyh, tukeiccuze ka bua cih zah ka saw cih,” a cipya hae.

²³Thuasalama minmin nynh Jesu tuh vaelantung kya khiade lanpaw nynh thua cite roi accae lante thawmawte a ngia hae keiccuze minmin roi nynh phe a tae.

²⁴Minmin nynh a ngia hae hawte thua sah cite Pilat nynh bya a pae.

²⁵Khualae lungkhu rhawkunaw a pousah keiccu te ccungccaw a chia keiccuze thong a ccahpaw kha minmin nynh a ngia hae thyhte Pilat nynh a sawpya hae; thuasalama Jesu kha mih rynaw hawte cyi lan a pya hae.

²⁶Minmin nynh Jesu kha a cciakhae lya hae khe, Sairin khuapaw Simon, khua taraw langte yn cceihpaw kha kyng hae zah vaelantung kha puihsah hae zah Jesu nulang a zuisah hae.

²⁷Ccungccaw aphupi nynh Jesu kha zui hae zah, tuh-e hae kyakhe amaw elang thinlungccite a rah a khui hae paw nopi hae mah a umbua hae.

²⁸Thuasalama Jesu nynh mih kalan hawi zah, “Jerusalem ccanung hae, kae ka hanlan rah nan oh, naemaw te nae ccaaw hae hanlan palia rah oh.

²⁹Pawccecize, ‘A tiin hae paw te ccaawsaah boi leipaw vue hae te imua nynh a zu boi leipaw matei hae tuh lungtua hae paw nynh thua,’ cite oun honaw hae ccyh tuh yn thua ccaccing cih.

³⁰Minmin nynh mua hae kha, ‘Kaening hynh oun tingthin oh,’ oun cipah cih hae zah sangpyng hae kha, ‘Kaening hynh oun nethin oh,’ oun cipah cih hae.

³¹Pawccecize minmin nynh ahinpaw thingku kya hynhte a cyi hae ze aroupaw thingku kya pawmou acyikuh cih?” a ci.

³²Jesu ryte misei hae lu ning kha mah chia lan a cciakhae bua hae.

³³Kalvari a ci hae paw hmin kya a thua hae tuh, tuin kyakhe Jesu tuh vaelantung kya khiade hae zah, misei hae lu ning kha a ranglang lu kheit, a voilang lu kheit a khiade bua hae.

³⁴Jesu nynh, “Apang, minmin hynh ngaethya hae; pawccecize paw nynh kae cyi cipaw nyh khyh hae,” a ci. Minmin nynh ccungthydung hae zah a boeining kha a neeku hae.

³⁵Ccungccaw hae nynh thadyn hae zah phang a do hae; uktu hae nynh sarya hae zah, “Aning nynh ming hae kha a khum hae; aning tuh Pachia nynh a popaw Messiah athua lanze amaw te amaw kha khumkuh sah!” a ci hae.

³⁶Rhawkaw hae nynh mah a saryabua hae, amaw kha oun ccianua hae zah misutui ariapaw kha pya hae zah,

³⁷“Judah hae Siapharan na thua ze, namaw te namaw kha khumku tua!” a ci hae.

³⁸A luki khe, “E paw tuh Judah hae Siapharan nynh thua,” cite a zei hae paw ccawkhia kha a taw hae.

³⁹Vaelantung kya a sae hae paw misei hae lu ning kyaze lu kheitpaw nynh sarya zah, “Messiah na thua ze namaw te namaw kha khumkuh lah, kaening hynh mah yn khumbua!” a cipya.

⁴⁰Thuasalama lukheitpaw nynh tuh-e paw tuh pe zah, “E paw te alokuhpaw detahnaw kha mang na ing pite Pachia raw na rih khyh tou?

⁴¹Aening tuh ah cyisahnaw thyhte angaekuh lante hmerarih lan ah teingpaw nynh thua; thuasalama e paw tuh a cyiseipaw pawpaw mah um khyh,” a cipya.

⁴²Te aning nynh, “Jesu, na peenaw lungkhu lang he na thua te, kae hynh yn ning nan vae ii,” a cipya.

⁴³Jesu nynh, “Byaccaccing kae hopya, atunin nang tuh kamaw ryte Paradis kya na umbua vae cih,” a cipya.

⁴⁴Tuh ccyh lya tuh ninthu suimilan haw lae ning loukaw thua zah zete suimilan ccangthum cia ram pynpi tuh pong amoh.

⁴⁵Khuanin tuh phe amoh; beikinn lungkhu a zo hae paw boei tuh zung ning lang aseiikuh.

⁴⁶Jesu nynh thawte a sia koute, “Apang, ka muisaw hynh na kuih kya kae pya vae,” a ci. Tuhte a ho koute a hy athang.

⁴⁷Acyihkuhpaw kha rhawbawipaw nynh he a muih tuh Pachia kha thehoysah zah, “Thanccingte, e paw tuh adingpaw ccungccaw nynh thua!” a ci.

⁴⁸Tuh-e acyihkuhpaw tuh do khylan oun thua hae paw ccungccaw hae balyn nynh tuh-e tuh muih hae zah mih by tukute a ki hae.

⁴⁹Amaw ryte a nyhkuh hae paw balyn te Galilee kyate amaw a zui hae paw nopi hae tuh asawnaw khe thadyn hae zah acyihkuhpaw kha a do hae.

⁵⁰Judea ram kya Arimathea khuapaw Josef ci hae paw lu kheit a um. Aning tuh mihoypaw te midingpaw thua zah Pachia peenaw kha ngaehoite a ngawpaw nynh thua, aning tuh kungsi memba lu kheit athua zemah, kungsi memba hae mih khuakhannaw te mih cyisahnaw kha a nawccah leipaw nynh thua.

⁵¹

⁵²E paw nynh Pilat kalan cceih zah Jesu rhua kha a ngiaku.

⁵³Jesu rhua kha sahbung zah nebaleihpaw boei rawpaw te a lung, te lung a karyn hae paw, hum ccungccaw sanmah a uunaw boi lei hae paw shaw kyakhe a ccy.

⁵⁴Tuin nin tuh Paccynku nin thua zah sabbath nin thuanaw anae vae.

⁵⁵Galilee kyate amaw ryte oun cceihkheih hae paw nopi hae mah zuikuh bua hae zah a shawku kha thuasah, pawcihte nynh Jesu rhua a ccy hae cipaw kha thuasah a muihbua hae.

⁵⁶Minmin tuh ki hae zah amynkhuhpaw te zimuin kha a paccyn hae. Sabbath nin kya tuh kawbya thyhte a haeung hae.