Read Zotung Chin LUKA 24 Bible Online

LUKA 24 - Zotung Chin bible

LUKA 24

¹Lonaw naw kheit kyaze masaty nin awkhua takaw khe nopi hae tuh a paccyn hae paw amynkhuhpaw kha ccyng hae zah shaw kalan a cceih hae.

²Minmin nynh shaw kyate lung a nuekuhpaw kha a muih hae.

³Minmin nynh shaw lungkhu lang tee hae zah Jesu rhua kha muih vae khyh hae.

⁴Minmin tuh tuh-e konglang myarya mih ngaeangthua lyakhe, phaephae akpaw boeining a lawkuh hae paw lu ning tuh mih pe khe oun thadyn hae.

⁵Nopi hae tuh rih hae zah laekhu kya a bakhung lya hae khe, tuh-e hae nynh, “Pawccemou a chih hae paw laku kya a hiinpaw kha na ccung oh?

⁶Aning tuh hein kya um vae khyh, phe a thoo vae! Galilee kya a um lyaze ae hopah oh zah,

⁷‘Ccungccaw Ccapaw tuh misei hae kuih kalan pya athua cih zah vaelantung kya khiade athua cih, te nin thumnaw kya yn thoothui cih,’ a cipaw kha liathuitua oh,” cite a hopya hae.

⁸Tetuh nopi hae nynh Jesu bya kha a liathui vae hae.

⁹Shaw kyate ki hae zah tuh-e kong balyn tuh lu haw lae kheit kya te tuhlaepaw zuitu hae balyn kyakhe a hopya hae.

¹⁰Locceihtu hae kya tuh-e kong a hopahtu hae tuh: Mary Magdalin, Joanna, James a nung Mary te minmin ryte a umkheih hae paw ccangpaw nopi hae nynh thua hae.

¹¹Mih bya kha phungpaw huataw o-ang lante tua hae zah locceihtu hae nynh zyn khyh hae.

¹²Thuasalama Peter tuh thokuh zah shaw kalan khe a ccue; te bakhung zah he a do tuh boei rawpaw kyalya kha a muih, te acyihkuhpaw kha a ngaeangthua zah a inn lang a ki.

¹³Tuin nin khe zuitu hae lu ning tuh Jerusalem kyate me sari loukaw asawnaw Emmaus a ci hae paw khua lang a cceih hae.

¹⁴Minmin nynh acyihkuhpaw konglang balyn kha a hoku hae.

¹⁵Tuhte a hoku lya hae khe, Jesu amaw ccaccei tuh yn naekuh zah mih kya a cceihbua.

¹⁶Thuasalama mih mit tuh phang khaw thua zah amaw kha nyh khyh hae.

¹⁷Jesu nynh minmin kha, “Na cceih lalia lan oh te, paw kong mou na hoku oh?” cite a khia hae. Tetuh minmin tuh ngaethyate phang thadyn hae.

¹⁸Minmin kyaze Kleopas a ci hae paw nynh khung zah, “Jerusalem khua umpaw mikhia mang na thua pite, atu loukaw tuin kya acyihkuhpaw konglang kha na nyh khyh tou?” a cipya.

¹⁹Jesu nynh minmin kha, “Paw konglang mou?” cite a khia hae. Minmin nynh, “Nazareth khuapaw Jesu kong nynh thua, aning tuh Pachia malang te ccungccaw balyn malang cyisahnaw te bya kya athungpaw profeh nynh thua,

²⁰amaw kha ranpibawi lepaw hae te uktu bawi hae nynh a chi ccaw cite seibe khylan ap hae zah vaelantung kya a khiade hae.

²¹Aning tuh Israel hae kha oun shawkhaw cih paw nynh thua cite kaening nynh kae la ngaehoi; tuh-e hae kyalya thua leite, tuhte acyikunaw te atunin hynh nin thumnaw nynh thua.

²²Tuhpiaze kaening kae phu kya-e nopi hae abang nynh kae ngaeang oun thuasah hae. Minmin tuh khuadaetakaw te shaw kalan cceih hae zah,

²³a rhua kha muih vae khyh hae; te oun ki hae zah Jesu tuh phe hiin vae cite a hopah hae paw vaaw hae kya-e vizin kha mah kae muih cite oun hopya hae.

²⁴Kae umkheih hae paw abang nynh shaw kalan cceih hae zah nopi hae nynh a ho hae hawkhate a muih hae; thuasalama Jesu tuh muih khyh hae,” cite a hopya hae.

²⁵Tuinte Jesu nynh minmin kha, “Pou mingaee hae, profeh hae nynh a hosya hae paw balyn kha zyn lan myarya na rusah oh ii!

²⁶Khri tuh hynh-e hae hynh a teing koute a phu-enaw lungkhu lang tee lan ccan khyh tou?” a cipya hae.

²⁷Moses kyate tho zah Profeh hae balyn nynh amaw konglang a zei hae paw Ccathyaa balyn kha minmin kya ccaerarih lan a hopya hae.

²⁸A cceih cihnaw hae khua kya vyavya a thua hae tuh, Jesu tuh malang cceih zah po a sulue cih paw hawte a umsakuh.

²⁹Thuasalama minmin nynh, “Kae kya umbua hin, khuanin vyavya nae vae, khua yn zi vae cih,” cite thawmawte a kang hae. Tukeiccuze minmin ryte ryakheih lan a teebua.

³⁰Minmin ryte ccaboi kya he a koihkheih hae tuh, Jesu nynh sanlou kha lah zah hythua a pya koute eih zah a nee hae.

³¹Mih mit tuh oun ccae zah amaw kha a ny vae hae; te aning tuh mih muihnaw kyate phe azo.

³²Minmin nynh, “Laanpi kya aning nynh bya oun hopya lya te Ccathyaa oun ccaesahpya lya kha ah thinlung kya maee nynh oun upaw hawte khaw athua?” cite a hoku hae.

³³Tuh ccyh lyamawkhe minmin tuh thokuh hae zah Jerusalem lang a ki hae; zuitu lu haw lae kheit te mih ban hae a sueluakuh hae paw kha a muih hae.

³⁴Tuh-e hae nynh, “Bawipaw tuh a thoothui ccaccing vae, Simon kya a langkuh vae!” a ci hae.

³⁵Minmin nynh mah laanpi kya acyihkuhpaw konglang te sanlou a ia lya Bawipaw nynh thua cipaw a ny hae paw kong kha a hopya hae.

³⁶Tuhte minmin nynh a ho lya hae khe Jesu tuh mih ngaelaku khe yn thadyn zah, “Nae kya daenaw um sah,” a cipya hae.

³⁷Minmin nynh khozi nynh kae muih cite tua hae zah ohsiikuh hae zah a rih hae.

³⁸Jesu nynh, “Pawccemou nae bungzou? Pawccemou nae thinlung kya lunghiinnaw a um?

³⁹Ka kuih te ka ccu hynh dotua oh! Kamaw maw nynh ka thua, yn haetua oh lah yn dotua oh; pawccecize kae nynh ka hoipaw na muih oh paw ngesaw te ru kha khozi nynh tuh hoi khyh,” a cipya hae.

⁴⁰Tuhte he a ho koute, a kuih te a ccu kha a dosah hae.

⁴¹Minmin tuh mih ngaeangthua zah mih lungtua keiccuze a zyn kho khyh lya hae khe, Jesu nynh, “Hein kya ae lanpaw hankhakheit na hoi oh tou?” cite a khia hae.

⁴²Minmin nynh aruakuhpaw ngasaw pae kheit kha a pya hae.

⁴³Jesu nynh lawkuh zah a muihnaw hae khe a ae.

⁴⁴Tukoute Jesu nynh, “Moses kawbya ccauh kya thuasah, profeh hae ccauh kya thuasah, Sam ccauh kya thuasah kae ka kong a zei hae paw miakaw tuh marya accing cih cite nanning ryte ka um lyaze kae hopya oh paw bya tuh hynh-e hae hynh nynh thua,” a cipya hae.

⁴⁵Minmin nynh Ccathyaa kha a thaethya ccaw hae cite mih thinlung kha a uasah.

⁴⁶Minmin kha, “Ccathyaa kya hynhte azeikuh, Messiah tuh a teing cih zah nin thumnaw kya a chih hae paw kyate a thoothui cih.

⁴⁷Jerusalem kyate tho zah minphuin miakaw kalan ngaesikunaw te seingaethyanaw kong kha amaw min te ho athua cih.

⁴⁸Nanning tuh hynh-e uccaw hae konglang ccaekia hae nynh na thua oh.

⁴⁹Ka Paaw nynh bya a kinkupaw kha kamaw nynh nae tungvaw kya kae saw cih; thuasalama vaawlang te nae kya thungnaw yn thua mawlaezung Jerusalem khua kya la um hin oh,” a cipya hae.

⁵⁰Jesu nynh zuitu hae kha Bethani khua cia a cciakhae hae, te a kuih kha hangthung zah hythua a pya hae.

⁵¹Tuhte hythua a pya lya hae khe mih kyate phiakuh zah vaawlang lawthung athua vae.

⁵²Minmin nynh amaw kha beiksya hae zah lungtuanaw alepi te Jerusalem lang a ki hae.

⁵³Beikinn kyakhe Pachia kha tyty a thehoysah hae.