Read Zotung Chin LUKA 3 Bible Online

LUKA 3 - Zotung Chin bible

LUKA 3

¹Siapharan Tiberias nynh a uknaw kum haw lae pangaw lyakhe Pontias Pilat tuh Judea pee uktu thua zah Herod tuh Galilee pee uktu nynh thua; a neitaw Filip tuh Iturea pee te Trakhonitis pee kya uktu thua zah Lisanias tuh Abilene pee kya uktu nynh thua.

²Annas te Kaiafas tuh ranpibawi lupi thua hae zah, tuh ccyh lyakhe Pachia bya tuh ramkaw kyakhe Zekhariah ccapaw Johan kalan yn thua.

³Johan tuh Jordan vaw pepan umpaw ram balyn kalan khe cceih zah seinaw ngaethyanaw hanlan ngaesikunaw te asekuhpaw baptisma kong kha a ho.

⁴Profeh Isaiah bya kha ccauh kya azeiku thyhawte: “Ramkaw kya a siapaw lukheitpaw roi nynh, ‘Bawipaw laanpi kha paccynpah oh, a laanpi kha lawbabin lan raepah oh.

⁵Akhunaw miakaw kha bia athua cih zah mua te sangpyng miakaw kha tuphae athua cih; akoupaw laanpi kha lawbabin lan rae athua cih zah, karynkare a umpaw laanpi kha nginsah athua cih.

⁶Ccungccaw balyn nynh Pachia kya-e khumnaw kha a muih cih hae,’ a ci,” cite a ho.

⁷Johan nynh amaw kya baptisma in lan oun cceih hae paw ccungccaw zapi kha, “Pou huparepaw ciihan hae, yn thua cih paw thinrianaw kyate ccue lan hum nynh mou raeringnaw ae pya oh?

⁸Ngaesikunaw te angaekuhpaw athae hae kha langsakuh oh; ‘Abraham tuh kae paaw nynh thua,’ cite tuakuh nan oh. Pawccecize Pachia tuh hynh-e lung hae kyate Abraham ccaaw hae kha a rae kho cipaw kae hopya oh.

⁹Atu mah thingku leihpaw kya hae tuh nungde athua vae, tukeiccuze ahoypaw athae thae leipaw thingku miakaw tuh nge thua zah maee lungkhu lang phung athua,” a ci.

¹⁰Ccungccaw zapi nynh Johan kha, “Tuhteze pawmou kae cyih cih?” cite a khia hae.

¹¹Aning nynh minmin kha, “Angki zung ning a hoipaw nynh a hoi leipaw kha pyabua sah, looh a hoipaw nynh tuh-e hawte cyih sah,” a cipya hae.

¹²Ngunto khoi hae paw mah baptisma in lan oun thua hae zah, “Sazae, pawmou kae cyih cih,” cite a khia hae.

¹³Aning nynh, “Khoi lan a khya hae paw laeze alung lante la khoi nan oh,” a cipya hae.

¹⁴Tuhawte rhawkaw hae nynh mah, “Kaening nynh pawmou kae cyih cih,” cite khia hae zah, aning nynh, “Hum ccungccaw kya-e sanmah hurawte la luade nan oh, hum sanmah ahme lei lante seibe nan oh, na mue oh paw amee khate nae lungryachih sah,” a cipya hae.

¹⁵Ccungccaw hae nynh Johan kha ngaehoi hae zah, mih thinlung kyakhe Messiah thua vema, thua khyh vema cite mih balynte a tua lya hae khe,

¹⁶Johan nynh minmin balyn kyakhe, “Kae nynh nanning kha tui te baptisma kae pya oh; thuasalama kae laeze athung huapaw lu kheit yn thua cih, tuh-e paw a phanah rui phoupya lan sanmah kae tuh ka ngaekuh khyh; aning nynh nanning kha Thyaa Muisaw te thuasah, maee te thuasah baptisma ae pya cih oh.

¹⁷A zawnawpaw paraw tuh a kuih kya um zah a huihmin kha thyaapaping lan a cciccae cih, te chanvuih kha a byng lungkhu lang a ruin cih, thuasalama asipaw tuh a chih kho leipaw maee te a soi cih,” a cipya hae.

¹⁸Ccangpaw bya patae te thuihei hae zah thehoypaw kha ccungccaw hae kalan a hopya hae.

¹⁹Thuasalama ram uktu Herod kha a neitaw Filip zu Herodias konglang te Herod nynh a cyipaw hoyleinaw balyn keiccuze Johan nynh a pe,

²⁰Herod nynh a seinaw balyn vawlan khe houh biachih zah Johan kha thong kya a saw.

²¹Ccungccaw hae balyn tuh baptisma a in hae, Jesu mah baptisma inbua zah saw a sang lyakhe vaawlang yn hungkuh zah,

²²Thyaa Muisaw tuh vahu hawte pyn lante yn langkuh zah Jesu tungvaw yn ccuh; vaawlang te roi yn ccae zah, “Nang tuh ka sungsahpaw ka Ccapaw nynh na thua; na tungvaw kya ka lungry accing,” a ci.

²³Jesu nynh a ryalaw a thotakaw lya tuh kum sung thum loukaw acih vae. Ccungccaw hae nynh Josef ccapaw cite a tua hae; Josef tuh Heli ccapaw,

²⁴Heli tuh Matthat ccapaw, Matthat tuh Levi ccapaw, Levi tuh Melkhi ccapaw, Melkhi tuh Jannai ccapaw, Jannai tuh Josef ccapaw,

²⁵Josef tuh Mattathias ccapaw, Mattathias tuh Amos ccapaw, Amos tuh Nahum ccapaw, Nahum tuh Eshli ccapaw, Eshli tuh Naggai ccapaw,

²⁶Naggai tuh Maath ccapaw, Maath tuh Mattathias ccapaw, Mattathias tuh Semein ccapaw, Semein tuh Josek ccapaw, Josek tuh Judah ccapaw,

²⁷Judah tuh Joanan ccapaw, Joanan tuh Rhesa ccapaw, Rhesa tuh Zerubbabel ccapaw, Zerubbabel tuh Shealtiel ccapaw, Shealtiel tuh Neri ccapaw;

²⁸Neri tuh Melkhi ccapaw, Melkhi tuh Addi ccapaw, Addi tuh Kosam ccapaw, Kosam tuh Elmadam ccapaw, Elmadam tuh Er ccapaw,

²⁹Er tuh Joshua ccapaw, Joshua tuh Eliazar ccapaw, Eliazar tuh Jorim ccapaw, Jorim tuh Matthat ccapaw, Matthat tuh Levi ccapaw,

³⁰Levi tuh Simeon ccapaw, Simeon tuh Judah ccapaw, Judah tuh Josef ccapaw, Josef tuh Jonam ccapaw, Jonam tuh Eliakim ccapaw,

³¹Eliakim tuh Melea ccapaw, Melea tuh Menan ccapaw, Menan tuh Mattatha ccapaw, Mattatha tuh Nathan ccapaw, Nathan tuh David ccapaw,

³²David tuh Jessi ccapaw, Jessi tuh Obed ccapaw, Obed tuh Boaz ccapaw, Boaz tuh Salmon ccapaw, Salmon tuh Nahshon ccapaw;

³³Nahshon tuh Amminadab ccapaw, Amminadab tuh Admin ccapaw, Admin tuh Arni ccapaw, Arni tuh Hezron ccapaw, Hezron tuh Perez ccapaw, Parez tuh Judah ccapaw,

³⁴Judah tuh Jakob ccapaw, Jakob tuh Isak ccapaw, Isak tuh Abraham ccapaw, Abraham tuh Terah ccapaw, Terah tuh Nahor ccapaw,

³⁵Nahor tuh Serug ccapaw, Serug tuh Reu ccapaw, Reu tuh Peleg ccapaw, Peleg tuh Eber ccapaw, Eber tuh Shelah ccapaw,

³⁶Shelah tuh Kainan ccapaw, Kainan tuh Arphasad ccapaw, Arphasad tuh Shem ccapaw, Shem tuh Noah ccapaw, Noah tuh Lamek ccapaw,

³⁷Lamek tuh Methuselah ccapaw, Methuselah tuh Enok ccapaw, Enok tuh Jared ccapaw, Jared tuh Mahalaleel ccapaw, Mahalaleel tuh Kainan ccapaw,

³⁸Kainan tuh Enos ccapaw, Enos tuh Seth ccapaw, Seth tuh Adam ccapaw, Adam tuh Pachia ccapaw nynh thua.