Read Zotung Chin LUKA 4 Bible Online

LUKA 4 - Zotung Chin bible

LUKA 4

¹Jesu tuh Thyaa Muisaw te beih zah Jordan vaw kyate a ki, te Muisaw nynh ramkaw langkhe a cciakhae.

²Nin sung pali cia Satan nynh a tuhou. Tuh ccyh lya balyn tuh pawpaw mah ae khyh, tuh-e ccyh he athang tuh a vue myarya law.

³Satan nynh Jesu kha, “Pachia Ccapaw na thua lanze e lung hynh sanlou lang a tang nawlan kawpya tua,” a cipya.

⁴Jesu nynh, “ ‘Ccungccaw tuh looh kyalya te hiin khyh,’ cite Ccathyaa kya azeikuh,” a cipya.

⁵Satan nynh Jesu kha ahangnaw lang cciakhae zah sosoh kya laephi peenaw hae balyn kha a muihsah.

⁶Satan nynh Jesu kha, “E kawhoinaw balyn te mih phu-enaw hynh kae pya cih; e hynh kamaw kalan pya athua vae keiccuze ka pya rypaw ccungccaw kha ka pya.

⁷Kae hynh nae beik lanze hynh-e hae balyn tuh na kya-e athua cih,” a cipya.

⁸Jesu nynh, “ ‘Bawipaw na Pachia kha na beik cih zah, amaw kyalya kha rya na lawpah cih,’ cite Ccathyaa kya azeikuh,” a cipya.

⁹Te Satan nynh Jesu kha Jerusalem lang cciakhae zah beikinn adungparyh kya nung zah, “Pachia Ccapaw na thua lanze hein kyate toiku tua.

¹⁰Pawccecize Ccathyaa kyaze, ‘Nang kha thungkhaw khylan Pachia nynh a vaaw hae kha a naw cih hae,

¹¹na ccu kha lung kya na thuhku khyh nawlan minmin nynh mih kuih te ae dua cih hae,’ cite azeikuh,” a cipya.

¹²Jesu nynh, “ ‘Bawipaw na Pachia kha la syntawtua nan,’ cite Ccathyaa nynh a ho,” a cipya.

¹³Satan nynh tuhounaw miakaw kha he a thangsah te, ccyhhoy a mue makhia Jesu kha sosoh a cciataw.

¹⁴Jesu tuh Muisaw thungnaw te beih zah Galilee lang a ki, tuin ram pepan balyn amaw the tuh po azeihkuh.

¹⁵Jesu nynh sinakok hae kyakhe ccangpah hae zah ccungccaw miakaw nynh a thehoysah hae.

¹⁶Jesu tuh a lethungnaw Nazareth khua thua zah, a cyimae hawte sabbath nin kya sinakok lang a cceih. Ccathyaa ria lan thadyn zah,

¹⁷profeh Isaiah ccakue kha amaw kalan a pya hae. Jesu nynh ccakue kha daw zah a muihpaw Ccathyaa tuh:

¹⁸“Bawipaw Muisaw tuh ka tungvaw a um, pawccecize ryachi hae kalan thehoypaw ho khylan kae kha chitui yn thuh vae; ccungccaw hae nynh a kyng hae paw kalan luenaw kong hopya khylan te mitmoh hae kha ngawmuihnaw kong hopya khylan, tuaasahnaw a teing hae paw kha luesah khylan,

¹⁹Bawipaw thawccinaw ccyh kha hopya khylan kae hynh yn saw vae,” acikuh.

²⁰Jesu nynh ccakue kha kue zah a ccytupaw kha a pya koute a haung. Sinakok kya um hae paw balyn nynh Jesu kha mih mitvoh leite a do hae.

²¹Jesu nynh minmin kha, “E Ccathyaa tuh na thae oh hawte atunin accing vae,” a cipya hae.

²²Ccungccaw balyn nynh a thehoy ho hae zah a munglae kyate a poupaw thawccinaw bya kha mih ngaeangthua. Minmin nynh, “E paw hynh Josef ccapaw thua khyh tou?” a ci hae.

²³Jesu nynh minmin kha, “Nanning nynh, ‘Sibawipaw, namaw te namaw kha dansaku tua! Kapernaum khua kya na cyipaw kae thae hawkhate hynh-e namaw khua kya mah cyitua,’ cite e phungtangbya hynh ka kalan nae ho ccaccing cih oh,” a cipya hae.

²⁴Jesu nynh, “Byaccaccing kae hopya oh, profeh hum sanmah amaw khua kya tuh maehoynaw mue boi khyh.

²⁵Thuasalama thanccingte kae hopya oh, Elijah ccyh lya kum thum te sah taruh cia vaawlang thuakaw khaw thua zah loram balyn kya myarya ccakancci lya, Israel ram kya nomae hae patae a um hae.

²⁶Thuasalama tuh-e hae lu kheit kalan san Elijah kha saw thua khyh, thuasalama Sidon ram e Zarefath khua kya umpaw nomaenung kalan rou nynh saw athua.

²⁷Profeh Elisha ccyh lya Israel ram kya vaethyakaepaw patae a um hae, thuasalama Siria paw Naaman laelan hum sanmah thyaasah thua khyh,” a ci.

²⁸Sinakok kya a um hae paw balyn nynh hynh-e bya hae kha he a thae hae tuh myarya mih thinria.

²⁹Thokuh hae zah Jesu kha khua atolang dee hae zah tuh-e mih khua a umnaw mua adung, chia kalan khe dae tu lan cite a cciakhae hae.

³⁰Thuasalama Jesu tuh mih laku kyate zya pou zah po a cceih.

³¹Galilee ram e Kapernaum khua lang cceihbung zah sabbath nin kya a ccangpya hae.

³²Kawhoinaw te bya a ho keiccuze ccungccaw hae tuh a ccangpyanaw kha mih ngaeangthua.

³³Sinakok kyakhe athyaa leipaw raerangsaro muisaw a bahkuhpaw lu kheit a um. Aning nynh,

³⁴“Kae makhaete kae um sah! Nazareth paw Jesu, nang te kaening pawmou ah sekuh oh? Nang tuh kaening ro khylan tou nae thua? Nang tuh hum nynh na thua cipaw ka ny, Pachia kya-e Athyaapaw nynh na thua!” cite thawte a sia.

³⁵Jesu nynh pe zah, “Yccae nan, khah-e paw lungkhu kyate pou!” a cipya. Raerangsaro nynh tuh-e paw tuh ccungccaw hae malang khe khuliasakuh zah maw muihsah leite a poutaw.

³⁶Ccungccaw hae balyn tuh mih ngaeangthua zah, “E bya hynh pawtecihpaw bya mou! Pawccecize kawhoinaw te thungnaw khate athyaa leipaw muisaw hae kha kawpya zah minmin tuh a pou hae!” cite a hoku hae.

³⁷Jesu kong tuh tuin ram pepan e khua takyh kya pong azeihkuh.

³⁸Jesu tuh sinakok kyate a pou koute Simon inn lang a tee. Simon a zu nung tuh myarya a nge so zah a cci keiccuze minmin nynh a hanlan Jesu kha a ngiapya hae.

³⁹Jesu nynh tuh-e nung pe khe thadyn zah tuh-e ccinaw tuh a dan nawlan kaw he a pya tuh phe a dan. Tuh-e nung nynh vaekheihmawte thokuh zah minmin kha rya a lawpya hae.

⁴⁰Khuanin he ccah tuh ccinaw aphuinphuin te a ccih hae paw ngeccih hae balyn kha Jesu kalan oun cciakhae hae, Jesu nynh ngeccih miakaw tungvaw khe a kuih khang zah a dansah hae.

⁴¹Raerangsaro hae nynh mah, “Nang tuh Pachia Ccapaw nynh na thua!” cite sia hae zah ccungccaw patae kyate a pou hae. Jesu nynh minmin kha pe hae zah byahonaw kaw-ua khyh hae, pawccecize minmin nynh aning tuh Messiah nynh thua cipaw a ny hae.

⁴²Khua he yn dae tuh, Jesu tuh pou zah ramkaw langkhe a cceih. Ccungccaw hae nynh amaw kha ccung hae zah a kya he a thua hae te, minmin kyate a ccia khyh nawlan a kang hae.

⁴³Jesu nynh minmin kha, “Pachia peenaw thehoypaw kha ccangpaw khua hae kalan mah ka ho hahe cih, pawccecize hynh-e khylan nynh kae hynh Pachia nynh yn saw,” a cipya hae.

⁴⁴Tukeiccuze Judea ram e sinakok hae kyakhe phung a ho.