Read Zotung Chin LUKA 5 Bible Online

LUKA 5 - Zotung Chin bible

LUKA 5

¹Nin kheit tuh Genesaret tuili kin kya Jesu a thadyn lyakhe ccungccaw hae nynh Pachia bya ngae khylan amaw kha a lungnuaku hae.

²Tuili kin varang langkhe kohlung ccangning kha a muih; ngasaw kyngtu hae tuh kohlung kyate pou hae zah mih mia hae kha a singkuh hae.

³Jesu tuh kohlung ccangning lakuze Simon kya-e kohlung kalan khe tee zah varang langte takyh nuesaku lan Simon kha a ngia. Te tuh-e kohlung kya haung zah ccungccaw hae kha a ccangpya hae.

⁴Bya a ho koute, Simon kha, “Tui akhunaw lang nue lah, ngasaw kyng khylan nae mia hae kha vuatua oh,” a cipya.

⁵Simon nynh, “Bawipaw, khuazi zidae kae vua zah ccangkheit san kae kyng khyh; thuasalama na bya thyhte mia ka vua cih,” a cipya.

⁶Minmin nynh tuhte mia kha he a vua hae tuh myarya alungpaw ngasaw hae kha bong hae zah mih mia tuh vyavya a pae vae.

⁷Minmin nynh ccangpaw kohlung kya um hae paw mia a vuakheih hae paw kha oun ccianua hae sah lah oun bawm hae sah cite mih kuih te a ko hae. Tuh-e hae tuh oun thua hae zah kohlung ccangning te tui kaw lang vyavya ccah lan ngasaw kha phe a bia hae.

⁸Simon Peter nynh tuh-e tuh he a muih te, Jesu ccukharu kyakhe bakhung zah, “Bawipaw, kae tuh misei nynh ka thua, beih yn cciataw!” a cipya.

⁹Pawccecize Simon te a umkheih hae paw balyn tuh a kyng hae paw ngasaw hae keiccuze mih ngaeangthua.

¹⁰Simon ryte a mungkuh hae paw Zebedi ccapaw hae James te Johan mah mih ngaeangthua. Jesu nynh Simon kha, “Rih nan, atu tetuh ccungccaw a kyngpaw lang na tang vae cih,” a cipya.

¹¹Mih kohlung hae kha varang lang nung hae zah, pawpaw balyn kha cciatawte Jesu kha a zui hae.

¹²Vaekheihlya Jesu tuh khua khuakheit kya a um lyakhe vaethya ccinaw te phe a beihpaw lu kheit nynh Jesu kha he a muih tuh laekhu kya bakhung zah, “Bawipaw, na ry lan thua ze, kae hynh nae thyaasah kho,” cite a ngiaku.

¹³Jesu nynh a kuih dyng zah tuh-e paw tuh hae zah, “Ka ry, thyaa ccavae,” a cipya. Vaekheihmawte a vaethya ccinaw tuh athyaa vae.

¹⁴Jesu nynh, “E kong hynh hum ccungccaw san la hopah nan, thuasalama la cceih lah ranpibawi kha la muihsakuh; na thyaa vae keiccuze mih malang khe ccaekia lang Moses kawbya thyhawte silawkunaw kha la rae,” cite bya a tawsya.

¹⁵Jesu the tuh houhouh thaan zah ccungccaw zapi nynh a bya thae khylan te mih ccinaw kyate dan khylan oun sueluakuh hae.

¹⁶Jesu tuh ramkaw langkhe cceih zah saw leih a sang.

¹⁷Nin kheit tuh Jesu nynh a ccangpya lya hae khe Jerusalem te Judea pee te Galilee pee e khua hae balyn kyate oun thua hae paw Farasi hae te kawbya sazae hae tuh a haungbua hae; ngeccih dansah nawlan Bawipaw huhan tuh Jesu kya a um.

¹⁸Abang ccungccaw hae nynh a kuihccu chihpaw kha inawpaw te oun puih hae zah Jesu malang nung khylan teekhae lan a zuaku hae.

¹⁹Ccungccaw zapi keiccuze teekhaenaw laanpi muih khyh hae, tukeiccuze innccukaly lang kaekhae hae zah innccukaly kha kia hae zah ngeccih kha inawpaw ryte ccungccaw hae laku lang Jesu malang khe a sawbung hae.

²⁰Jesu nynh mih zynnaw kha he a muih tuh, ngeccihpaw kha, “Ka ban, na seinaw tuh ngaethya athua vae,” a cipya.

²¹Kawbya sazae hae te Farasi hae nynh, “Pachia saryapaw bya a hopaw e paw tuh hummou? Pachia lu kheit laelan hummou seinaw a ngaethya kho?” cite a hoku hae.

²²Jesu nynh mih tuanaw kha nyh zah minmin kyakhe, “Nae thinlung kya pawccemou tuhte na tua oh?

²³‘Na seinaw tuh ngaethya athua vae,’ cipya tou azoihua, tuhkhyhze, ‘Thokuh lah cceih,’ cipya tou azoihua?

²⁴Thuasalama Ccungccaw Ccapaw tuh laephi vawlan seinaw ngaethya lan kaw a hoi cipaw na ny nawlan oh,” cipah hae zah, kuihccu chihpaw kha, “Nang kae hopya, thokuh lah na iphae kha lawkuh lah na inn lang cceih ccavae,” a cipya.

²⁵Tuh-e paw tuh mih malang khe vaekheihmawte thokuh zah a inawpaw kha lawkuh zah Pachia kha phu-esah te a inn lang a cceih.

²⁶Ccungccaw hae balyn tuh mih ngaeangthua zah rinaw te phe beih hae zah, “Atunin ngaeang lan umpaw uccaw kha ah muih vae oh,” ci hae zah Pachia kha a phu-esah hae.

²⁷Tukoute Jesu tuh cceih zah ngunto khoinaw kya a haungpaw, ngunto khoitupaw Levi a ci hae paw kha a muih; Jesu nynh, “Kamaw yn zui,” a cipya.

²⁸Aning nynh thokuh zah pawpaw balyn kha cciatawte Jesu kha a zui.

²⁹Levi nynh a inn kya Jesu elang poi pi a tuapya; tuin kya ngunto khoitu hae patae te mingccang hae um hae zah, Jesu te zuitu hae ryte aepaw a koihkheih hae.

³⁰Kawbya sazae hae te Farasi hae nynh a zuitu hae kha, “Pawccemou ngunto khoitu hae te misei hae ryte na aekheih oh zah na niakheih oh?” cite a seisah hae.

³¹Jesu nynh, “A dan hae paw nynh sibawi peki khyh hae; a ccih hae paw nynh a peki hae.

³²Kae tuh miding hae ko khylan kae thua khyh, misei hae nynh a ngaesiku ccaw hae cite nynh kae thua,” a cipya hae.

³³Minmin nynh Jesu kha, “Johan zuitu hae te Farasi hae zuitu hae tuh atu te atu looh-ae sung hae zah saw leih a sang hae, thuasalama nang na zuitu hae tuh pawccemou a ae a nia hae?” cite a khia hae.

³⁴Jesu nynh, “Zudy ccangvaepaw tuh zudy poi oun too hae paw kya a umbua lungkhu tuh tuh-e hae tuh looh-ae a sung cih hae zawtou?

³⁵Thuasalama zudy ccangvaepaw kha minmin kyate lawpya ccyh yn thua cih, tuin ccyh vae tuh looh-ae oun sung vae cih hae,” a cipya hae.

³⁶Minmin kha tousenaw phungpaw ccangkheit a hopya hae: “Hum nynh sanmah uccaw athawpaw kha awnua zah uccaw arynpaw kha bianah boi khyh, tuhte a bia lanze uccaw athawpaw tuh aseiikuh cih, bianawpaw athawpaw tuh uccaw arynpaw te ccawkuhthya khyh.

³⁷Hum nynh sanmah misutui athawpaw kha arynpaw misutui-saphuabawng kya ruin boi khyh, tuhte a ruin lanze misutui athawpaw nynh misutui-saphuabawng kha phae pawsah cih zah misutui pong azu cih, te misutui-saphuabawng mah aroh cih.

³⁸Misutui athawpaw tuh athawpaw misutui-saphuabawng kalan ruin lanpaw nynh thua, te nynh parouhte akhyn hae.

³⁹Hum nynh sanmah arynpaw misutui kha a neih koute athawpaw misutui kha neih ry vae khyh, pawccecize, ‘Arynpaw misutui tuh athuahua,’ a ci,” cite a hopya hae.