Read Zotung Chin LUKA 6 Bible Online

LUKA 6 - Zotung Chin bible

LUKA 6

¹Sabbath nin kya Jesu tuh loo kya po cceih zah, a zuitu hae nynh looh avui kha zukuh hae zah mih kuih te noi hae zah a ae hae.

²Farasi hae abang nynh minmin kha, “Sabbath nin kya kawbya nynh cyi lan a ua leipaw kha pawccemou na cyi oh?” a cipya hae.

³Jesu nynh, “David nynh a vuelaw lya amaw te a umkheih hae paw ryte a cyi hae paw kha na ria boi khyh oh tou?

⁴Pachia inn lungkhu lang tee zah kawbya nynh ranpibawi laelan humhung mah ae lan a ua leipaw Nungpyapaw sanlou kha ae zah amaw ryte a umkheih hae paw kha mah a pyabua hae,” cite a khung hae.

⁵Jesu nynh minmin kha, “Ccungccaw Ccapaw tuh sabbath Bawipaw nynh thua,” a cipya hae.

⁶Ccangpaw sabbath nin kya Jesu tuh sinakok lungkhu lang tee zah a ccangpya hae, tuin kya a ranglang kuih achihpaw lu kheit a um.

⁷Kawbya sazae hae te Farasi hae nynh Jesu tungvaw seibenaw ccungpya khylan sabbath nin kya ccinaw yn dansah ta, cite a dokhaw hae.

⁸Thuasalama Jesu nynh mih tuanaw kha nyh zah a kuih achihpaw ccungccapaw kha, “Yn cceih lah hein kya thadyn,” a cipya. Aning tuh thokuh zah tuin kya a thadyn.

⁹Jesu nynh minmin kha, “Bya kae khiatua oh sah: Sabbath nin kya ahoypaw cyi lan kawbya nynh a ua tou? Tuhkhyhze ahoy leipaw cyi lan tou a ua? Hiinnaw kha so khum lan a ua tou? Tuhkhyhze chia lan tou a ua?” cite a khia hae.

¹⁰Minmin balyn kha pong do hae zah, Jesu nynh tuh-e paw tuh, “Na kuih kha dyngtua,” a cipya. Aning nynh a kuih kha dyng zah voikheit lang hawte phe ahoy vae.

¹¹Minmin tuh myarya mih thinria zah Jesu kha pawtemou cyi lan cipaw a hoku hae.

¹²Tuh ccyh lyakhe Jesu tuh sawsang lan mua lang cceih zah Pachia kalan zidae saw a sang.

¹³Khua adae te a zuitu hae kha ko hae zah, lu haw lae ning kha a po hae, minmin kha locceihtu hae cite min a phu hae.

¹⁴Tuh-e hae tuh: Peter cite min a phupaw Simon te a neitaw Andru, James te Johan, Filip te Bartholomew,

¹⁵Matthai te Thomas, Alfeas ccapaw James te Zealot a ci hae paw Simon,

¹⁶James ccapaw Judas te Bawipaw a pheetupaw Judas Iskariot nynh thua hae.

¹⁷Jesu tuh minmin ryte mua kyate rungbung hae zah bialae khe a thadyn; amaw te a zui hae paw patae, Judea pee balyn kyate, Jerusalem kyate, rili kin umpaw Tair khua te Sidon khua kyate ccungccaw patae tuh tuin kya oun thua hae.

¹⁸Minmin tuh Jesu bya ngae khylan te mih ccinaw dan khylan oun cceih hae; athyaa leipaw muisaw hae nynh vawsaw a pya hae paw kha a dansah hae.

¹⁹Ccungccaw zapi balyn nynh Jesu kha hae lan a zuaku hae, pawccecize amaw kyate huhan pou zah ccungccaw balyn tuh a dan hae.

²⁰Jesu nynh a zuitu hae kha do hae zah: “Ryachi hae paw nanning tuh lungtuapaw nynh na thua oh, pawccecize Pachia peenaw tuh nae kya-e nynh thua.

²¹Atu lya vuelaw hae paw nanning tuh lungtuapaw nynh na thua oh, pawccecize nae vue aso cih. Atu a rah hae paw nanning tuh lungtuapaw nynh na thua oh, pawccecize nae nuin cih oh.

²²“Ccungccaw Ccapaw keiccuze ccungccaw hae nynh ae hua oh ze thuasah, mih kyate ae phia oh ze thuasah, sarisarya ae nung oh ze thuasah, nae the ae thyasah vae oh ze thuasah nanning tuh lungtuapaw nynh na thua oh.

²³Tuin nin kya nae lungtua sah lah lungpawte thohkuh oh! Pawccecize vaawlang khua kya nae ryalaw mee tuh ale ccaccing; pawccecize mih minpaaw hae nynh mah profeh hae kha tuh-e hawte nynh a la cyi hae.

²⁴“Thuasalama mihoi hae, nanning hanlan ngaethya lan kou um! Pawccecize nanning tuh naemaw kya-e hiin hoynaw kha phe na mue vae oh.

²⁵Atu lya vueso hae paw nanning, nae hanlan ngaethya lan kou um! Pawccecize nae vuelaw cih. Atu lya a nuin hae paw nanning, nae hanlan ngaethya lan kou um! Pawccecize nae rah nae khui cih oh.

²⁶“Ccungccaw hae balyn nynh thehoy ae ho vae oh ze, nae hanlan ngaethya lan kou um! Pawccecize mih minpaaw hae nynh lingthya profeh hae kha tuhcite nynh a la cyi hae.

²⁷“Thuasalama ka bya a thae hae paw kae hopya oh, nae rhaw hae kha sungsah oh, nanning ae hua oh paw tungvaw kya hoynaw la rae oh.

²⁸Nanning thya ae law oh paw kha hythuanaw la pya oh, nanning ae sarya oh paw kha saw la sangpah oh.

²⁹Lukhakheit nynh na byaki ae bia ze, voihawlang kha mah la tuapakuh; lukhakheit nynh na angkile ae lawpyaku ze na angki kha mah la kang nan.

³⁰Nang ae ngiakuhpaw ccungccaw miakaw kha la pya; lukhakheit nynh na uccaw ae lawpyaku ze, la ngiathui nan vae.

³¹Nae tungvaw kya cyih hae sah cite na ry oh hawte ming hae tungvaw kya la cyih oh.

³²“Ae sungsah oh paw kyalya kha na sungsahru oh ze, pawtemou thanenaw tuh na mue cih oh? Misei hae nynh heize mimaw a sungsah hae paw kha a sungsahru hae khaw.

³³Nae tungvaw hoynaw a rae hae paw tungvaw kyalya hoynaw na raeru oh ze, pawtemou thanenaw tuh na mue cih oh? Misei hae nynh heize tuh-e hawte a cyi hae khaw.

³⁴Bua yn pyaru cih cite na ngaehoi oh paw ccungccaw hae kyalya kha na koiisaku oh ze, pawtemou thanenaw tuh na mue cih oh? Misei hae nynh heize patae bua mueru lan cite misei hae kha a koiisaku hae khaw.

³⁵Nae rhaw hae kha sungsah oh lah, hoynaw raepah oh, pawpaw sanmah ngaehoi leite koiisakuh oh; te nae ryalaw mee tuh myarya ale cih zah Ahang Huaccepaw Pachia ccaaw hae na thua cih oh. Pawccecize Pachia tuh lungtuabya ho lan a nyhthya leipaw te ccungccaw hoylei hae tungvaw kya thawccinaw a hoipaw nynh thua.

³⁶Tukeiccuze nae Paaw nynh ngaethyaumsahnaw a hoi hawte nanning mah ngaethyaumsahnaw hoi oh.

³⁷“Ming hae kha byapia nan oh lah, naemaw kha byapia na thua lan khyh oh; ming hae kha seibe nan oh lah, naemaw kha seibe na thua lan khyh oh; ming hae seinaw kha ngaethya oh lah nae seinaw kha ngaethya athuaru cih.

³⁸Ming hae kha pyabua oh lah, naemaw kha pyaru na thua cih oh; dydepyate, ryhpya biate, paepae leikuh lan nae by phe thua lan ae pyaru cih oh. Pawccecize na tounaw oh paw tounawpaw te naemaw kha toupya ru na thua cih oh,” a cipya hae.

³⁹Jesu nynh tousenaw phungpaw kha mah a hopya hae: “Mitmohpaw nynh mitmohpaw kha a cciakhae kho cih tou? Parouh mawte hunghua lungkhu lang ccah lan khyh hae tou?

⁴⁰Siaimua tuh a sazae laeze thyahua khyh, thuasalama phe ccing lan ccangpya athuapaw siaimua miakaw tuh a sazae hawte athua cih.

⁴¹Namaw mit lungkhu umpaw thingthyh kha tuaku leite pawccemou na uno mit lungkhu umpaw athupaw taraw kha na dopya?

⁴²Na mit kya umpaw thingthyh kha muihku leite, pawccemou na unopaw kha, ‘Ka ban, na mit lungkhu e athupaw taraw kha kae la khoipah,’ cite na hopya ngan? Pou thyaruhpaw, namaw mit lungkhu e thingthyh kha khoikuh ty lah te na unopaw mit lungkhu e athupaw taraw kha khoipya khylan ccaerarih lan na muihthya cih.

⁴³“Thingku hoypaw nynh thingthae hoyleipaw kha thae boi khyh, thingku hoyleipaw nynh mah thingthae hoypaw kha thae boi khyh.

⁴⁴Thingku miakaw tuh athae te ny kho athua. Hinpaw ku kyate thaeku thae kha lo boi khyh hae, taty ku kyate mah misu thae kha lo boi khyh hae.

⁴⁵Ccungccaw hoypaw nynh a thinlung kya umpaw sisua bawng kya-e ahoypaw kha a pousah, ccungccaw hoyleipaw nynh a thinlung kya umpaw ahoy leipaw sisua bawng kya-e ahoy leipaw kha a pousah; pawccecize thinlung kya phe abeihpaw kha mung nynh a ho.

⁴⁶“Ka hopaw kha na cyih lei oh pite, pawccemou ‘Bawipaw, Bawipaw,’ cite nae ko oh?

⁴⁷Humhung zemah ka kalan yn cceih zah ka bya kha thae zah a cyihpaw tuh hum te mou aloku cipaw kae muihsah cih oh:

⁴⁸Aning tuh phe khutheih lan tungkhu ccou zah lung vawlan tung bing zah inn a sakpaw te nynh aloku; tuileih tho zah tui nynh tuh-e inn tuh thawte asoh zemah hy khyh, pawccecize lung vawlan abingku keiccu nynh thua.

⁴⁹Thuasalama ka bya kha thae zah a zui leipaw tuh tung bing leite laephi vawlan inn sakpaw hawte nynh aloku; tuh-e tuh tui nynh thawte he asoh tuh vaekheihmawte phe apu, te tuh-e inn tuh khaleih aroh,” a ci.