Read Zotung Chin LUKA 7 Bible Online

LUKA 7 - Zotung Chin bible

LUKA 7

¹Jesu nynh ccungccaw hae thaenaw kya bya a hopaw balyn kha he a thangsah koute Kapernaum khua lungkhu lang a tee.

²Tuin khua kya-e rhawbawipaw a seepaw tuh ccih zah vyavya a chih, aning tuh a bawipaw nynh kou a sungsahpaw nynh thua.

³Rhawbawipaw nynh Jesu kong kha he a thae te, a seepaw kha ccianuate a dansah nawlan ngia khylan Judah piccan hae kha amaw kalan a saw hae.

⁴Minmin nynh Jesu kalan he thua hae te, “Aning tuh bawm lan accanpaw nynh thua.

⁵Pawccecize aning tuh kae minphuin hynh sungsah zah kaening elang sinakok oun sakpahpaw nynh thua,” cite Jesu kha thawte a ngia hae.

⁶Jesu tuh minmin ryte a cceihbua. Inn kyate asaw leinaw kya he a thua tuh rhawbawipaw nynh a ban hae kha Jesu kalan saw hae zah, “Bawipaw, vawsaw pyakuh nan; pawccecize nang nynh ka inn lang tee lante kae tuh ka ngaekuh khyh;

⁷tuhawte kamaw mah na kalan ccia lan ka ngaekuh cite ka tuakuh khyh, bya te kyalya kawpya lah ka ryalahtupaw tuh a dan cih.

⁸Pawccecize kae mah kawhoinaw zakaw a umpaw nynh ka thua, ka kuihkaw rhawkaw hae ka hoi zah lu kheit kha, ‘Cceih,’ ka ci ze a cceih; ccangpaw lu kheit kha, ‘Rang,’ ka ci ze yn thua; ka see kha, ‘E hynh cyih,’ ka ci ze a cyih,” cite a hosahpya hae.

⁹Tuh-e bya tuh Jesu nynh he a thae te, a ngaeangthua zah nulang maeleihkuh zah amaw a zui hae paw ccungccaw hae kha, “Nanning kae hopya oh, hynhcihawpaw zynnaw hynh Israel hae kya heize ka muih boi khyh,” a cipya hae.

¹⁰Rhawbawipaw nynh yn saw hae paw tuh inn lang ki hae zah a seepaw tuh a dan vae paw kha a muih hae.

¹¹Tukoute aro mawze Jesu tuh Nain a ci hae paw khua lang cceih zah a zuitu hae te ccungccaw patae nynh a zui hae.

¹²Jesu tuh khua koikua pe he a thua tuh, achihpaw lu kheit kha oun puih hae. Tuh-e michi tuh nomaenung ccapaw, lu kheit kyalyapaw nynh thua; khuaccaaw hae patae tuh nomaenung ryte oun cceih hae.

¹³Bawipaw nynh tuh-e nomaenung kha he a muih tuh ngaethyaumsah zah, “Rah nan,” a cipya.

¹⁴Jesu nynh ccianua zah taang kha hae zah a puih hae paw tuh a thadyn hae. Jesu nynh, “Ccangvaepaw, kae hopya, thokuh!” a ci.

¹⁵Achihpaw ccungccapaw tuh haung zah bya yn ho vae. Jesu nynh tuh-e paw tuh a nung kalan a pya.

¹⁶Mih balynte mih rikawthua zah Pachia kha the a hoysah hae. Abang nynh, “Aening laku alesaepaw profeh nynh yn langkuh vae! Pachia nynh a ccungccaw hae kha a bawm vae hae!” a ci hae.

¹⁷Jesu the tuh Judea ram te a pepan e ram hae balyn kya po azeihkuh.

¹⁸Tuh-e konglang balyn tuh Johan zuitu hae nynh Johan kha a hopya hae. Tukeiccuze Johan nynh a zuitu hae lu ning kha ko hae zah

¹⁹Jesu kalan saw hae zah, “Nang hynh yn thua cih paw tuh na thua tou? Tuhkhyhze mingccangpaw tou kae ngaw ung cih?” cite a khiasah hae.

²⁰Tuh-e ccungccaw hae nynh Jesu kalan he a thua hae te, “Baptisma pyatu Johan nynh kaening hynh na kalan oun saw zah, ‘Nang hynh yn thua cih paw tuh na thua tou? Tuhkhyhze mingccangpaw tou kae la ngaw ung cih,’ cite bya oun khiasah,” a cipya hae.

²¹Tuh ccyh lyakhe Jesu nynh ccungccaw patae kha mih ccinaw aphuinphuin kyate thuasah, ahoy leipaw muisaw hae kyate thuasah dansah hae zah, mitmoh hae patae kha ngaw a muihsah hae.

²²Jesu nynh minmin kha, “La cceih oh lah na muih oh paw te na thae oh paw kha Johan la hopah oh: Mitmoh hae nynh ngawmuih hae zah ccukhou hae nynh a cceih kho vae hae, vaethyakae hae paw a dan hae, nawpan hae nynh nawthae hae zah michi hae tuh thoosah athua hae, ryachi hae kalan thehoypaw tuh hopya athua.

²³Kae ka keiccuze a lungroh leipaw ccungccaw tuh lungtuapaw nynh thua,” a cipya hae.

²⁴Johan nynh a saw hae paw he a cceih hae te, Jesu nynh Johan konglang kha ccungccaw zapi kya hynhte a ho: “Nanning nynh paw do khylan mou ramkaw langkhe na ccia oh? Khisan nynh a hepaw phaeku do khylan tou?

²⁵Tuhkhyhze paw do khylan mou na ccia oh? Nebaleihpaw boeining a lawkuhpaw ccungccapaw do khylan tou? Dotua oh, lyccaccu lan uccaw lawkuh hae zah hiinhoyte um hae paw tuh siapharan inn kya nynh a um hae.

²⁶Paw do khylan mou na ccia oh? Profeh lu kheit do khylan tou? Athua, kae hopya oh, profeh lu kheit lae heize alesae huapaw nynh thua.

²⁷Ccathyaa kya, ‘Dotua, na laanpi a paccyn cih paw ka zeccuetu kha na malang ka saw cih,’ cite azeikuhpaw kha tuh-e paw tuh nynh a honuathepaw athua.

²⁸Pawccecize kae hopya oh, nopi hae nynh a saah hae paw ccungccaw hae kyaze Baptisma pyatu Johan laeze alesae huapaw lu kheit san um khyh; thuasalama Pachia peenaw kya adih huapaw ccungccaw tuh aning laeze a lesaehua,” a ci.

²⁹(Tuh-e bya tuh ccungccaw hae balyn nynh a thae hae, minmin te ngunto khoitu hae tuh Pachia dingnaw a pom hae paw te Johan kya-e baptisma a in hae paw nynh athua hae.

³⁰Thuasalama Farasi hae te kawbya thya hae paw tuh Pachia paccynnaw kha vua hae zah Johan kya-e baptisma kha in khyh hae.)

³¹Jesu nynh, “Atu she e ccungccaw hae hynh pawtemou ka touse cih hae? Minmin hynh pawtemou aloku hae?

³²Minmin tuh kungkunaw kya haung hae zah, ‘Phyly kae tupah oh zah na law khyh oh, michi hlaw kae sahpah oh zahmah na rah khyh oh rei,’ cite mimaw te mimaw a hokuh hae paw imua hae te nynh aloku hae.

³³Pawccecize Baptisma pyatu Johan tuh sanlou mah ae leite misutui mah nia leite yn thua zah nanning nynh, ‘Aning tuh raerangsaro bahkuhpaw nynh thua,’ na ci oh.

³⁴Ccungccaw Ccapaw tuh aete niate yn thua zah nanning nynh, ‘Dotua oh, aemohpaw te misuripaw khuh! Misei hae te ngunto khoitu hae banpaw khuh!’ na ci oh.

³⁵Thuasalama hawnaw tuh amaw a ccaaw hae balyn nynh a langsaku hae,” a ci.

³⁶Farasipaw lu kheit nynh zerya mangkheih lan Jesu kha a ko. Jesu tuh Farasipaw inn lang cceih zah ae lan a haung.

³⁷Tuin khua kya umpaw miseinung nynh Farasipaw inn kya ae lan Jesu a haung cipaw kha he a nyh tuh alabasta lung rawpaw te zimuin bawng kheit kha ccyng zah,

³⁸Jesu nulang a cculeihpaw khe thadyn zah a rah, te a ccu kha a mitphi te ciasah zah a lu kya-e a sang te a hupya, a ccu kha myng zah chitui a thuh.

³⁹Looh a kopahpaw Farasipaw nynh tuh-e tuh he a muih tuh, “E Ccungccapaw hynh profeh athua lanze amaw a haenung nopinung hynh hum nynh thua cipaw te pawcihawpaw nopi cipaw kha a nyh cih; pawccecize e nung tuh miseinung nynh thua,” cite a lungkaw te a tua.

⁴⁰Jesu nynh, “Simon, kae hopya rypaw ccangkheit a um,” a cipya. Simon nynh, “Sazae, ho ccaleih,” a cipya.

⁴¹Jesu nynh, “Phuasawtupaw lu kheit la um zah a laebah umtu hae lu ning a um hae; lukheitpaw nynh denari phua za pangaw laebah um zah mingccangpaw tuh sung pangaw laebah a um.

⁴²Minmin nynh a sang kho khyh hae keiccuze parouh mawte a ngaethya hae. Tukeiccuze yn hopya tua, tuh-e lu ning hae kyaze hum nynh mou phuasawtupaw kha a sungsahua cih?” cite a khia.

⁴³Simon nynh, “Laebah alunghua a ngaethyapaw kha nynh athua cih cite ka tua,” a ci. Jesu nynh, “Phe na kyh,” a cipya.

⁴⁴Jesu nynh nopinung kalan maeleihkuh zah Simon kha, “E nopinung hynh na muih tou? Kae tuh na inn lungkhu lang ka tee zah ka ccu singkunaw lanpaw tui nae pya khyh, thuasalama e nung nynh ka ccu hynh a mitphi te yn singpah zah a sang te yn hupya vae.

⁴⁵Nang tuh kae hynh nae myng khyh, thuasalama e nung tuh inn lungkhu lang ka tee takaw te ka ccu hynh apaekuh lei lan po a myng.

⁴⁶Nang tuh ka lu hynh chitui nae thuh khyh, thuasalama e nung nynh ka ccu hynh zimuin te phe yn thuhpya.

⁴⁷Tukeiccuze kae hopya, e nung a seinaw patae kha ngaethya athua vae keiccuze aning nynh sungsahnaw patae kha a langsaku; thuasalama seinaw beihtaraw ngaethya athuapaw nynh tuh sungsahnaw ditaraw rou nynh a langsaku,” a cipya.

⁴⁸Jesu nynh tuh-e nung kha, “Na seinaw hae tuh ngaethya athua vae,” a cipya.

⁴⁹Amaw ryte looh a koihkheih hae paw nynh, “Seinaw a ngaethyatupaw hynh hum vema?” cite a hoku hae.

⁵⁰Jesu nynh nopinung kha, “Na zynnaw nynh phe ae khum vae, ngaengante la cceih ccavae,” a cipya.