Read Zotung Chin LUKA 8 Bible Online

LUKA 8 - Zotung Chin bible

LUKA 8

¹Tukoute Jesu tuh Pachia peenaw kong thehoypaw kha hote khuapi te khua taraw hae kalan khua a ccong. Zuitu hae lu haw lae ning tuh amaw kya a mungkuh bua hae.

²Ahoy leipaw muisaw bahkunaw te ccihawnaw kyate a dan hae paw nopi hae abang mah a cceihbua hae: raerangsaro hae lu sari a depyapaw Magdalin a ci hae paw Mary,

³Herod kya-e synriatu Khuza a zu Joanna, Susanna te mih sisua hae khate Jesu te a zuitu hae a bawmtu ccangpaw nopi hae patae a umbua hae.

⁴Ccungccaw patae tuh khua takyh kyate Jesu kalan oun thua hae zah he sueluakuh hae tuh Jesu nynh tousenaw phungpaw ccangkheit a hopya hae. A hopaw tuh:

⁵“Ccacii vuatu lu kheit tuh a ccacii vua lan a cceih; ccacii kha vua zah abang tuh laanpi kin ccah zah ccu te syde thua zah vaawlang e pavaw hae nynh pong a tuh hae.

⁶Abang tuh lung vawlan ccah zah ccahe a po takaw mawte laedahpaw a um khyh keiccu karae arou.

⁷Abang tuh hinpaw hae laku ccah zah hinpaw hae ryte a pokheih hae, te hinpaw hae nynh lethin hae zah phang a lungde hae.

⁸Abang tuh lae hoy kya ccah zah a po, te leit za kheit athae a thae,” a ci. E kong he a ho koute, “Thaenaw nakaring a hoipaw miakaw tuh thae sah!” cite a sia.

⁹A zuitu hae nynh, “E tousenaw phungpaw asuilan tuh pawmou?” cite Jesu kha a khia hae.

¹⁰Jesu nynh, “Pachia peenaw kya-e byakhupaw kha ny lan pya na thua oh; thuasalama mingccang hae tuh, ‘mang muih hae zah nyh khyh hae, mang thae hae zah thaethya khyh hae,’ tukeiccuze tousenaw phungpaw te hopya athua.

¹¹“Tousenaw phungpaw tuh hynhte nynh thua: Ccacii tuh Pachia bya nynh thua.

¹²Laanpi kin a ccah hae paw tuh, Pachia bya a thaetu hae nynh thua; minmin nynh a zyn khyh nawlan hae te khumnaw a mue khyh nawlan hae cite Satan nynh yn cceih zah mih thinlung kya-e Pachia bya kha phe a lawpya hae.

¹³Lung vawlan a ccah hae paw tuh, Pachia bya kha he a thae hae te lungtuate a lawkuh hae paw nynh thua, thuasalama tharui hoi khyh hae, sosoh kyalya zyn hae zah tuhounaw nynh yn thuanua hae tuh phe a khuliakuh hae.

¹⁴Hinpaw laku a ccah hae paw tuh, Pachia bya kha a thae kou hae te cceih hae zah lungvawsawnaw, hoirumnaw te pynsaw hoysahnaw hae nynh varyng ve hae zah mih thae thae kho vae khyh hae.

¹⁵Thuasalama lae hoy kya a ccah hae paw tuh, Pachia bya kha he a thae hae te, athyaapaw te ahoypaw thinlung khate tynkaring lan ccykekuh hae zah lungsaenaw te athae thae hae paw kha nynh thua.

¹⁶“Humhung nynh mah maeekhua kha aw zah kee te khong boi khyh, ikhung kaw lang mah nung khyh, oun tee hae paw nynh awnaw kha a muih ccaw hae cite maee awnawpaw vawlan nynh a khang.

¹⁷Pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.

¹⁸Tukeiccuze pawtemou na thae oh cipaw raeringkuh oh, pawccecize a hoipaw ccungccaw tuh pyachih athua cih zah, a hoi leipaw ccungccaw nynh beihtaraw ka hoi cite a tuakupaw kha heize lawpya athua cih,” bua a ci.

¹⁹A nung te a neitaw hae nynh Jesu kalan oun cceih hae zah ccungccaw eih alung keiccuze a kalan naekuh kho khyh hae.

²⁰“Na nung te na neitawpaw hae nynh nang kha ae tungkuh ry hae zah atolang nynh a thadyn hae,” cite a hopya hae.

²¹Jesu nynh minmin kha, “Pachia bya kha thae hae zah a zui hae paw tuh ka nung te ka neitaw hae nynh thua hae,” a cipya hae.

²²Nin kheit tuh Jesu nynh a zuitu hae ryte kohlung lungkhu lang tee hae zah minmin kha, “Tuili khuraw lang khuin zua oh sih,” cipah hae zah kohlung te a cceih hae.

²³A ccia lya hae khe Jesu tuh a ih. Tuili kyakhe khise yn tho zah kohlung tuh tui phe a bia keiccuze minmin tuh vawsaw a tung hae.

²⁴Zuitu hae nynh amaw kha ccianuate tho hae zah, “Bawipaw, Bawipaw, aening ah chih vae cih oh!” cite a hopya hae. Jesu nynh thokuh zah khise te tuileih athopaw tuh kaw a pya; tuileih te khise tuh daebabi lan zya adae vae.

²⁵Jesu nynh minmin kha, “Nae zynnaw tuh pawkyamou?” a cipya hae. Minmin tuh rih hae zah mih ngaeangthua; “E paw hynh pawtecihpaw ccungccaw mou! Khise te tuileih kha heize kawpya zah minmin nynh a kaw a ngae hae!” cite lu kheit te lu kheit a hoku hae.

²⁶Minmin tuh Galilee ram te arawsekuhpaw Garasene ram lang a thua hae.

²⁷Jesu tuh varang lang a zua koute tuin khua e ccungccapaw, raerangsaro a bahkuhpaw nynh yn tungku. Aning tuh ccyh hynhsepi cia angki kiku leite, innvaw mah um leite, shawku kya leih umpaw nynh thua.

²⁸Jesu kha he a muih tuh, a malang khe bakhung zah, “Ahang Huaccepaw Pachia Ccapaw Jesu, nang te kae tuh pawmou ah sekuh? Kae hynh vawsaw nae pya khyh nawlan kae ngiaku,” cite thawte a sia.

²⁹Pawccecize Jesu nynh athyaa leipaw muisaw kha tuh-e paw kyate pou lan kaw phe a pya vae. Pawccecize tuh-e muisaw nynh amaw kha avae patae a la kyng; sivawrui te ccukhiinawpaw te khii hae zah khia kya a nung hae; thuasalama aning nynh a khiinaw hae paw kha thoh pae zah raerangsaro nynh ramkaw langkhe leih a dee.

³⁰Jesu nynh, “Na min hummou?” cite a khia. Aning nynh, “Legion,” a ci; pawccecize raerangsaro hae patae tuh amaw lungkhu lang a tee hae keiccu nynh thua.

³¹Raerangsaro hae nynh Jesu kha, “Akhupaw laekarung kalan beih oun sah nan,” cite a ngiaku hae.

³²Tuin pe mua vawlan khe rampaeekuh hae paw voh hae tuh aphupi te a um hae, te minmin nynh tuh-e hae lungkhu lang tee lan kaw a ua nawlan hae ngiakuh hae zah Jesu nynh kaw a ua hae.

³³Raerangsaro hae tuh ccungccapaw kyate pou hae zah voh hae lungkhu lang a tee hae; te voh phu tuh apannaw kyate tuili lungkhu lang thawmawte ccuebung hae zah pong a phungkuh hae.

³⁴Voh a rintu hae nynh tuh-e acyihkuhpaw tuh he a muih hae te, ccue hae zah tuh-e kong tuh khuapi te khua taraw hae kya a ho hae.

³⁵Ccungccaw hae nynh acyihkuhpaw kha do khylan oun cceih hae zah Jesu kalan oun thua hae, te a kyate raerangsaro hae a poupaw ccungccapaw tuh Jesu cculeihpaw khe haung zah boeining lawkute a lung akyhpaw kha a muih hae tuh a rih hae.

³⁶Raerangsaro bahkuhpaw ccungccapaw tuh pawcihte nynh a dan cipaw a muihpaw ccungccaw hae nynh oun thua hae paw kha a hopya bua hae.

³⁷Garasene ram kya um hae paw ccungccaw zapi balyn nynh eih rih kaesy hae zah mih kyate a pou nawlan Jesu kha a ngia hae; tukeiccuze Jesu tuh kohlung lungkhu lang tee zah phe a ki.

³⁸Raerangsaro nynh a poutawpaw ccungccapaw nynh Jesu kya umbua lan a ngiaku. Thuasalama Jesu nynh,

³⁹“Na inn lang la ki lah Pachia nynh na hanlan ae cyipyapaw kong kha la ho,” cipah zah a kisah. Aning nynh cceih zah Jesu nynh a hanlan a cyipyapaw kong kha khuapi po lekuh lan a hopya hae.

⁴⁰Jesu tuh he a ki te, ccungccaw zapi nynh a cciadue hae, pawccecize minmin nynh amaw kha a ngaw hae keiccu nynh thua.

⁴¹Sinakok uktu Jairas a ci hae paw nynh yn thua zah Jesu cculeihpaw khe bakhung zah a inn lang ccia lan a ngia.

⁴²Pawccecize aning nynh kum haw lae ning loukaw acih vae paw, ccanung lu kheit kyalya hoi zah tuh-e nung tuh vyavya a chih. Jesu a ccia lyakhe ccungccaw hae nynh phang a lungnuaku hae.

⁴³Kum haw lae ning cia chiilua ccinaw a hoinung lu kheit a um, aning nynh a hoipaw balyn kha sibawi hae kya marya thangkuh salamah humhung nynh mah dansah kho khyh.

⁴⁴Jesu nulang te yn naekuh zah a boei dung kha zya a hae; tetuh vaekheihmawte a chii luapaw tuh phe akan.

⁴⁵Jesu nynh, “Hummou yn hae?” cite a khia hae. Ccungccaw hae balyn nynh kae nyh khyh he a ci hae tuh Peter nynh, “Bawipaw, ccungccaw zapi nynh ae koihlu hae zah ae eihsei hae paw ngawrei,” cite a hopya.

⁴⁶Jesu nynh, “Lukhakheit nynh yn hae, pawccecize ka kyate huhan a poupaw kha ka ny,” a ci.

⁴⁷Nopinung nynh ka pheikuh kho vae lan khyh cipaw he a nyh tuh thyngkute cceih zah Jesu malang khe bakhung zah paw keiccu nynh ka hae cipaw te vaekheihmawte phe a dannawpaw kong kha ccungccaw balyn malang khe a hopya.

⁴⁸Jesu nynh, “Ka ccanung, na zynnaw nynh ae dansah vae, ngaengante la cceih ccavae,” a cipya.

⁴⁹Tuhte a ho cciamang lyakhe sinakok uktupaw inn kyate ccungccaw lu kheit yn thua zah Jairas kha, “Na ccanung phe chih vae, sazaepaw kha vawsaw pya nan vae,” a cipya.

⁵⁰Jesu nynh tuh-e tuh he a thae te Jairas kha, “Rih nan, zyn kyalya zyn lah na ccanung tuh a dan cih,” cite a hopya.

⁵¹Inn kya he a thua te Peter, James te Johan, te imuanung a nung te a paaw laelan hum sanmah inn lungkhu lang tee lan Jesu nynh ua khyh hae.

⁵²Ccungccaw hae balyn tuh a rah a khui hae; thuasalama Jesu nynh, “Rah nan oh, imuanung tuh chih khyh, a ihpaw nynh thua,” a cipya hae.

⁵³A chih cipaw phe ny hae paw thua zah minmin nynh Jesu kha a nuinse hae.

⁵⁴Jesu nynh imuanung kha a kuih te kyng zah, “Imuanung, thokuh!” a cipya.

⁵⁵A hiinnaw tuh yn kithui zah, vaekheihmawte po yn thokuh. Te Jesu nynh aepaw pya oh cite kaw a pya hae.

⁵⁶A paaw te a nung tuh mih ngaeangthua, Jesu nynh tuh-e acyihkuhpaw kong tuh humhung kya mah la ho nan oh cite kaw a pya hae.