Read Zotung Chin DEUTERONOMY 1 Bible Online

DEUTERONOMY 1 - Zotung Chin bible

DEUTERONOMY 1

¹Hynh-e tuh Moses nynh Israel hae balyn kalan Paran te Tofel, Laban, Hazeroth te Dizahab alaku, Suf te arawsekunaw bialae kya, Jordan vaw akhung lang ramkaw khe a hopya hae paw bya nynh thua.

²(Horeb kyate Kadesh-barnea lang tuh Seir Mua laanpi lang te nin haw lae kheit laanccia nynh thua.)

³Kum sung palinaw kum, sawpaw sah haw lae kheitnaw kyaze masaty nin khe BAWIPAW nynh Moses kya Israel hae hopya khylan kaw a pya thyhte Moses nynh Israel hae kha a hopya hae.

⁴E hynh Heshbon kya umpaw Amor Siapharan Sihon te Ashtaroth te Edrei kya umpaw Bashan Siapharan Og kha Moses nynh a tae kou hae te nynh thua.

⁵Jordan vaw akhung lang, Moab ram khe Moses nynh hynh-e upadi hynh akawlan thyhte a hopya hae:

⁶BAWIPAW ah Pachia nynh Horeb kya aening oun hopyapaw tuh, “E mua kya khaw cia na um vae oh.

⁷Cceih oh lah, mua alungnaw Amor hae ram lungkhu lang te a pepan umpaw ram hae Arabah lang thuasah, mua alungnaw ram lang thuasah, Shefelah lang thuasah, Negeb te rili kin lang thuasah, Kanaan hae ram te Lebanon lang thuasah Zufrates vawpi cia cceih oh.

⁸Dotua oh, ram tuh nae malang ka nung vae; nae minpaaw hae Abraham, Isak te Jakob kalan te minmin koute mih ciihan hae kalan pya lan bya ka kinkupaw ram lungkhu lang tee oh lah, ram nynh a hoipaw kha lawkuh oh,” a ci.

⁹Tuh ccyh lyaze kae nynh nanning kha, “Ka makhaete tuh nae hanlan ka taening lan khyh.

¹⁰BAWIPAW nae Pachia nynh ae pungthungsah oh zah, atunin nanning tuh vaawlui e awsi zeih na cih vae oh.

¹¹BAWIPAW athuapaw nae minpaaw hae Pachia nynh bya ae kinpyaku thyh oh te, leit thong kheit ae lungthungsah oh sah lah, hythua ae pya vae oh sah!

¹²Bya na lung oh paw aripaw ryalaw balyn hynh ka makhaete pawtemou ka phu kho cih?

¹³Nanning ae cciakhae lan oh paw, nae phin kyaze a hawpaw, a nyhthyapaw te sawtua lan umpaw lu kheit cci kha pokuh oh,” cite kae hopya oh.

¹⁴Nanning nynh kae kha, “Na hopaw tuh ahoypaw nynh thua,” nae cipya oh.

¹⁵Tukeiccuze nae phin kya-e cciakhaetu hae, ahawpaw te sawtua lan umpaw kha ka ko hae zah, athong uktu hae, aza uktu hae, sung pangaw uktu hae, lu haw uktu hae te bawi hae lang nae phin takyh kya ka nung hae.

¹⁶Tuh ccyh lyaze nae byapiatu hae kha ka khang hae: “Nae phu kya-e ccungccaw hae bya kha hoyte piapah oh lah, ramccungccaw thuasah, ramccang ccungccaw thuasah lu kheit te lu kheit laku ahmete byapia oh.

¹⁷Maedote bya na pia lan khyh oh: mino te piccan phe lokuh lante bya na piapah cih oh; ccungccaw nynh nangsekunaw kha na rih lan khyh oh, pawccecize byapianaw tuh Pachia kya-e nynh thua. Nanning hanlan myarya rupaw bya tuh ka kalan yn thuakhae oh, kamaw nynh ka pia cih,” a ci.

¹⁸Tuh ccyh lyaze na cyi lan oh paw atyn-are balyn kha kae hopya oh, a cipya hae.

¹⁹Oute BAWIPAW ah Pachia nynh kaw oun pya thyhte, Horeb kyate ah cceih oh zah, na muih vae oh hawte myarya lepaw te ri lan umpaw ramkaw balyn, mua alungnaw Amor hae ram lang cceihpaw laanpi khate Kadesh-barnea kyacia ah thua oh.

²⁰Kae nynh nanning kha, “BAWIPAW ah Pachia nynh oun pyapaw, mua alungnaw Amor hae ram na thua vae oh.

²¹Dotua oh, BAWIPAW nae Pachia nynh nanning kha ram ae pya vae oh; BAWIPAW athuapaw nae minpaaw hae Pachia nynh bya ae kinpyaku oh paw ram lang cceihthung oh lah lawkuh oh; rih nan oh lah, nae lungthang nan sah,” kae cipya oh.

²²Nanning balyn nynh kamaw kalan nae cceih oh zah, “Aening hanlan ram oun dopah cih paw ccungccaw hae kha saw oh sih lah, ah ccianua cih oh paw khuapi hae te ah cciathung nawlan oh paw laanpi kong kha oun hopah hae sah,” na ci oh.

²³Tuh-e bya tuh ahoypaw ka losah zah nanning lu haw lae ning kha phin kheit cci kyate lu kheit cci kae po oh.

²⁴Minmin nynh cceih hae zah mua alungnaw ram lungkhu lang a cceihthung hae, te Eshkol Vahue kya he a thua hae te, ram kha a dophi hae,

²⁵tuh-e ram kya-e apoupaw thingthae abang kha suelua hae zah aening kalan oun cciakhae bung hae. Minmin nynh thongpang oun phupah hae zah, “BAWIPAW ah Pachia nynh oun pyapaw ram tuh ahoypaw ram nynh thua,” a ci hae.

²⁶Thuasalama nanning nynh na cceihthung ry khyh oh. BAWIPAW nae Pachia kya-e kawpyapaw kha na dou oh;

²⁷nae bu kyakhe na ccohkuh oh zah, “BAWIPAW nynh aening hynh oun hua keiccuze Amor hae kuih kya pyate ro khylan Izip ram kyate oun poukhae.

²⁸Teilangmou ah cceih cih oh? Aening puizia hae nynh, ‘Tuh-e ccungccaw hae tuh aening laeze mih thawsaehua zah a hanghua hae; khuapi hae tuh le hae zah khua athungkhawkuhpaw tuh vaawlui phe adia! Tuin kya Anak ciihan hae kha kae muih ccaccing hae!’ cikuhpaw thongpang khate aening thinlung kha oun tuisah hae,” na ci oh.

²⁹Kae nynh nanning kyakhe, “Minmin kha siikuh nan oh lah, rih nan oh.

³⁰Nae malang a cceihpaw BAWIPAW nae Pachia tuh Izip ram kya na muihnaw oh ccaccei khe ae cyipya oh hawte, e hmin kya na thua mawlaezung oh, na ccianaw oh laanpi balyn kya, lukhakheit nynh imua kha a pua hawte BAWIPAW nae Pachia nynh pawtemou ae pua oh cipaw na muihnaw oh, ramkaw kya nae hanlan rhaw ae tukpah cih oh paw nynh thua.

³²Thuasalama ryahmin na tahkunaw lan oh paw hmin kha ccung khylan, na zui lan oh paw laanpi kha langsahpya khylan, khuazi ze maee te thuasah, khuadae ze maeking te thuasah nae malang ae cciapah oh paw, BAWIPAW nae Pachia nynh hynhte ae cyipah oh zahmah amaw kha na zyn khyh oh,” a cipya hae.

³⁴BAWIPAW nynh nae bya kha he a thae tuh, a thinria zah,

³⁵“Nae minpaaw hae kha pya lan cite bya ka kinpyaku hae paw ram hoypaw kha hynh-e ahoy leipaw minphuin kya-e lu kheit nynh sanmah muih lan khyh,

³⁶Jefunneh ccapaw Kaleb rou nynh khah-e ram kha a muih cih, BAWIPAW tungvaw tynkaring lan a lungzi keiccuze a ccu te a synaw ram kha amaw te a ciihan hae kalan ka pya cih hae,” a ci.

³⁷BAWIPAW tuh nanning keiccuze ka tungvaw heize a thinria zah, “Nang mah tuh-e ram lungkhu lang na tee lan khyh.

³⁸Nang ae bawmtupaw Nun ccapaw Joshua tuh ram lungkhu lang a tee cih; aning tuh Israel kha ram a ccousahtupaw athua keiccuze thawzung pyatua.

³⁹Rhaw nynh a kyng hae paw lang a tang cih hae cite na tua oh paw nae imua hae, atunin athya ahoy a nyh loh lei hae paw nae ccaaw hae tuh ram lungkhu lang a tee cih hae; ram tuh minmin ka pya cih hae zah minmin nynh ram kha a ccou cih hae.

⁴⁰Thuasalama nanning tuh Rili Se lang cceihpaw laanpi thyhte ramkaw lang kitua oh,” a ci.

⁴¹Nanning nynh kae kha, “BAWIPAW tungvaw kae sei vae! BAWIPAW kae Pachia nynh kaw oun pya thyhte kae cceihthung cih zah kae tuk cih,” nae cipya oh. Nanning balyn nynh nae rhaw zunghe kha kyngte mua alungnaw ram lungkhu lang cciathung lanpaw kha azoi lante na tua oh.

⁴²BAWIPAW nynh kae kha, “Minmin kyakhe, ‘Cceihthung nan oh lah, tuk nan oh, pawccecize nanning laku ka um khyh; tuhkhyhze tuh nae rhaw hae nynh ae tae cih oh,’ cite hopah hae,” yn cipya.

⁴³Kae hopya oh zemah na ngae khyh oh. BAWIPAW kawpyapaw kha na dou oh zah mua alungnaw ram lungkhu lang lungkhungte na cciathung oh.

⁴⁴Tuh-e mua alungnaw um hae paw Amor hae nynh ae pounua cih oh zah khoi nynh dee hawte ae dee cih oh zah Seir kyate Hormah kyacia ae tude cih oh.

⁴⁵Nae ki oh zah BAWIPAW malang he na rah oh tuh, BAWIPAW nynh nae roi kha ngaepya leite pawlang ae riapah vae lan khyh oh.

⁴⁶Kadesh kya na la um oh hawte khaw cia bua na um oh.