Read Zotung Chin DEUTERONOMY 10 Bible Online

DEUTERONOMY 10 - Zotung Chin bible

DEUTERONOMY 10

¹Tuh ccyh lyakhe BAWIPAW nynh kae kha, “Langmawlya e lungphe hae hawte lungphe phe ning kha aw lah mua vawlan kamaw kalan yn kaethungtua, te thingkua kha mah raetua.

²Na koipaw langmaw e lungphe hae vawlan umpaw bya hae kha nyalang e lungphe hae kya ka zei cih, te tuh-e lungphe hae tuh thingkua lungkhu na nung cih,” yn cipya.

³Tukeiccuze eri thing te thingkua ka rae zah langmaw e lungphe hae te alokuhpaw lungphe phe ning kha ka rae, tuh-e lungphe phe ning kha ka kuih kya ccyngte mua lang ka kaethung.

⁴Oute na pumku lya oh ze, maee lungkhu te BAWIPAW nynh mua vawlan ae hopya oh paw kawbya ccanghaw, langmawlya e te alokuhpaw bya hae kha lungphe hae vawlan khe BAWIPAW nynh zei zah kae kha yn pya.

⁵Te ka maeleihkuh zah mua kyate ka rungbung, te ka raepaw thingkua lungkhu khe lungphe hae kha ka nung; BAWIPAW nynh kaw yn pya thyhte tuh-e lungphe hae tuh tuin kya a um hae.

⁶(Israel hae tuh Beeroth Bene-jaakan kyate Moserah lang a cceih hae. Tuin kyakhe Aaron tuh chih zah a uu hae; a ccapaw Eleazar tuh amaw ccelang ranpibawi lang a tang.

⁷Israel hae tuh tuin kyate Gudgodah, Gudgodah kyate vaw taraw hae a luanaw ram Jotbathah lang a cceih hae.

⁸Tuh ccyh lyaze BAWIPAW byakin thingkua puih khylan thuasah, BAWIPAW ryalawpya khylan amaw malang thadyn lan thuasah, te amaw min te hythuapya khylan thuasah BAWIPAW nynh Levi phin kha laesah zah atunin cia tuhcite a cyi hae.

⁹Tukeiccuze Levi tuh neekupaw thuasah, rho thuasah a uno hae hawte hoi khyh, BAWIPAW nae Pachia nynh amaw kha bya a kinpyaku thyhte BAWIPAW tuh a rho nynh thua.)

¹⁰Masaty lya hawte mua vawlan khe nin sung pali te zi sung pali ka um. Te BAWIPAW nynh ka bya kha vaekheit bua yn ngaepya. BAWIPAW nynh nanning kha ae roh ry khyh oh.

¹¹BAWIPAW nynh kae kha, “Thokuh lah, mih minpaaw hae kya kae pya cih oh cite bya ka kinpyaku hae paw ram lungkhu lang tee hae zah a ccou ccaw hae, ccungccaw hae kha lupi lante cciakhae hae,” yn cipya.

¹²Pou Israel, tukeiccuze BAWIPAW na Pachia nynh atu pawmou ae peki? BAWIPAW na Pachia rawri lanpaw, a laanpi balyn kya ccia lanpaw, amaw sungsah lanpaw, BAWIPAW na Pachia kha na thinlung balyn te, na tuanaw balyn te ryalawpya lanpaw,

¹³te namaw hoynaw te thanenaw hanlan atunin kaw kae pyapaw BAWIPAW na Pachia kawbya hae te a phungbya hae kha zui lanpaw kyalya kha nynh thua.

¹⁴Vaawlui te vaawram hae kyaze ahang huapaw vaawram thuasah, laephi te laephi kya umpaw balyn thuasah BAWIPAW na Pachia kya-e athua zemah,

¹⁵BAWIPAW nynh na minpaaw hae kyalya kha a thinlung te sungsah hae zah, minmin ciihan athuapaw nang kha, atunin acyiku hawte minphuin balyn laku te ae po vae.

¹⁶Oute nae thinlung vingdung kha awkuh oh lah, nae lungkhung nan vae sah.

¹⁷Pawccecize BAWIPAW nae Pachia tuh pachia hae Pachia te bawipaw hae Bawipaw, alesaepaw Pachia, athungpaw te ri lan umpaw, maedo a mang leipaw te pyaruh a lawkuh leipaw,

¹⁸ngawraw te nomae hanlan ahmete byapiapah hae paw te mikhia hae kha sungsah hae zah looh te boeining a bawmtupaw Pachia nynh thua.

¹⁹Mikhia hae kha na sungsah cih oh, pawccecize nanning tuh Izip ram kya mikhia nynh na la thua oh.

²⁰BAWIPAW na Pachia kha na rih cih, amaw kyalya kha na beik cih; amaw kha tynkaring lan na kyngkuh cih zah amaw min te bya na kinkuh cih.

²¹Aning tuh na thehoynawpaw nynh thua; na mit te na muih vae paw hynh-e alesaepaw te ri lan umpaw uccaw hae kha ae raepahpaw na Pachia nynh thua.

²²Na minpaaw hae tuh ccungccaw sung sari te Izip ram lang a cceihbung hae; atu vae tuh BAWIPAW na Pachia nynh nang kha vaawlui e awsi zeih alung lante ae rae vae.