Read Zotung Chin DEUTERONOMY 12 Bible Online

DEUTERONOMY 12 - Zotung Chin bible

DEUTERONOMY 12

¹Hynh-e hae hynh BAWIPAW , nae minpaaw hae Pachia nynh laephi vawlan na hiin lungkhu oh balyn ccou lan ae pya oh paw ram kya zuakute na zui lan oh paw phungbya hae te phungzae hae nynh thua hae.

²Nanning nynh na lah vae cih oh paw minphuin hae nynh mua ahang hae paw vawlan, sangpyng hae vawlan te anaw abungpaw thingku kaw miakaw kya a beik hae paw mih pachia hae hmin balyn kha pong na ropah cih oh.

³Mih silawhang hae kha phoupah oh, mih lungpum hae kha ropah oh, mih Asherim kha maee te upah oh lah, mih pachia lang a raeku hae paw zohtuh hae kha baepah oh, tuhcite mih umnaw hmin hae kyate mih min kha thee oh.

⁴BAWIPAW nae Pachia kha tuhcite na beik lan khyh oh.

⁵Thuasalama BAWIPAW nae Pachia nynh a min nung nawlan te a um nawlan nae phin balyn kyate a po cih paw hmin kha na ccung cih oh. Tuh-e hmin kalan na cceih cih oh zah,

⁶nae kya-e maee-ute silawnawpaw hae te silawnawpaw hae, nae kya-e pumhaw pumkheit hae te nae kya-e ahlu hae, byakinkute na pya oh paw nae lasung hae, lungthote na pya oh paw silawnawpaw hae, te nae vaetua phu te nae tuuphu kya-e thanty hae kha tuh-e hmin kalan na thuakhae cih oh.

⁷Te nanning nynh tuin kya BAWIPAW nae Pachia malang khe na ae cih oh, BAWIPAW nae Pachia nynh hythua ae pya oh zah na cyi oh paw miakaw kya nanning te nae innbyn hae tuh pynkheihlan nae lungtua cih.

⁸Aening balyn nynh ahmaw rynaw thyhte atunin hein kya ah cyi oh hawte na cyih lan khyh oh,

⁹pawccecize BAWIPAW nae Pachia nynh ae pya cih oh paw haeungnaw te rho lungkhu lang na tee loh khyh oh.

¹⁰Jordan vaw zuate BAWIPAW nae Pachia nynh ae nee oh paw ram kya na um oh zah, khyndadyh lan khua na sah oh ccaw cite nae pepan umpaw nae rhaw hae kyate haeungnaw he ae pya oh te,

¹¹BAWIPAW nae Pachia nynh a min um nawlan a popaw hmin kalan khe kaw kae pya oh paw atyn-are kha na cciakhae cih oh: nae kya-e maee-ute silawnawpaw hae te nae silawnawpaw hae, nae kya-e pumhaw pumkheit hae te nae kya-e ahlu hae, BAWIPAW kalan bya na kinku thyh oh te na pya oh paw lasung balyn kha na thuakhae cih oh.

¹²Te BAWIPAW nae Pachia malang khe naemaw ryte nae ccanung hae te nae ccapaw hae, nae seenung hae te nae seepaw hae, te neekupaw thuasah, rho thuasah hoi leite nae khua kya a um hae paw Levi hae ryte nae lungtua cih.

¹³Na muih oh paw hmin miakaw kya nae kya-e maee-ute silawnaw kha na rae khyh nawlan oh raeringkuh oh.

¹⁴Thuasalama nae phin hae kya-e phinkhakheit kya BAWIPAW nynh a po cih paw hmin kya kyalya khe nae kya-e maee-ute silawnaw kha na rae cih oh zah kaw kae pya oh paw atyn-are kha tuin kya na cyih cih oh.

¹⁵Tuhzemah BAWIPAW nae Pachia nynh ae pya oh paw hythuanaw thyhte nae khua khuakhakheit kya na ry takyh oh te, saw kha na chiakuh cih oh zah na ae cih oh; sazuh te sakhi kha leih a ae hae hawte athyaapaw ccungccaw nynh thuasah, athyaa leipaw ccungccaw nynh thuasah tuh-e tuh a ae cih.

¹⁶Thuasalama chii kha na ae lan khyh oh; tuh-e chii tuh laephi kya tui hawte na lae cih oh.

¹⁷Nae ccathae, nae misutui te nae chitui pumhaw pumkheit kha thuasah, nae vaetua phu te nae tuuphu kya-e thanty hae kha thuasah, bya na kinku oh paw byakinnaw lasung hae, lungthote na pya oh paw silawnawpaw hae hankhakheit kha thuasah, nae kya-e ahlu hae kha thuasah nae khua lungkhu kya na ae lan khyh oh;

¹⁸hynh-e hae hynh BAWIPAW nae Pachia nynh a popaw hmin kya namaw ryte na ccanung te na ccapaw, na seenung hae te na seepaw hae, te nae khua kya umpaw Levi phin hae ryte BAWIPAW nae Pachia malang khe na ae cih oh, na cyi oh paw balyn kya BAWIPAW nae Pachia malang nae lungtua cih.

¹⁹Nae ram kya na um lungkhu oh balyn, Levi phin hae kha pawlangria leite na um khyh nawlan oh raeringkuh oh.

²⁰BAWIPAW nae Pachia nynh bya ae kinpyaku oh hawte nae ram kha he ae kosahpah oh te, nanning nynh saw na ae ry keiccu oh ze, “Saw ka ae cih,” na ci oh ze, na ry takyh oh te saw kha na ae cih oh.

²¹BAWIPAW nae Pachia nynh a min nung nawlan a popaw hmin tuh nanning kyate myaryamaw asaw lanze, kaw kae pya vae oh hawte BAWIPAW nynh ae pya oh paw vaetua phu khyhze tuuphu kya-e sakhakheit kha na theih cih oh zah, na ry takyh oh te, nae khua lungkhu kya na ae cih oh.

²²Sazuh saw thuasah, sakhi saw thuasah na ae oh hawte na ae cih oh; athyaa leipaw ccungccaw nynh mah, athyaapaw ccungccaw nynh mah a ae cih.

²³Chii kha papin na ae lan khyh oh; pawccecize chii tuh hiinnaw thua zah, hiinnaw kha asaw ryte na aede lan khyh oh.

²⁴Chii kha na ae lan khyh oh zah laekhu langkhe tui hawte na lae cih oh.

²⁵BAWIPAW mitmuihnaw kya ahmepaw kha na cyi keiccu oh ze naemaw te nae nukhu e nae ccaaw hae tuh ngedang lungpawte na um ccaw oh, chii kha ae nan oh.

²⁶Thuasalama na pya lan oh paw athyaapaw ahlu hae te bya na kinku oh thyhte na pya oh paw lasung hae kha BAWIPAW nynh a po cih paw hmin kalan khe na thuakhae cih oh.

²⁷Maee-ute si na lawnaw oh paw asaw te achii kha BAWIPAW nae Pachia silawhang vawlan khe na pya cih oh; ccangpaw si na lawnaw oh paw achii hae kha tuh BAWIPAW nae Pachia silawhang pe khe na lae cih oh, thuasalama asaw kha tuh na ae cih oh.

²⁸BAWIPAW nae Pachia mitmuihnaw kya ahoypaw te ahmepaw kha na cyih oh zah, naemaw te nae nukhu e nae ccaaw hae tuh ngedang lungpawte zungzae na um ccaw oh, atunin kaw kae pya oh paw hynh-e bya hae hynh hoyte zui oh.

²⁹Law lan na teenua vae cih oh paw minphuin hae kha BAWIPAW nae Pachia nynh nae malang khe maemih hae zah minmin kha lawte mih ram kya he na um oh te,

³⁰minmin kha nae malang khe ro athua kou hae te, minmin kaheih lawkute kaang na kae khyh nawlan oh raeringkuh oh: “E minphuin hae nynh mih pachia hae kha pawtepei a beik hae? Kae mah minmin hawte cyi ka rybua,” cite mih pachia hae te asekuh lante akaw-aleih khia nan oh.

³¹BAWIPAW nae Pachia hanlan minmin hawte na cyih lan khyh oh, pawccecize BAWIPAW nae Pachia nynh a huapaw anungsikuhpaw uccaw miakaw kha minmin nynh mih pachia hae hanlan a cyipya hae. Minmin nynh mih ccapaw hae te mih ccanung hae kha heize mih pachia hae hanlan maee kya leih a u hae.

³²Kaw kae pya oh paw atyn-are kha zuakute na zui hahe cih oh; khah-e kyakhe na biachih lan khyh oh zah na lahbang lan khyh oh.