Read Zotung Chin DEUTERONOMY 13 Bible Online

DEUTERONOMY 13 - Zotung Chin bible

DEUTERONOMY 13

¹Nanning laku te profeh hae te maanleihthya hae paw yn langkuh hae zah syntawnaw hae te ngaeangnaw hae kha nanning kya muihsahte,

²ae langsahpyaku oh paw muihsahnaw hae te ngaeangnaw hae tuh yn cyihkuh zah, na ny boi lei oh paw “Ccangpaw pachia hae kha zui oh sih lah beik oh sih,” cite ae hopya oh zetuh,

³tuh-e profeh hae te maanleihthya hae paw bya kha na ngaepah lan khyh oh; pawccecize BAWIPAW nae Pachia kha nae thinlung balyn te nae tuanaw balyn te na sungsah ccaccing oh tou cipaw ny khylan BAWIPAW nae Pachia nynh nanning kha ae syntawtua cih oh.

⁴BAWIPAW nae Pachia kha na zui cih oh, amaw kyalya kha na rih cih oh, a kawbya hae kha na zui cih oh, a roi kha na ngae cih oh, amaw kha na beik cih oh zah amaw kha tynkaring lan na kyngkuh cih oh.

⁵Thuasalama Izip ram kyate ae poukhae oh zah seetangnaw kyate ae shawkhaw oh paw BAWIPAW nae Pachia tungvaw rawsete, BAWIPAW nae Pachia nynh zui lan kaw ae pya oh paw laanpi kyate nanning kha maeleihsahku khylan lungzi leinaw bya a ho keiccu hae ze, tuh-e profeh hae te maanleihthya hae paw tuh chia athua cih hae. Tukeiccuze nanning laku kyate hoyleinaw kha na vua cih oh.

⁶Na uno, na paaw ccapaw khyhze na nung ccapaw, na ccapaw khyhze na ccanung, na pompaw na zu, na naekuh hua oh paw na banpaw nynh heize, namaw nynh thuasah, na minpaaw hae nynh thuasah na ny lei oh paw pachia hae kalan, “Cceih oh sih lah ccangpaw pachia hae kha beik oh sih,” cite ho hae zah,

⁷na pepan anaenaw te asawnaw, laephi voikheit lang te voikheit lang adianaw kyacia a um hae paw ccungccaw hae pachia hankhakheit kha beik khylan aruh lante ae hyy hae ze thuasah,

⁸na nawccawkhae lan khyh zah tuhcihawpaw ccungccaw hae bya kha na ngae lan khyh. Minmin tungvaw thawccinaw te ngaethyaumsahnaw na langsakuh lan khyh zah na pankhaw lan khyh hae.

⁹Thuasalama Minmin kha na theih ccaccing cih hae; minmin chia khylan na kuih tuh masaty na hang cih zah, tukoute ccungccaw balyn nynh mih kuih a hang cih hae.

¹⁰Izip ram seetangnaw kyate ae poukhae oh paw BAWIPAW nae Pachia kyate nanning kha maeleihsahku khylan a zuaku keiccu hae ze, lung te phe chih lan deih oh.

¹¹Tetuh Israel balyn nynh a thae cih hae zah a rih cih hae, te tuhcihawpaw hoyleinaw kha kharouh cyih vae lan khyh hae.

¹²BAWIPAW nae Pachia nynh um nawlan ae pya oh paw khua khuakhakheit kyakhe,

¹³ccungccalei hae paw nynh nanning laku kyate cceih hae zah khua kya a um hae paw kyakhe, “Cceih oh sih lah ccangpaw pachia hae kha beik oh sih,” cite na ny lei oh paw pachia hae kong a ho hae paw kha na thae oh zetuh,

¹⁴nanning nynh akaw-aleih hoyte na khia cih oh. Nanning laku kya tuhcite anungsikuhpaw uccaw hae tuh acyiku ccaccing zetuh,

¹⁵tuh-e khua kya a um hae paw kha thaloi te na theih cih oh zah, tuh-e khua te a lungkhu umpaw atyn-are, sahiin-awvaw hae kha thaloi te pong na theih cih oh.

¹⁶Na luade oh paw uccaw balyn kha khualae angaelung khe na ccakhung cih oh; oute khua te khua lungkhu e na luade oh paw balyn kha BAWIPAW nae Pachia hanlan abalynte maee-ute silawnaw lante maee te na u cih oh. Tuh-e tuh zungzae arohpaw khua athua vae cih zah, papinmaw raethui thua vae lan khyh.

¹⁷BAWIPAW nynh myarya lepaw a thinrianaw kyate paleihkuh zah nae minpaaw hae kya bya a kinku hawte ngaethya ae umsah oh zah ae pungthung sah nawlan oh, ro athua vae paw uccaw ccangkheit sanmah nae kuih te na ty lan khyh oh,

¹⁸atunin kaw kae pya oh paw a kawbya balyn kha na zui oh zah BAWIPAW nae Pachia roi kha na ngae oh zetuh, BAWIPAW nae Pachia mitmuihnaw kya ahmepaw kha cyih oh.