Read Zotung Chin DEUTERONOMY 14 Bible Online

DEUTERONOMY 14 - Zotung Chin bible

DEUTERONOMY 14

¹Nanning tuh BAWIPAW nae Pachia ccaaw hae nynh na thua oh. Michi hanlan nae ngesaw na awkuh lan khyh oh, nae mitteky laku e nae ming kha na ngokuh lan khyh oh.

²Pawccecize nanning tuh BAWIPAW nae Pachia hanlan athyaapaw minphuin nynh na thua oh; BAWIPAW nynh nanning kha laephi vawlan e ccungccaw balyn kyate a ccungccaw hae lang te aphutepaw lang ae poku vae oh.

³Anungsikuhpaw miakaw na ae lan khyh oh.

⁴Na ae lan oh paw sarangpaw hae tuh: vaetua, tuu, miaa,

⁵sazuh, sakhi, sathaw, sazaw, saccung, ramkaw vaetua te mua tuu nynh thua hae.

⁶Accumakeih phiakuh zah a ccutin asaepaw sarangpaw miakaw te sarangpaw hae lakuze akhaethuipaw kha na ae cih oh.

⁷Thuasalama akhaethuipaw te accumakeih aphiakuhpaw kyaze na ae lei lan oh paw tuh: kalauh, saveih te sangepavo nynh thua hae, pawccecize hynh-e hae tuh a khaethui hae zemah mih ccumakeih phiakuh khyh zah nae hanlan thyaa khyh hae.

⁸Te voh tuh accumakeih aphiaku zemah a khaethui khyh keiccuze nae hanlan thyaa khyh. A saw kha na ae lan khyh oh, achihpaw kha mah na ty lan khyh oh.

⁹Tui lungkhu a umpaw balyn kyaze asake te aphaluh a hoipaw miakaw kha na ae cih oh.

¹⁰Te asake te aphaluh a hoi leipaw miakaw kha na ae lan khyh oh; tuh-e tuh nae hanlan athyaa leipaw nynh thua.

¹¹Athyaapaw pavaw miakaw kha na ae kho oh.

¹²Thuasalama na ae lei lan oh paw tuh: mosi, lantaw, ngasathypaw pavaw,

¹³mosipi, mosi phuin miakaw;

¹⁴va-aw phuin miakaw;

¹⁵kalauh pavaw, butharu, rili pavaw, mosi phuin miakaw;

¹⁶vaphouh, nawniapi, tui-aw

¹⁷te pelikan pavaw, sathuh aepaw lantaw, tui-pavaw,

¹⁸kaepaw-pavaw, varaw phuin miakaw; michi pavaw te balaw nynh thua hae.

¹⁹Te asake a hoipaw ripawhaepaw miakaw tuh nae hanlan thyaa khyh zah na ae lan khyh oh.

²⁰Sake hoi zah athyaapaw ahysuepaw miakaw tuh na ae cih oh.

²¹Amaw chi lan achihpaw miakaw kha na ae lan khyh oh; tuh-e tuh nae khua umpaw ramccang hae nynh a ae ccaw hae na pya kho oh, tuhkhyhze tuh-e tuh ramccang hae kalan na zuapah kho oh. Pawccecize nanning tuh BAWIPAW nae Pachia hanlan athyaapaw minphuin nynh na thua oh. Miaa taraw kha a pi mateitui te na thungde lan khyh oh.

²²Kum takyh loo kyate apoupaw nae ccacii-emung kyate na mue oh paw looh balyn kya-e pumhaw pumkheit kha ccangte phia oh.

²³BAWIPAW nae Pachia tungvaw rithyanaw kha zungzae na ny nawlan oh, BAWIPAW nae Pachia nynh amaw min a um nawlan a po cih paw hmin kyakhe nae ccathae, nae misutui, nae chitui kya-e pumhaw pumkheit te nae vaetua phu te nae tuuphu kya-e thanty kha BAWIPAW nae Pachia malang khe na ae cih oh.

²⁴Thuasalama BAWIPAW nae Pachia nynh hythuanaw he ae pya oh te, BAWIPAW nae Pachia nynh amaw min um nawlan a popaw hmin tuh nanning kyate ccialekunaw myaryamaw saw zah pumhaw pumkheit kha na cciakhae kho khyh oh ze,

²⁵phua lang na rulae cih oh zah, phua kha nae kuih kya khyndadyh lan ccyngte BAWIPAW nae Pachia nynh a popaw hmin kalan na cciakhae cih oh;

²⁶tuh-e phua tuh na ry oh paw miakaw kya—vaetua hae, tuu hae, misutui, ruimangpaw niapaw khyhze na ry oh paw miakaw kya na mang cih oh. Te BAWIPAW nae Pachia malang khe nae innbyn hae ryte lungpawte pynkheihlan na ae cih oh.

²⁷Nae khua kya umpaw Levi hae kha pawlangria leite na um lan khyh oh, pawccecize minmin tuh nanning kya neekupaw thuasah, rho thuasah hoi khyh hae.

²⁸Kum thumnaw takyh khe tuh-e kum kya na voisah oh paw looh pumhaw pumkheit kha phe ccing lan na thuakhae cih oh zah, nae khua lungkhu khe na ccakhung cih oh;

²⁹BAWIPAW nae Pachia nynh na law oh paw ryalaw balyn kya hythua ae pya nawlan oh, nanning kya neekupaw thuasah, rho thuasah a hoi lei hae paw Levi phin hae tuh nae khua kya um hae paw ramccang hae, ngawraw hae te nomae hae ryte oun cceih cih hae zah phe byn lan a ae cih hae.