Read Zotung Chin DEUTERONOMY 15 Bible Online

DEUTERONOMY 15 - Zotung Chin bible

DEUTERONOMY 15

¹Kum sarinaw kum takyh kya laebah ngaethyakunaw na rae cih oh.

²Te laebah ngaethyakunaw konglang tuh hynhcite athua cih: laebah a koiisakuhtupaw miakaw nynh a koiitupaw a innpaw kha a ngaethya cih, BAWIPAW kya-e ngaethyakunaw tuh thaesahku athua keiccu vae ze, amaw uno athuapaw a innpaw kyate tuh-e laebah tuh ngia lan khyh.

³Ramccang ccungccaw kha tuh laebah na ngia kho, thuasalama na uno lukhakheit nynh ae koipaw laebah kha tuh na ngaethya hahe cih.

⁴Tuhzemah nanning laku aryachipaw lu kheit sanmah um lan khyh, pawccecize BAWIPAW nae Pachia nynh rho lang ccou khylan ae pya cih oh paw ram kya BAWIPAW nynh hythua ae pya ccaccing cih oh,

⁵atunin kaw kae pya oh paw hynh-e kawbya balyn hynh zuakute na zui oh zah BAWIPAW kaw kha na ngae oh zetuh, hythua ae pya ccaccing cih oh.

⁶BAWIPAW nae Pachia nynh bya ae kinpyaku oh hawte, hythuanaw he ae pya oh te, minphuin patae hae kha na koiisakuh cih oh, thuasalama nanning nynh na koi lan khyh oh; minphuin patae hae kha na uk cih oh, thuasalama minmin nynh nanning kha ae uk lan khyh oh.

⁷BAWIPAW nae Pachia nynh ae pya oh paw ram lungkhu e khua hae kyakhe a ryachipaw nae uno lukhakheit a um lanze, a ryachipaw nae innpaw paw tungvaw kya nae sithah lan khyh zah nae kuihphe kha phang na huh lan khyh oh.

⁸Nae kuihphe kha na daw cih oh zah, pawpaw athua zemah, a ryachipaw hanlan phe azaw lan hysahte na koiisakuh cih oh.

⁹“Kum sarinaw, ngaethyakunaw kum anae vae,” cite tuate aryachipaw na innpaw paw tungvaw eiungnaw hoite pawpaw mah pya leite ahoy leipaw thinlung kha na hoi khyh nawlan raeringkuh; nae innpaw paw nynh nanning rawsete BAWIPAW kalan a sia cih zah, seinaw mee kha na teing cih oh.

¹⁰Amaw kha hysahte pya lah, na pya vae ze, na sithah nan sah, pawccecize hynh-e konglang kyahin BAWIPAW na Pachia nynh na ryalaw balyn kya te na cyipaw balyn kya hythua ae pya cih.

¹¹Laephi vawlan aryachipaw ccungccaw tuh thang boi lan khyh, tukeiccuze kae nynh nanning kha, “Nae ram kya umpaw a ryachipaw te ahoboupaw nae innpaw hanlan nae kuihphe kha daw oh,” cite kaw kae pya oh.

¹²Nae uno, Hebru paw thuasah, Hebru nung thuasah nanning kalan zua thua zah kum taruh lungkhu rya ae lawpya ze, kum sarinaw kum kyakhe tuh-e ccungccaw kha na luesah cih.

¹³Te namaw kyate na luesahpaw seepaw lu kheit kha he na saw te, a kuih ccakaete na saw lan khyh.

¹⁴Na tuuphu kya-e thuasah, na huimin kya-e thuasah, na misu mianaw khu kya-e thuasah hysahte na pya cih, tuhcite BAWIPAW na Pachia nynh hythua ae pyapaw thyhte amaw kha pyatua.

¹⁵Izip ram kya see lang na la tang oh paw te BAWIPAW nae Pachia nynh ae shawkhaw oh paw kha liathui oh; tukeiccuze atunin hynh-e kaw hynh nanning kae pya oh.

¹⁶Thuasalama aning nynh na kya a umpaw kha a sawccah zah nang te na innbyn kha a sungsah keiccuze nang kha, “Na kyate ka pou lan khyh,” ae cipya ze,

¹⁷sivaw ccungthy kha na lah cih zah thuakaw kyakhe a nakua kha po ua lan na vih cih, te na see lang zungzae a tang vae cih. Na seenung kha mah tuhcite na cyih cih.

¹⁸Na kyate minmin kha luesahte he na saw hae te, tuh-e tuh aru cite tua nan, pawccecize minmin nynh nang kha hohpaw ryalahtu kya-e ryalaw mee te atekuhpaw ryalaw kha kum taruh lungkhu phe ae lawpya vae hae; te BAWIPAW na Pachia nynh na cyipaw balyn kya hythua ae pya cih.

¹⁹Na vaetua phu te na tuuphu kya-e thanty pise miakaw kha BAWIPAW na Pachia kalan na thyaasah cih; na vaetua phu kya-e thanty khate rya na lah lan khyh zah na tuuphu kya-e thanty kha a ming na ngo lan khyh.

²⁰Tuh-e thanty hae tuh BAWIPAW nynh a po cih paw hmin kyakhe nang te na innbyn hae nynh BAWIPAW nae Pachia malang khe kum takyh na aekheih cih oh.

²¹Thuasalama tuh-e thanty tuh douccaw leinaw ccangkhakheit—ccu khyanaw, mitmohnaw tahawpaw douccaw leinaw alepaw a hoi lanze, tuh-e tuhte BAWIPAW na Pachia kalan si na law lan khyh;

²²tuh-e tuh nae khua lungkhu khe na ae cih oh, sakhi te sazuh na ae oh hawte athyaapaw te athyaa leipaw ccungccaw nynh pynkheihlan a ae cih hae.

²³Thuasalama a chii kha na ae lan khyh oh; laekhu langkhe tui hawte na lae cih oh.