Read Zotung Chin DEUTERONOMY 16 Bible Online

DEUTERONOMY 16 - Zotung Chin bible

DEUTERONOMY 16

¹BAWIPAW nae Pachia hanlan kawtaw poi kha tua oh lah, Abib sawpaw kha naawsah oh, pawccecize BAWIPAW nae Pachia nynh nanning kha Izip ram kyate Abib saw, khuazi khe ae poukhae oh.

²BAWIPAW nynh a min a um nawlan a po cih paw hmin kyakhe tuuphu kya-e te thuasah, vaetua phu kya-e te thuasah BAWIPAW nae Pachia kalan kawtaw poi silawnaw kha na rae cih oh.

³Tuh-e tuh ransi phingkuhpaw hankhakheit te na ae dee lan khyh oh. Izip ram kyate vawsawnaw te arangte nae pou keiccu oh ze, nin sari lungkhu ransi phing leipaw sanlou, vawsawnaw sanlou khate na ae dee cih oh, tuhteze nynh Izip ram kyate nae toiku nin oh kha nae hiin lungkhu balyn na ning lan khyh oh.

⁴Nae ram balyn kya nin sari lungkhu ransi kha nae kya muih thua lan khyh; masaty nin zete kya na chia oh paw saw kha awkhualan awkhua cia na laesah lan khyh oh.

⁵BAWIPAW nae Pachia nynh ae pya cih oh paw nae khua hae lungkhu kya kawtaw poi silawnaw rae lan ua na thua khyh oh.

⁶BAWIPAW nae Pachia nynh amaw min a um nawlan a po cih paw hmin kya kyalya khe, Izip ram kyate na pou ccyh oh, khuanin ccaw ccyh zetepakaw khe kawtaw poi silawnaw kha na rae cih oh.

⁷Tuh-e tuh BAWIPAW nae Pachia nynh a po cih paw hmin kyakhe ang na hyng cih oh zah na ae cih oh; awkhualan awkhua khe nae bu kalan na ki cih oh.

⁸Nin taruh lungkhu ransi phing leipaw sanlou kha na ae cih oh zah nin sarinaw nin khe BAWIPAW nae Pachia hanlan athyaapaw pumkunaw na rae cih oh, tuh-e nin kya rya na lah lan khyh oh.

⁹Athadynpaw ccathae kha rungkou te he na rue takaw oh te, lonaw naw sari na ria cih oh.

¹⁰Oute BAWIPAW nae Pachia kyate na mue oh paw hythuanaw alung azya thyhte, lungthote silawnawpaw kha thuakhaete, BAWIPAW nae Pachia hanlan lonaw poi kha na tua cih oh.

¹¹BAWIPAW nae Pachia nynh amaw min a um nawlan a po cih paw hmin kyakhe, naemaw, nae ccapaw hae te nae ccanung hae, nae seenung hae te nae seepaw hae, nae khua kya umpaw Levi phin hae, nanning laku e mikhia hae, ngawraw hae te nomae hae nynh BAWIPAW nae Pachia malang khe nae lungtua sah.

¹²Izip ram kya see lang na la tang oh paw kha liathui oh lah, hynh-e phungbya hae hynh zuakute zui oh.

¹³Nae huimin te nae misu mianaw khu kyate apoupaw kha he na ccakhung kou oh te, nin sari lungkhu bu poi kha na tua cih oh.

¹⁴Naemaw, nae ccapaw hae te nae ccanung hae, nae seepaw hae te nae seenung hae, nae khua kya um hae paw Levi phin hae, mikhia hae, ngawraw hae te nomae hae nynh poi na tua lya oh khe nae lungtua sah.

¹⁵BAWIPAW nynh a po cih paw hmin kyakhe nin sari lungkhu BAWIPAW nae Pachia hanlan poi na tuapah cih oh; BAWIPAW nae Pachia nynh nae looh na voisah oh paw balyn kya te na cyi oh paw balyn kya hythua ae pya cih keiccu oh ze, poi kha na tua ccaccing cih oh.

¹⁶Pise balyn nynh ransi phing leipaw sanlou poi, lonaw poi te bu poi kyakhe BAWIPAW nae Pachia malang, BAWIPAW nynh a po cih paw hmin kyakhe kum kheit ze vae thum a langkuh cih hae. Minmin nynh BAWIPAW malang khe kuih ccakaete langkuh lan khyh hae;

¹⁷BAWIPAW nae Pachia nynh ae pya oh paw hythuanaw thyhte ccungccaw balyn nynh mih taeningnaw thyhte a pya cih hae.

¹⁸BAWIPAW nae Pachia nynh ae pya oh paw nae khua balyn kyakhe byapiatu hae te bawi hae kha nae phin takyh kya na khang cih oh zah minmin nynh ccungccaw hae hanlan ahmepaw byapaenaw kha a raepah cih hae.

¹⁹Ahme lei lante bya na pia lan khyh; ccungccaw mae na do lan khyh; pyaruh kha na lawkuh lan khyh, pawccecize ahme leipaw lasung nynh ahawpaw mit kha mohsah zah midingpaw bya kha a paleihsahku.

²⁰BAWIPAW nae Pachia nynh ae pya cih oh paw ram kha ccoute na hiin nawlan oh, byadingpaw kyalya kha na zui cih oh.

²¹BAWIPAW nae Pachia hanlan na rae oh paw silawhang pe khe pawpaw thingku kha mah Asherah zohtuh tung lante na bing lan khyh oh;

²²te BAWIPAW na Pachia nynh a huapaw lungbing kha na bing lan khyh.