Read Zotung Chin DEUTERONOMY 17 Bible Online

DEUTERONOMY 17 - Zotung Chin bible

DEUTERONOMY 17

¹Douccah leipaw te accing leinaw ccangkhakheit a umpaw vaetua khyhze tuu khate BAWIPAW nae Pachia kalan silawnaw na rae lan khyh oh; pawccecize tuh-e tuh BAWIPAW nae Pachia hanlan anungsikuhpaw nynh thua.

²BAWIPAW nae Pachia nynh ae pya cih oh paw nae khua kyakhe nopi khyhze pise nynh BAWIPAW nae Pachia mitmuihnaw kya hoyleinaw rae zah, BAWIPAW byakinnaw kha zui leite,

³kae khee oh paw ccangpaw pachia hae, khuanin thuasah, sawpaw thuasah, vaawlang umpaw ccangkhakheit kha thuasah ryalawpyate a beikpaw kha,

⁴nanning kya hopya athua ze thuasah, na thae oh ze thuasah, akaw-aleih na khia oh zah, Israel hae kya tuhcihawpaw anungsikuhpaw uccaw cyi athua ccaccingpaw kha nanning laku kya muih athua zetuh,

⁵tuh-e hoyleinaw a raepaw nopi khyhze pise tuh nae koikua kalan na poukhae cih oh zah, lung te phe chih lan na deih cih oh.

⁶A nyhtu ccaekia lu ning khyhze lu thum a um ze, chia athua cih; ccaekia lu kheit kyalya a um ze, chia thua lan khyh.

⁷Tuh-e ccungccaw kha chia khylan a nyhtu ccaekia hae nynh masaty mih kuih a hang cih hae, tukoute ccungccaw balyn nynh mih kuih a hang cih hae. Tuhcite hoyleinaw kha nanning laku te ccikan athua cih.

⁸Ccungccaw chiakunaw kong, kaethekunaw kong te ziaku buakunaw kong, tuhcihawpaw byalungnaw ccangkhakheit kha nae khua kya um zah, nae hanlan byapaenaw rae lan myaryamaw aru lanze, BAWIPAW nae Pachia nynh a popaw hmin kalan arangte na cceih cih oh zah,

⁹tuh ccyh lyaze byapiatu rya a lahtu te Levi phin ranpibawi hae kalan na thuakhae cih oh zah, minmin nynh tuh-e kong byapaenaw kha ae thaesah cih oh.

¹⁰BAWIPAW nynh a po cih paw hmin kyate nanning kalan ae thaesah oh paw byapaenaw kha hmerarih lan zui oh lah, minmin nynh ae ccangpya oh paw atyn-are kha zuakute zui oh.

¹¹Nanning hanlan ae ccaesahpya oh paw upadi te ae hopya oh paw byapaenaw kha phe ccing lan na cyih cih oh; minmin nynh ae thaesah oh paw byapaenaw kyate voilang ranglang maekuh nan oh.

¹²BAWIPAW nae Pachia hanlan ryalawpya lan khang athuapaw ranpibawi khyhze byapiatu bya kha ngae leite a cyih nganpaw tuh a chih cih. Tuhcite hoyleinaw kha Israel kyate na ccikan cih oh.

¹³Ccungccaw balyn nynh a thae hae te, a rih cih hae zah bua cyih ngan vae lan khyh hae.

¹⁴BAWIPAW nae Pachia nynh ae pya cih oh paw ram lungkhu lang teete na ccou oh zah tuin kya khua na sah oh te, nanning nynh, “Kae pepan umpaw minphuin balyn hawte oun uktu lang siapharan kha kae khangkuh cih,” cite he na ci oh te,

¹⁵BAWIPAW nae Pachia nynh a po cih paw siapharan kha nanning uk khylan na khangkuh ccaccing cih oh. Nae uno hae kya-e lu kheit kha nanning uk khylan siapharan lang na khangkuh cih oh; nae uno athua leipaw ramccangpaw kha nanning uktu lang na khangkuh kho khyh oh.

¹⁶Tuh-e siapharan nynh amaw hanlan marang patae hoi lan khyh, marang houh lung lan hoi khylan Izip ram lang ccungccaw hae kha kisah lan khyh hae, pawccecize BAWIPAW nynh nanning kha, “Tuh-e laanpi kalan kharouh na kithui vae lan khyh oh,” ae cipya vae oh.

¹⁷Tuh-e siapharan nynh zu patae hoi lan khyh, a thinlung paleihkuh lan khyh; sui te ngun kha mah amaw hanlan pataepi hoi lan khyh.

¹⁸A peenaw kya-e siapharan haungnaw kya he a haung te, Levi phin ranpibawi hae kya umpaw, amaw hanlan zei athuapaw e upadi hynh a khawpikuh cih.

¹⁹BAWIPAW a Pachia rawrinaw kha a ccangkuh cih zah, hynh-e upadi te phungbya kya-e bya balyn kha zuakute a zui nawlan, tuh-e phungbya tuh amaw kya tyty a um cih zah a lungkhu umpaw kha a hiin lungkhu balyn a ria cih,

²⁰amaw te a ciihan hae nynh Israel ram kya a peenaw kha khaw cia a uk nawlan hae, ccangpaw a uno hae tungvaw lysakuh lan khyh zah, kawbya kyate voilang ranglang maekuh lan khyh.