Read Zotung Chin DEUTERONOMY 18 Bible Online

DEUTERONOMY 18 - Zotung Chin bible

DEUTERONOMY 18

¹Levi phin ranpibawi hae, Levi phin balyn tuh neekupaw uccaw khyhze rho kha Israel laku kya hoi lan khyh hae. BAWIPAW hanpaw silawnawpaw hae kha a ae kho hae,

²thuasalama mih uno hae laku kya rho kha hoi lan khyh hae; BAWIPAW nynh bya a kinpyaku hae thyhte, BAWIPAW tuh mih rho nynh thua.

³Hynh-e hynh ccungccaw hae nynh si a lawnaw hae paw vaetua khyhze tuu kyate ranpibawi hae nynh a ccou lan hae paw athua cih: minmin nynh ranpibawi kalan alya, akhaw ccangning te avuepi kha a pya cih hae.

⁴Masaty na rue oh paw nae ccathae, nae misutui, nae chitui te na ngo ty oh paw nae tuuming kha amaw kalan na pya cih oh.

⁵Pawccecize BAWIPAW nae Pachia nynh Levi te a ccapaw hae kha BAWIPAW min te thadyn khylan te ryalaw khylan nae phin balyn kyate zungzae hanlan a po vae hae.

⁶Levi phin lukhakheit nynh a la umnaw Israel ram, nae khua khuakhakheit kyate yn pou zah, BAWIPAW nynh a po cih paw hmin kalan (thua a ry takyhte yn thua kho zah), he yn thua lanze,

⁷tuh-e hmin kya BAWIPAW malang ryalaw khylan a thadyn hae paw a ruiban Levi phin balyn hawte, BAWIPAW a Pachia min te rya a lah cih.

⁸aning tuh innbyn rho hae zuanaw kyate a muepaw uccaw a hoi zemah, aning nynh a hanpaw ae lanpaw kha alokuh lante a muebua cih.

⁹BAWIPAW nae Pachia nynh ae pya cih oh paw ram lungkhu lang he na tee oh te, tuin ram e minphuin hae kya-e anungsikuhpaw cyisahnaw kha thy na dokuh lan khyh oh.

¹⁰Nanning laku kya a ccapaw khate thuasah, a ccanung khate thuasah maee te si a lawkuhpaw, apawepaw, beidin hothyapaw, kuihdothyapaw, mitleihthyapaw,

¹¹naawthyapaw, khozi bahkuhpaw, chihiinleihthyapaw lu kheit sanmah na um lan khyh oh.

¹²Pawccecize hynh-e hae acyihthya hae paw tuh BAWIPAW hanlan anungsikuhpaw nynh thua hae; hynhcihaw anungsikuhpaw cyisahnaw keiccuze BAWIPAW nae Pachia nynh minmin kha nae malang te a dee cih hae.

¹³Nanning tuh BAWIPAW nae Pachia malang lungzi hae paw ccaccing na thua cih oh.

¹⁴Na dee cih oh paw minphuin hae nynh beidin hothyapaw te apawepaw bya kha a ngae hae zemah, nanning tuh BAWIPAW nae Pachia nynh tuhcite cyi lan ae ua khyh oh.

¹⁵BAWIPAW nae Pachia nynh kamaw yn lopaw profeh lu kheit kha nae hanlan naemaw minphuin kyate yn pousah cih zah, tuh-e profehbya kha na ngae cih oh.

¹⁶E hynh Horeb kya na pumku nin oh ze, nanning nynh, “BAWIPAW ka Pachia roi kha bua ka thae ung ze thuasah, hynh-e maee lepaw hynh bua ka muih ung ze thuasah ka chih cih,” cite BAWIPAW nae Pachia kalan na ngia oh paw kha nynh thua.

¹⁷Oute BAWIPAW nynh kae kha, “Minmin nynh a ho hae paw tuh akyhpaw nynh thua.

¹⁸Mih uno hae kyate nang ae lopaw profeh lu kheit kha minmin hanlan ka langsakuh cih; ka bya hae kha tuh-e profeh khalang kyakhe ka nung cih zah aning nynh kaw ka pyapaw atyn-are kha minmin kya a hopah cih hae.

¹⁹Tuh-e profeh nynh ka min te a hopaw bya a ngae leipaw lukhakheit kha kamaw ccaccei nynh bya a ngae khyhnaw kong kha ka ngia cih.

²⁰Thuasalama kae nynh ho lan kaw ka pya leipaw bya kha ka min te a hopaw profeh thuasah, ccangpaw pachia hae min te a hopaw profeh lukhakheit thuasah a chih cih,” a ci.

²¹Nanning nynh naemaw te naemaw kha, “BAWIPAW nynh a ho leipaw bya tuh pawtemou ah nyh kho cih oh?” cite na hoku oh.

²²Profeh lu kheit nynh BAWIPAW min te ho salamah tuh-e a hopaw tuh acyiku khyhze thuasah, ahme khyhze thuasah tuh-e tuh BAWIPAW nynh a ho leipaw bya nynh thua. Profeh nynh a rythyte a hodepaw nynh thua; tuh-e tuh rih nan oh.