Read Zotung Chin DEUTERONOMY 2 Bible Online

DEUTERONOMY 2 - Zotung Chin bible

DEUTERONOMY 2

¹BAWIPAW nynh yn hopya hawte aening nynh Rili Se lang khate ramkaw lang ah kithui oh zah, Seir Mua kha khaw cia ah voilu oh.

²Oute BAWIPAW nynh kae kha yn hopah zah:

³“Mua alungnaw hynh-e ram hynh khaw cia na voilu vae cih. Palung lang hawite cceih oh lah,

⁴akawlan thyhte ccungccaw hae kha hopah oh: Seir kya umpaw nae puizia Esau ciihan hae ram kya na cceih vae cih oh. Minmin nynh nanning kha ae rih cih oh,

⁵tukeiccuze minmin ryte rhaw na tukku khyh nawlan oh, hoyte raeringkuh oh, pawccecize mih ram kha ccuphe lyh sanmah nanning kae pya khyh oh, Seir Mua kha Esau uccaw lang phe ka pya vae.

⁶Na ae lan oh paw looh kha minmin kyate phua te na rekuh cih oh; na nia lan oh paw tui kha mah phua te minmin kya-e na rekuh cih oh.

⁷Na cyi oh paw miakaw kya BAWIPAW nae Pachia nynh hythua ae pya ccaccing vae oh; e ramkaw pi kya na ccia oh paw kha phe a ny. BAWIPAW nae Pachia nynh kum sung pali lungkhu ae umkhae oh zah nae hanlan pawpaw mah ahoboupaw um khyh,” yn cipya.

⁸Tukeiccuze aening nynh Seir kya umpaw ah puizia Esau ciihan hae pe khe ah cceih oh zah, Arabah laanpi kha cciatawte, Elath te Eziongeber kha mah cciatawte ah cceih oh. Moab ramkaw lang po a cceihpaw laanpi lang he ah cceih oh te,

⁹BAWIPAW nynh kae kha yn hopah zah: “Moab kha vawsaw pya nan oh lah rhawtuk nan oh, pawccecize khah-e ram kha lytaraw sanmah nae ram lang kae pya lan khyh oh, pawccecize Ar ram kha Lot ciihan hae ram lang phe ka pya vae hae,” yn cipya.

¹⁰(langmaw lyaze tuin ram kya Anak hae hawte hang hae zah ale hae paw te alung hae paw Emin hae nynh a la um hae.

¹¹Moab hae nynh minmin kha Emin cite a ko hae zemah Anak hae hawte minmin kha Refa hae lang nynh a ria hae.

¹²Tuhpiaze, langmaw lyaze Hor hae nynh Seir ram kya a la um hae, thuasalama BAWIPAW nynh Israel hae a pya hae paw ram kya Israel hae nynh a cyi hae hawte Esau ciihan hae nynh Hor hae kha luadete theih hae zah Hor hae a umnaw hae kyakhe khua a sah hae.)

¹³“Oute atu, Zered Vaw kha zua khylan thokuh oh,” yn cipya. Tukeiccuze Zered Vaw kha ah zua oh.

¹⁴Kadesh-barnea kyate ah thokuh oh zah Zered Vaw phe ah zua oh cia, BAWIPAW nynh rhawkaw hae konglang thyalawnaw bya kha a ho vae thyhte, tuh-e she e rhawkaw hae tuh ryahmin kyate marya a chih hae cia, sung thum kum tarya aro.

¹⁵Ryahmin kyate minmin kha maemih khylan pong a chi mawlaezung hae, BAWIPAW kuih ccaccei nynh minmin kha a rawse ccaccing hae.

¹⁶Ccungccaw hae laku kyate rhawkaw hae balyn he a chih kou takaw hae te,

¹⁷BAWIPAW nynh kae kha yn hopah zah,

¹⁸“Atunin nanning nynh Moab ramri, Ar kyakhe po na cceih cih oh.

¹⁹Ammon hae ramri lang he na naekuh oh te, minmin kha vawsaw na pya lan khyh oh zah na tuk lan khyh oh, Ammon hae ram kha Lot ciihan hae kalan phe ka pya vae keiccu hae ze, nanning kha rho lang kae pya vae lan khyh oh,” yn cipya.

²⁰(Tuh-e ram mah Rafaim hae ram cite ci athuabua. Ammon hae nynh minmin kha Zamzummim hae cite a ko hae zemah langmaw lyaze tuin ram kya Refa hae nynh la um hae,

²¹Zamzum hae tuh Anak hae hawte hang hae zah athawsaepaw te alung hae paw nynh thua hae. Thuasalama Ammon hae nynh minmin kha dee khylan te mih umnaw kya um khylan BAWIPAW nynh minmin kha Ammon hae malang khe a ro hae.

²²BAWIPAW nynh Seir kya umpaw Esau ciihan hae hanlan tuhmaminte a cyipya hae—Esau ciihan hae nynh Hor hae kha luadete ro lan zah mih umnaw hmin kya atunin cia um khylan mih malang khe minmin kha a ro hae.

²³Gaza pepan khua taraw hae kya a um hae paw Avvim hae kha Kaftor kyate oun thua hae paw Kaftor hae nynh theih hae zah mih umnaw hmin kyakhe a um hae.)

²⁴“Thokute cceih oh lah Arnon Vaw kha zua oh. Dotua oh, Amor minphuinpaw Heshbon siapharan Sihon te a ram kha nae kuih kya kae pya vae oh. Amaw kha tuk oh lah, ram kha law khylan tho ccavae oh.

²⁵Vaawlui zakaw umpaw ccungccaw hae kyakhe nanning ae ri nawlan oh paw te ae siiku nawlan oh paw kha atunin ka tho vae cih; nae thongpang kha he a thae hae te, nanning keiccuze a thyngkuh cih hae zah lungriathaete a um cih hae,” a ci.

²⁶Tukeiccuze Kedemoth ramkaw kyate Heshbon siapharan Sihon kalan zeccuetu hae kha akawlan e daenaw bya thyhte ka saw hae:

²⁷“Na ram kya po ccianaw kaw nae ua zetuh, laanpi kya rou ka cceih cih zah voilang ranglang ka maekuh lan khyh.

²⁸Ka ae lanpaw looh kha phua te nae zuapah cih zah ka nia lanpaw tui kha mah phua te nae zuapah cih.

²⁹BAWIPAW kae Pachia nynh oun pyapaw ram lungkhu langkhe tee khylan Jordan vaw ka zua mawlaezung, Seir kya um hae paw Esau ciihan hae te Ar kya um hae paw Moab hae nynh ka hanlan yn cyipya hae hawte, ccu te po ccianaw kaw kyalya oun ua,” ka cipya.

³⁰Thuasalama Heshbon siapharan Sihon nynh aening po ccia lanpaw kha oun ua ry khyh, pawccecize BAWIPAW nae Pachia nynh atu a cyi vae hawte, Sihon kha nanning kuih kya pya khylan a lung kha tangsah zah a thinlung kha a khungsah.

³¹BAWIPAW nynh kae kha, “Dotua, Sihon te a ram tuh namaw kalan pya lan ka tho takaw vae. A ram lawku lanpaw kha atu tho ccavae oh,” yn cipya.

³²Tukeiccuze Sihon te a ccungccaw hae balyn nynh aening kha rhawtuk khylan Jahaz kya he oun pounua hae tuh,

³³BAWIPAW ah Pachia nynh Sihon kha aening kalan oun pya; aening nynh amaw a ciihan hae te a ccungccaw hae balyn kha ah chia oh.

³⁴Tuh ccyh lyaze a khua balyn kha ah lah oh zah khua takyh kya umpaw pise hae, nopi hae te imua hae kha marya ah maemih oh. Lu kheit sanmah a hiin te ah cciataw khyh oh.

³⁵Ah luade oh paw sahiin-awvaw te ah law oh paw khua kya-e uccaw hae rou kha nynh ahmaw hanlan ah lawku oh.

³⁶Arnon accya kin umpaw Aroer khua te accya kya umpaw khua kyate tho zah Gilead kyacia aening hanlan myarya ahangpaw khua khuakheit sanmah um khyh. BAWIPAW ah Pachia nynh atyn-are kha oun pya.

³⁷Thuasalama BAWIPAW ah Pachia nynh a hopaw Ammor hae ram, Jabbok vaw kin palung lang balyn te mua alungnaw e khua hae kha naeku leite ah sibia oh.