Read Zotung Chin DEUTERONOMY 20 Bible Online

DEUTERONOMY 20 - Zotung Chin bible

DEUTERONOMY 20

¹Nae rhaw hae kha tuk lan na cceih oh zah, marang hae, marangle hae, nanning laeze alung huapaw rhawkaw hae kha he na muih oh te, minmin kha na rih lan khyh oh; pawccecize Izip ram kyate ae poukhae oh paw BAWIPAW nae Pachia nynh nanning kha ae umkhae oh.

²Rhaw na tuk maw oh khe, ranpibawi nynh malang a cceih cih zah rhawkaw hae kha,

³“Pou Israel, thaetua! Atunin nae rhaw hae kha tuk khylan na naekuh vae cih oh. Minmin keiccuze nae lungroh nan sah, rih nan oh, siikuh nan oh lah thyngkuh nan oh;

⁴pawccecize nanning kha taenaw pya khylan te nanning hanlan nae rhaw hae kha tukpya khylan ae cciakhae oh paw tuh BAWIPAW nae Pachia nynh thua,” cite a hopah cih hae.

⁵Oute rhawbawi hae nynh rhawkaw hae kha, “Inn thawpaw sak zah Pachia kalan a ap loh leipaw a um tou? Tuh-e ccungccapaw tuh a inn lang kisah, tuhkhyhze tuh rhawtuknaw kya a chihsei cih zah, milae nynh tuh-e inn tuh a thyaasah sei cih.

⁶Misu khokhu kha rae salamah misu thae te a lungtuakhaekuh loh leipaw a um tou? Tuh-e ccungccapaw tuh a inn lang kisah, tuhkhyhze tuh rhawtuknaw kya a chihsei cih zah milae nynh tuh-e misu thae te a lungtuakhaekuh sei cih.

⁷Nopi kha zu lang dy salamah umkhae loh leipaw a um tou? Tuh-e ccungccapaw tuh a inn lang ki sah, tuhkhyhze tuh rhawtuknaw kya a chihsei cih zah, milae nynh tuh-e nopi tuh zu lang a umkhae sei cih,” cite a hopah cih hae.

⁸Tukoute rhawbawi hae nynh rhawkaw hae kha, “A rihpaw khyhze a rawthahpaw a um tou? Tuh-e ccungccapaw tuh a inn lang kisah, tuhkhyhze tuh a ban hae kha amaw hawte mih rawthyasah sei cih hae,” cite a hopah cih hae.

⁹Rhawbawi hae nynh rhawkaw hae kha he a hopah kou hae te, rhawkaw aphuphu cciakhaetu hae kha a khang cih hae.

¹⁰Khua khuakheit kha tuk khylan he na naenuakuh oh te, ccawkunaw bya kha na thaesah ty cih oh.

¹¹Nae kya-e ccawkunaw bya kha mih nawccah zah mih koikua a hung hae zetuh, tuin khua kya umpaw ccungccaw hae nynh nanning hanlan nangsekupaw ryalaw kha ae lawpah cih oh.

¹²Thuasalama minmin nynh nanning ryte ccawkunaw rae leite rhaw ae tuk oh zetuh, tuh-e khua kha na koihlu cih oh;

¹³te BAWIPAW nae Pachia nynh tuh-e khua kha nae kuih lungkhu lang he ae pya oh te, pise balyn kha thaloi te na bae cih oh.

¹⁴Thuasalama nopi hae, imua hae, sahiin-awvaw te khua kya umpaw atyn-are balyn kha naemaw hanlan luadepaw uccaw lante na lawkuh cih oh. BAWIPAW nae Pachia nynh ae pya oh paw nae rhaw hae kya-e luadepaw uccaw kha nae lung atuakhaekuh cih.

¹⁵Hynh-e kya umpaw minphuin hae kya-e khua hae athua leipaw, nae umnaw te myarya asawkuhpaw khua balyn kha tuhcite na cyih cih oh.

¹⁶Thuasalama BAWIPAW nae Pachia nynh rho lang ae pya cih oh paw hynh-e ccungccaw hae khua kya umpaw ahysuepaw pawpaw mah na hiin lan khyh oh.

¹⁷Hit hae, Amor hae, Kanaan hae, Periz hae, Hiv hae te Jebus hae kha BAWIPAW nae Pachia nynh kaw ae pya oh hawte pong na maemih cih oh,

¹⁸tuhteze nynh minmin nynh mih pachia hae hanlan a la cyi hae paw anungsikuhpaw uccaw balyn kha cyi khylan ae ccangpah bua lan khyh oh zah BAWIPAW nae Pachia tungvaw na sei lan khyh oh.

¹⁹Khua khuakheit kha law khylan rhawtukte khaw cia na koihlu oh ze, thingku hae kha hae te ngete na roh lan khyh oh. Thingku hae kyate athae hae kha na loku oh zemah, thingku hae kha na nge lan khyh oh. Nanning nynh thingku hae kha koihlu lan ciate, loo kya umpaw thingku hae tuh ccungccaw zawtou athua hae?

²⁰Ae lanpaw athae thae leipaw thingku nynh thua cite na ny oh paw thingku hae kyalya kha na roh cih oh; nanning te rhaw na tukkuh oh paw khua tuh a khuliaku mawlaezung koihlunaw kya mang khylan tuh-e thingku hae kha na nge cih oh.