Read Zotung Chin DEUTERONOMY 22 Bible Online

DEUTERONOMY 22 - Zotung Chin bible

DEUTERONOMY 22

¹Na innpaw kya-e vaetua khyhze tuu nynh laanpi a mesei ze, pekipya leite na do huataw lan khyh; a hoitupaw kalan na kikhaepah cih.

²A hoitupaw tuh na pe a um khyh ze thuasah, a hoitupaw kha na ny khyh ze thuasah khah-e kha na inn lang na cciakhae cih zah, a hoitupaw nynh ae ngia mawlaezung namaw kya a um cih; oute khah-e kha amaw kalan na pya cih.

³Na innpaw kya-e lann kha mah tuhmaminte na cyih cih; na innpaw kya-e boeining kha mah tuhmaminte na cyih cih; te na innpaw nynh zosah zah na muihpaw ccangpaw hankhakheit kha mah tuhmaminte na cyih cih. Bawm leite na um lan khyh.

⁴Na innpaw kya-e lann khyhze vaetua nynh laanpi kya a khuliaku ze, pekipya leite na do huataw lan khyh; a thoku nawlan na bawm cih.

⁵Nopi nynh pise uccaw kha lawkuh lan khyh, pise nynh mah nopi uccaw kha lawkuh lan khyh; pawccecize humhung zemah tuhcihawpaw a cyihpaw tuh BAWIPAW nae Pachia hanlan anungsikuhpaw nynh thua.

⁶Thingku kya thuasah, laekhu kya thuasah ataw khyhze atui kha api nynh a rya thinpaw pavaw bu kha na thuanua ze, api kha ataw hae ryte na luade lan khyh.

⁷Ngedang lungpawte na um zah na hiinshe asae nawlan, ataw kyalya kha na lawkuh cih zah api kha tuh na saw cih.

⁸Inn thawpaw na sak ze, na inn adawkuhpaw athangnaw kyakhe athungkhawkuhpaw kha po voilu lan na rae cih; tuhkhyhze tuh tuin kyate ccungccaw a ccawsei lanze, na inn kya chiise luasahpaw seinaw kha na hoi sei cih.

⁹Na misu khokhu kya ccacii phuin ning na ccoude lan khyh, tuhkhyhze tuh na tupaw ccacii athae te misu khokhu kyate apoupaw balyn tuh khaleih aroh cih hae.

¹⁰Vaetua te lann kha taphu khangkheihte lei na thue lan khyh.

¹¹Tuuming te laphan law pynkheihlan kuadekuhpaw boeining kha na lawkuh lan khyh.

¹²Na thyku oh paw boei aky kypali kyakhe ccaannawpaw boei ming kha na sae cih oh.

¹³Pise lukhakheit nynh zu hoi zah a ikhae koute nopinung kha ry vae khyh zah,

¹⁴“E nopinung hynh zu lang ka umkhae; thuasalama he ka ikhae tuh, liaccady athuanawpaw ccaekia kha ka muih khyh,” cite thethya byahote seinaw a be lanze,

¹⁵tuh-e liaccanung a nung te a paaw nynh liaccady a thuanawpaw ccaekia kha koikua kya um hae paw khuapi kya-e piccan hae kalan a thuakhae cih hae.

¹⁶Liaccanung a paaw nynh piccan hae kyakhe: “Ka ccanung kha hynh-e pisepaw kalan zu lang ka pya salamah aning nynh ry vae khyh;

¹⁷atu aning nynh liaccanung tungvaw seinaw be zah, ‘Na ccanung hynh liaccady a thuanawpaw ccaekia ka muih khyh,’ a ci. Thuasalama hynh-e hynh ka ccanung liaccady athuanawpaw ccaekia nynh thua,” cite a hopah cih hae zah, liaccanung a boeining kha khua piccan hae malang khe a daw cih hae.

¹⁸Tuh-e khua kya-e piccan hae nynh tuh-e pisepaw kha a ko cih hae zah a bua cih hae;

¹⁹tuh-e pisepaw nynh Israel liaccady lu kheit kha a thethyasah keiccuze minmin nynh ngunphua shekel za kheit a rungsah cih hae (tuh-e shekel tuh liaccanung a paaw kalan a pya cih hae). Tuh-e nopinung tuh a zu lang a tang cih; pisepaw a hiin lungkhu balyn tuh-e nopinung kha mah lan khyh.

²⁰Thuasalama tuh-e sei a benawpaw tuh kyh zah, tuh-e liaccanung kyakhe liaccady athuanawpaw ccaekia kha muih athua khyh zetuh,

²¹liaccanung kha a paaw inn thuakaw kalan a cciakhae cih hae zah, khua kya umpaw pise hae nynh lung te phe chih lan a deih cih hae, pawccecize aning nynh a paaw inn kyakhe ohhuakute Israel hae kya maethya lan umpaw kha phe a cyi vae. Tuhcite nanning laku kyate hoyleinaw kha na thyaasah cih oh.

²²Milae zu te a ihkheih hae paw pisepaw kha muih athua lanze, nopinung a ikhaepaw pisepaw te nopinung tuh, parouh mawte a chih cih hae. Tuhcite hoyleinaw kha nanning laku kyate na thyaasah cih oh.

²³Zu lang a dy vae hae paw liaccady kha pisepaw nynh khualae lungkhu thuanua zah a ikhae lanze,

²⁴minmin kha parouh mawte tuh-e khua koikua kalan na cciakhae cih oh zah, lung te phe chih lan na deih cih oh, liaccanung tuh khua kya phang a um pite bawmnaw mue khylan a sia khyh keiccu thua zah, pisepaw tuh a innpaw zu kha a kyngde keiccu nynh thua. Tuhcite hoyleinaw kha nanning laku kyate na thyaasah cih oh.

²⁵Thuasalama zu lang a dy vae hae paw liaccanung kha pise lu kheit nynh ramkaw khe thuanua zah, nopinung kha kyngdete a ikhae lanze, nopinung a ikhaetupaw pisepaw kyalya a chih cih.

²⁶Liaccanung kha pawpaw mah na cyih lan khyh oh; chinaw ciate detah khonaw lanpaw seinaw kha liaccanung nynh rae khyh, pawccecize hynh-e kong hynh a innpaw kha rawse zah a theihpaw ccungccaw lukhakheit kong te nynh aloku.

²⁷Aning nynh zu lang a dy vae hae paw nopinung kha ramkaw khe a kyngde keiccuze tuh-e nopinung nynh bawmnaw mue khylan sia salamah a khum lanpaw lu kheit sanmah um khyh.

²⁸A dy loh lei hae paw liaccady kha pise lu kheit nynh yn thuanua zah, kyngdete a ikhaepaw kha a muihbia hae ze,

²⁹a ikhaetupaw pisepaw nynh liaccanung a paaw kha ngunphua shekel sung pangaw a pya cih zah, liaccanung tuh a zu lang a tang cih. Aning nynh liaccanung kha a kyngde keiccuze a hiin lungkhu balyn tuh-e nopinung kha mah lan khyh.

³⁰Pise lukhakheit nynh a paaw zu kha zu lang umkhae lan khyh, a paaw zu kha seikhae lan khyh.