Read Zotung Chin DEUTERONOMY 23 Bible Online

DEUTERONOMY 23 - Zotung Chin bible

DEUTERONOMY 23

¹A tin koipaw nynh thuasah, a e aw athuapaw nynh thuasah a pumku hae paw BAWIPAW ccungccaw hae kalan teebua lan khyh.

²Ccalah tuh BAWIPAW ccungccaw a pumkuh hae paw kalan teebua lan khyh; a ciihan hae she hawnaw kyacia heize a pumkuh hae paw BAWIPAW ccungccaw hae kalan tee lan khyh hae.

³Amor ccungccaw nynh thuasah, Moab ccungccaw nynh thuasah a pumkuh hae paw BAWIPAW ccungccaw hae kalan tee lan khyh. Mih ciihan hae she haw kyacia heize a pumkuh hae paw BAWIPAW ccungccaw hae kalan tee lan khyh hae,

⁴pawccecize Izip ram kyate nae ccia lya oh laanryng khe minmin nynh looh te sanlou khate ae cciadue khyh oh, te nanning thyalawsah khylan Mesopotamia ram e Pethor kyate Beor ccapaw Balaam kha ae hohnuaku oh.

⁵(Tuhzemah BAWIPAW nae Pachia nynh Balaam bya kha ngaepah khyh; BAWIPAW nae Pachia nynh ae sungsah oh keiccuze, thyalawnaw kha hythuanaw lang BAWIPAW nae Pachia nynh ae paleihpya oh.)

⁶Nae hiinshe lungkhu balyn, mih hiin hoynaw khyhze mih hoirumnaw hanlan na ccungpah lan khyh oh.

⁷Edom hae kha na hua lan khyh oh, pawccecize minmin tuh nae vaeccaw hae nynh thua hae. Izip hae kha na hua lan khyh oh, pawccecize nanning tuh mih ram kya a la um hae paw ramccang hae nynh na thua oh.

⁸A saahku hae paw she thumnaw e mih ccaawno hae tuh a pumkuh hae paw BAWIPAW ccungccaw hae kalan teesah kho athua cih hae.

⁹Nae rhaw hae kha rawsete ryahmin he na tahnuaku oh te, ahoy leipaw cyisahnaw miakaw kha na sungkuh cih oh.

¹⁰Nanning laku e lukhakheit tuh khuazi ccyh kyaze pyn kyate apouthyapaw atui keiccuze athyaa leipaw lang a tang lanze, ryahmin atolang a pou cih; ryahmin lungkhu lang tee lan khyh.

¹¹Zete ccyh yn thua te, amaw te amaw kha tui te a singkuh cih zah, khuanin ccah te, ryahmin lungkhu lang a tee cih.

¹²Ryahmin atolang khe na ia nawlan oh paw hmin san kheit na hoi cih oh.

¹³Nae zunghe lante kawpia kha na hoi cih oh; atolang khe he na eih oh te, tuh-e kawpia khate akhu na karouh cih oh, te na maeleihkuh cih oh zah nae ia kha na thei cih oh.

¹⁴Pawccecize BAWIPAW nae Pachia tuh nanning khum khylan te nae rhaw hae kha nae kuih kya pya khylan nae ryahmin kya a cceih bungthung, tukeiccuze aning nynh nanning laku kya anungsikuhpaw ccangkhakheit kha a muih khyh nawlan te nanning kyate a maeleihku khyh nawlan, nae ryahmin tuh athyaa hahe cih.

¹⁵Mih bawi hae kyate nae kalan oun ccue hae paw see hae kha mih bawi hae kalan na pyathui lan khyh oh.

¹⁶Minmin tuh nae khua khuakhakheit kya a poku hae paw hmin sankhakheit, mih lungrythuanaw kyakhe nae laku kya nanning ryte a um cih hae; minmin kha na tuaa na sah lan khyh oh.

¹⁷Israel hae kya-e ccanung hae tuh beikinn ohhuanung lang tang lan khyh hae; Israel hae kya-e ccapaw hae tuh beikinn ohhuapaw lang tang lan khyh hae.

¹⁸Byakinkunaw ccangkhakheit hanlan pya khylan ohhuanung mee phua khyhze ohhuapaw mee phua kha BAWIPAW na Pachia inn lungkhu lang na thuakhae lan khyh, pawccecize tuh-e hae tuh parouh mawte BAWIPAW na Pachia hanlan anungsikuh hae paw nynh thua.

¹⁹Nae uno Israel ccungccaw tungvaw kyakhe phua thuasah, looh thuasah, koiisahkupaw ccangkhakheit thuasah ato lawkute na koiisakuh lan khyh.

²⁰Ramccangpaw na koisahkunaw kya ato na lah kho, thuasalama ccou khylan na tee vae cih paw ram kya na cyipaw balyn kya BAWIPAW na Pachia nynh hythua ae pya nawlan, na uno Israel ccungccaw kya ato lante na koiisahku kho khyh.

²¹BAWIPAW na Pachia kya byakinkunaw na rae ze, tuh-e ccingsah lanpaw kha accyh na nue lan khyh; pawccecize BAWIPAW na Pachia nynh solei ae ngia cih zah, seinaw mee kha na ingsei cih.

²²Thuasalama byakinkunaw na rae khyh ze, seinaw mee kha na ing lan khyh.

²³BAWIPAW na Pachia kalan na khalang te lungthote bya na kinku vae hawte, na khalang nynh a ho vae paw kha zuakute na cyih hahe cih.

²⁴Na innpaw kya-e misu khokhu lang na tee ze, misu thae kha na rythyte phe byn lan na ae kho, thuasalama suaa kya ccapyh san na sangkuh lan khyh.

²⁵Na innpaw kya-e athadynpaw ccathae hae laku lang na ccia ze, na kuih te na zuukuh kho, thuasalama na innpaw kya-e athadynpaw ccathae kha rungkou te na awkuh lan khyh.