Read Zotung Chin DEUTERONOMY 24 Bible Online

DEUTERONOMY 24 - Zotung Chin bible

DEUTERONOMY 24

¹Pise lu kheit nynh zu hoi zah, nopinung tungvaw nawccaw leinaw ccangkhakheit a muih keiccuze a lungccing khyh, tukeiccuze myakunawpaw ccaw zeite nopinung a kuih kya pya zah a inn kyate a cciasah; oute nopinung nynh tuh-e pisepaw inn kha cciataw zah,

²ccangpaw pise zu lang a tang.

³Oute lu ningnaw pisepaw nynh tuh-e nopinung tuh ry khyh zah, myakunawpaw ccaw zeite a kuih kya pya zah, a inn kyate a cciasah ze thuasah, lu ningnaw pisepaw tuh a chi ze thuasah,

⁴a la cciasahtupaw masaty e a vawpaw nynh a thusah vae paw tuh-e nopinung kha a zu lang dykuh thui vae lan khyh; pawccecize tuh-e tuh BAWIPAW malang anungsikuhpaw thua zah, BAWIPAW nae Pachia nynh rho lang ae pya cih oh paw ram lungkhu lang seinaw kha na thuakhae lan khyh oh.

⁵Zu a hoi thawpaw pisepaw tuh rhawtuk lan cceih lan khyh, tuh-e ryalaw te asekuhpaw ccangkhakheit kya mah naw thua lan khyh. A dykupaw a zu ryte lungpawte umkheih khylan kum kheit lungkhu a rythyte innvaw a um cih.

⁶Humhung nynh mah sungmia-lung thuasah, sungmia-lung avawlan e lung thuasah aamahkhan lante a ponpaw kha kyngpah lan khyh, pawccecize tuh-e tuh ccungccaw hiinnaw kha ponpaw lante kyngpyapaw nynh thua.

⁷Lukhakheit nynh a uno Israel ccungccaw kha ruh zah, see lang a mang ze thuasah, a zua ze thuasah nybia athua lanze, a ruhtupaw tuh a chih cih. Tuhcite hoyleinaw kha nanning laku kyate na ccikan cih oh.

⁸Vaethya ccinaw apopaw kha myarya raeringkute thungkhawkuh oh; Levi phin ranpibawi hae kha kaw ka pya hae hawte, minmin nynh ae hopya oh paw miakaw kha hoyte na zui cih oh.

⁹Izip ram kyate na ccianaw oh laanryng khe BAWIPAW nae Pachia nynh Miriam tungvaw a cyipaw kha liathui oh.

¹⁰Nae innpaw kya hankhakheit na koiisahku ze, aamahkhan lante ae pyapaw kha lawku khylan a inn lungkhu lang na tee lan khyh.

¹¹Na koiisahkupaw ccungccaw nynh aamahkhan lante ae pyapaw uccaw yn poukhae lyakhe atolang khe na ngaw cih.

¹²Tuh-e ccungccapaw tuh a ryachi lanze, aamahkhan lante ae pyapaw boeining kya na ih lan khyh.

¹³Na innpaw tuh a boeining kya ih zah nang kha hythua ae pya ccaw, aamahkhan uccaw kha khuanin a ccaw maw bua na pya cih; tuh-e tuh BAWIPAW na Pachia malang na hanlan dingnaw athua cih.

¹⁴Nae ram kya-e nae khua khuakhakheit kya umpaw nae uno Israel hae thuasah, ramccang hae thuasah a ryachi hae paw te ahoboupaw ryalahtu hae kya-e mih ryalaw mee kha na ling lan khyh oh.

¹⁵Mih ryalaw mee kha nin takyhte khuanin ccaw maw na pya cih oh, pawccecize minmin tuh ryachi hae thua hae zah, mih ryalaw mee te nynh mih vue a kuaku hae; tuhkhyhze tuh minmin nynh nanning rawsete BAWIPAW kalan a sia cih hae zah, seinaw mee kha na ingsei cih oh.

¹⁶Mih ccaaw hae hanlan nungpaaw hae kha chia thua lan khyh hae, nungpaaw hae hanlan ccaaw hae kha mah chia thua lan khyh hae; mimaw seinaw hanlan rou nynh chia athua cih hae.

¹⁷Ramccang ccungccaw kya thuasah, ngawraw kya thuasah byadingpaw kha na zosahpah lan khyh; nomaenung boeining kha aamahkhan uccaw lante na lawkuh lan khyh.

¹⁸Izip ram kya see lang na la tang oh paw te BAWIPAW nae Pachia nynh tuin kyate ae shawkhaw oh paw kha liathui oh; tukeiccuze hynh-e hynh zui lan kaw kae pya oh.

¹⁹Nae loo kya looh na rue oh zah loo kya na ning oh paw ccavui cce kheit kha law khylan na kinua vae lan khyh oh; tuh-e tuh ramccang ccungccaw, ngawraw te nomaenung hanlan nungsya athua cih, tuhteze nynh BAWIPAW nae Pachia nynh na cyi oh paw balyn kya hythua ae pya cih oh.

²⁰Nae oliv thae kha he na lo oh te, na me oh paw alaepaw kha lothui nan vae oh; tuh-e tuh ramccang ccungccaw, ngawraw te nomaenung hanlan athua cih.

²¹Nae misu khokhu kya-e misu thae kha he na lo oh te, ccamua kha lothui nan vae oh; tuh-e tuh ramccang ccungccaw, ngawraw te nomaenung hae hanlan athua cih.

²²Izip ram kya see lang na la tang oh paw kha liathui oh; tukeiccuze hynh-e hynh zui lan kaw kae pya oh.