Read Zotung Chin DEUTERONOMY 25 Bible Online

DEUTERONOMY 25 - Zotung Chin bible

DEUTERONOMY 25

¹Ccungccaw lu ning tuh byalung hae zah a kaethekuh hae, te byapiatu hae nynh minmin laku byapia hae zah, lu kheit kha dansah hae zah lu kheit kha a seisah hae.

²Aseipaw kha bua khylan a phia hae ze, byapiatu nynh tuh-e paw tuh a muihnaw kyakhe a bakhungsah cih zah, a seinaw thyhte bua lan accan zeihte a buasah cih hae.

³Vae sung pali cia buasah kho athua, tuh lae alung lan buasah kho thua vae khyh; tuh lae alung lan bua athua lanze nae uno tuh nae muihnaw kya a minpousei cih.

⁴Ccatan a tin cciamangpaw tangnuapaw mung kha na bucceih lan khyh.

⁵Pynkheihlan um hae paw u te neitaw hae kyaze lukhakheit nynh ccaaw hoi leite a chi lanze, achihpaw zu tuh milae zu lang tangsah thua lan khyh. A vawpaw uno nynh a cceih cih zah zu lang a umkhae cih, te tuh-e nopinung hanlan vawpaw ryalaw kha a lawpah cih,

⁶a upaw min tuh Israel phin kyate azo khyh nawlan, masaty a saahpaw ccatawccaw tuh achihpaw a upaw ccelang ria athua cih.

⁷Thuasalama tuh-e pisepaw nynh a upaw kya-e nomaenung kha zu lang a ry khyh ze, a upaw kya-e nomaenung nynh koikua kya um hae paw piccan hae kalan a cceihthung cih zah, “Ka vawpaw neitaw nynh a upaw min kha Israel phin kya zungzae tynsah ry khyh; kamaw hanlan vawpaw te uno ryalaw kha yn lawpah khyh,” cite a hopah cih hae.

⁸Tetuh a khua kya-e piccan hae nynh pisepaw kha a ko cih hae zah a hopah cih hae. Aning nynh, “Amaw kha zu lang ka ry khyh,” cite phe a ei zetuh,

⁹a upaw zu nynh piccan hae malang khe tuh-e pisepaw kha a ccianua cih zah, a ccu kya-e phanah kha a khahpah cih zah, a mae kha a thoi cih, te aning nynh, “E hynh a upaw inn a sakpah ry leipaw pisepaw tungvaw cyipaw nynh thua,” cite a ho cih.

¹⁰A inn tuh, “A phanah khahpya athuapaw pisepaw inn,” cite Israel hae kya ny athua vae cih.

¹¹Pise hae lu kheit te lu kheit dyykuh hae zah, lu kheitpaw zu nynh he a phia hae tuh, a dyykuh hae paw nynh ccavyng a kyngpaw a vawpaw kha pankhaw khylan a kuih dyngte tuh-e pisepaw e kha a kyng lanze,

¹²tuh-e nopinung kuih kha thoh na pae cih oh; ngaethya na umsah lan khyh oh.

¹³Nae sohrae kya adihpaw te alepaw khinlung phuin ning na hoi lan khyh oh.

¹⁴Nae inn kya adihpaw te alepaw tounawpaw phuin ning na hoi lan khyh oh.

¹⁵BAWIPAW nae Pachia nynh ae pya cih oh paw ram kya nae hiinshe asae nawlan, accingpaw te ahmepaw khinlung kyalya kha na hoi cih oh zah, accingpaw te ahmepaw tounawpaw kyalya kha na hoi cih oh.

¹⁶Pawccecize tuhcihaw uccaw a cyihpaw balyn, ahme lei lante a cyihpaw balyn kha BAWIPAW nae Pachia hanlan anungsikuhpaw nynh thua.

¹⁷Izip ram kyate na ccianaw oh laanryng kya Amalek nynh nae tungvaw a cyipaw kha thuasah,

¹⁸nanning tuh nae thawthang zah he na bang oh te, laanpi kya aebua oh zah, nae nulang nyathyapaw balyn kha pong a chia hae cipaw kha thuasah liathui oh; aning nynh Pachia kha rih khyh.

¹⁹Tukeiccuze nae rhaw hae balyn kuih kyate BAWIPAW nae Pachia nynh rho lang ccou khylan ae pya cih oh paw ram kya BAWIPAW nae Pachia nynh haeungnaw he ae pya oh te, Amalek liathuinaw kha vaawlui zakaw kyate phe na thee cih oh; tuh-e tuh la ning nan oh.