Read Zotung Chin DEUTERONOMY 27 Bible Online

DEUTERONOMY 27 - Zotung Chin bible

DEUTERONOMY 27

¹Te Moses te Israel piccan hae nynh ccungccaw balyn kha akawlan thyhte a hopya hae: Atunin kaw kae pya oh paw kawbya balyn hynh zui oh.

²BAWIPAW nae Pachia nynh ae pya cih oh paw ram lungkhu lang tee khylan Jordan vaw na zua nin oh khe, alepaw lung hae kha na bing cih oh zah, palasta te na naesah cih oh.

³BAWIPAW nae minpaaw hae Pachia nynh bya ae kinpyaku oh hawte, BAWIPAW nae Pachia nynh ae pya cih oh paw ram, mateitui te khoilutui aluanaw ram lang tee khylan vaw kha he na zua kou oh te, hynh-e upadi kya-e bya hae balyn hynh tuh-e lung hae vawlan khe na zei cih oh.

⁴Tuhcite Jordan vaw na zua kou oh te, atunin kaw kae pya oh paw lung hae kha Ebal Mua vawlan khe na bing cih oh zah palasta te na naesah cih oh.

⁵Te tuin kyakhe BAWIPAW nae Pachia hanlan sivaw zunghe mang leite lung silawhang ccangkheit kha na rae cih oh.

⁶BAWIPAW nae Pachia hanlan aw leipaw lung hae khate silawhang kha na raepah cih oh. Oute BAWIPAW nae Pachia hanlan maee-ute silawnaw kha tuh-e silawhang vawlan khe rae oh,

⁷ccawkunaw silawnaw kha rae oh lah, BAWIPAW nae Pachia malang lungtuate tuin kyakhe ae oh.

⁸E upadi kya-e bya hae hynh lung hae vawlan khe ccaerarih lan na zei cih oh.

⁹Oute Moses te Levi phin ranpibawi hae nynh Israel hae balyn kyakhe, “Pou Israel, zya dae oh lah, ngaetua oh! Atunin ccaccei maw BAWIPAW nae Pachia ccungccaw lang na tang vae oh.

¹⁰Tukeiccuze atunin kaw kae pya oh paw a kawbya hae te a phungbya hae kha zuite BAWIPAW nae Pachia bya kha ngae oh,” a cipya hae.

¹¹Tuh-e nin khe Moses nynh ccungccaw hae kha akawlan thyhte a hopya hae:

¹²Jordan vaw he na zua kou oh te, ccungccaw hae kha hythuanaw pya khylan Gerizim Mua vawlan a thadyn cih hae paw tuh: Simeon, Levi, Judah, Issakhar, Josef, te Benjamin nynh thua hae.

¹³Te thyalawnaw hanlan Ebal Mua vawlan a thadyn cih hae paw tuh: Reuben, Gad, Asher, Zebulun, Dan, te Naftali nynh thua hae.

¹⁴Oute Levi phin hae nynh Israel hae balyn kha roi myarya ccae lante hynhte a thaesah cih hae:

¹⁵“BAWIPAW hanlan anungsikuhpaw zohtuh khyhze laeekute raepaw khozi, kuih te raepaw uccaw kha raekuh zah a thuruhkuhpaw ccungccaw tuh thyalaw thuasah,” cite a thaesah cih hae. Ccungccaw balyn nynh, “Amen!” cite a leihru cih hae.

¹⁶“A nung thuasah, a paaw thuasah saw a tua leipaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

¹⁷“A innpaw paw loori lungbing kha a nuepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

¹⁸“Mitzupaw kha laante lang a cciakhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

¹⁹“Ramccangpaw, ngawraw te nomaenung kha mang ahme pite sei a phusahpaw tuh thyalaw thua sah,” cite a thaesah cih hae. Ccungccaw balyn nynh, “Amen!” a ci cih hae.

²⁰“A paaw zu kha a ikhaepaw tuh thyalaw thuasah, pawccecize a paaw zu kha a kalyngpya vae,” cite a thaesah cih hae. Ccungccaw balyn nynh, “Amen!” a ci cih hae.

²¹“Sarangpaw phinkhakheit kha a ikhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

²²“A paaw ccanung thuasah, a nung ccanung athuapaw a ccianung kha a ikhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

²³“A zu nung a ikhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

²⁴“A innpaw paw kha aruh lante a buapaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

²⁵“A sei leipaw ccungccaw chii kha luasah khylan pyaruh kha a lawkuhpaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.

²⁶“Hynh-e upadi bya hae hynh zui khyh zah a tynsah leipaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.