Read Zotung Chin DEUTERONOMY 28 Bible Online

DEUTERONOMY 28 - Zotung Chin bible

DEUTERONOMY 28

¹Atunin kaw kae pya oh paw a kawbya balyn kha zuakute na zui oh zah, BAWIPAW nae Pachia bya kyalya kha na ngae oh zetuh, BAWIPAW nae Pachia nynh laephi vaw e minphuin balyn luki ahangnaw khe ae nung cih oh;

²BAWIPAW nae Pachia bya kha na ngae oh zetuh, hynh-e hythuanaw balyn hynh nae tungvaw a thua cih zah na ccou cih oh:

³Khua kya hythua na mue cih oh, loo kya hythua na mue cih oh.

⁴Ccaaw hae te thuasah, nae laephi athae te thuasah, nae sahiin-awvaw ataw hae te thuasah, nae vaetua te nae tuutaw hae pungzaenaw te thuasah hythuapya na thua cih oh.

⁵Nae sua te nae sanlou nonnawpaw pakekhupaw kha hythuapya athua cih.

⁶Na tee vae oh ze hythuanaw na mue cih oh zah, na pou vae oh ze hythuanaw na mue cih oh.

⁷Nanning rawsete ae thonuakuh oh paw nae rhaw hae kha BAWIPAW nynh nae malang khe rhaw a shungsah cih hae; nanning rawsete laanpi ccangkheit kyakhate oun thua cih hae zah, nae malang laanpi ccangsari kyakhate a ccue cih hae.

⁸Nae ccung-inn kya te na cyi oh paw balyn kyakhe BAWIPAW nynh hythuanaw kha nae tungvaw khe kaw a pya cih; BAWIPAW nae Pachia nynh ae pya cih oh paw ram kyakhe hythua ae pya cih oh.

⁹BAWIPAW nae Pachia kawbya hae kha na zui oh zah amaw laanpi kya na ccia oh zetuh, bya ae kinpyaku oh thyhte, athyaapaw amaw ccungccaw lante BAWIPAW nynh ae tynsah cih oh.

¹⁰BAWIPAW min liate ko na thua oh paw kha laephi ccungccaw balyn nynh a muih cih hae zah nanning kha ae rih cih oh.

¹¹BAWIPAW nynh nanning pya khylan nae minpaaw hae kya bya a kinpyaku hae paw ram kyakhe sisua thuasah, nae ccaaw hae thuasah, nae sahiin-awvaw te nae laephi athae thuasah pataepi a hoipaw lang ae rae cih oh.

¹²Nae ram kya amaw accyh te khuaarawsah khylan te na cyi oh paw balyn kya hythuapya khylan, BAWIPAW nynh ahoirumpaw a sisuainn, vaawlang kha nae hanlan ae hungpah cih oh. Minphuin patae kha na koiisakuh cih oh, thuasalama nanning nynh minmin kya-e kha na koii lan khyh oh.

¹³Atunin kaw kae pya oh paw BAWIPAW nae Pachia kawbya hae hynh na ngae oh zah, zuakute na zui oh ze thuasah, te ccangpaw pachia hae kha zuite beik khylan atunin kaw kae pya oh paw bya balyn kyate voilang ranglang na maeku khyh oh ze thuasah BAWIPAW nynh nanning kha lu lang ae rae cih oh zah, aleihmae lang ae rae lan khyh oh; ahang huanaw kya rou khe na um cih oh zah, ane huanaw kya na um lan khyh oh.

¹⁴

¹⁵Thuasalama atunin kaw kae pya oh paw BAWIPAW nae Pachia kawbya hae te phungbya hae kha zuakute zui leite amaw bya kha na ngae khyh oh zetuh, hynh-e thyalawnaw balyn hynh nae tungvaw ae thuanua cih oh:

¹⁶Nae khua kya thyalawnaw na tung cih oh, nae loo kya thyalawnaw na tung cih oh.

¹⁷Nae sua kya te sanlou nonnawpaw nae pakekhupaw kya thyalaw na thua cih oh.

¹⁸Nae ccaaw hae kha thuasah, nae laephi athae kha thuasah, nae vaetua phu te nae tuuphu ataw hae kha thuasah thyalaw athua cih hae.

¹⁹Na tee vae oh ze thyalawnaw na tung cih oh, he na pou vae oh ze thyalawnaw na tung cih oh.

²⁰Kamaw kha nae vua oh zah, ahoy leipaw nae cyisahnaw keiccuze, ro na thua oh zah arangte na zo mawlaezung oh, cyi lan na zuaku oh paw atyn-are kyakhe vawsawnaw, bungzounaw, keisukeilae nungkunaw kha BAWIPAW nynh nae tungvaw ae sawnua cih oh.

²¹Nanning nynh ccou khylan na tee cih oh paw ram kyate ae maemih mawlaezung oh, BAWIPAW nynh akaekuh thyapaw alepaw ccinaw kha ae kaesah cih oh.

²²BAWIPAW nynh nanning kha ngoinaw, ngesaw lingpaw ccinaw, phinnaw khate thuasah, myarya sonaw te khuaakannaw thuasah, te khivae keiccu aku chinaw te aphi pou zah aku chinaw khate thuasah BAWIPAW nynh vawsaw ae pya cih oh; tuh-e hae nynh na ro mawlaezung oh ae deehui cih oh.

²³Nae luki e vaawlui tuh sohin athua cih zah, nae zakaw e laephi tuh sivaw athua cih.

²⁴BAWIPAW nynh nae ram kya arahpaw khuaa kha laenoi lang a tangsah cih zah, ro na thua mawlaezung oh vaawlui kyate vuiping kyalya kha nae tungvaw khe a ccawsah cih.

²⁵Nae rhaw hae malang khe BAWIPAW nynh rhaw kha ae shungsah cih oh; minmin kha rawsete laanpi ccangkheit kyate na ccianua cih oh zah, minmin malang khe laanpi ccangsari kyate na ccue cih oh. Nanning tuh laephi peenaw balyn kya bungzounaw a thuakhaepaw lang na tang cih oh.

²⁶Nae rhua tuh khivae kya-e pavaw miakaw te laephi kya-e sarangpaw hae hanlan looh athua cih hae zah, tuh-e hae a deetupaw lu kheit sanmah um lan khyh.

²⁷BAWIPAW nynh na dansaku kho lei oh paw Izip ram e balyh, ving ccinaw, chii ccinaw te laethah khate vawsaw ae pya cih oh.

²⁸BAWIPAW nynh ngaeenaw, mitmohnaw, te lungmuanaw khate vawsaw ae pya cih oh;

²⁹mitzupaw nynh mohnaw kya azahku hawte, nanning nynh ninthu pi khe na zahkuh cih oh, thuasalama nae laanpi kha na muihkuh kho lan khyh oh; nae laan nae sui ua lan khyh zah, ae bawm lan oh paw humhung sanmah a um lei lante luadenaw kha na tung cih oh.

³⁰Zu na dy oh zemah milae nynh ae ikhaepah cih oh. Inn na sakku oh zemah na umnah lan khyh oh. Misu khokhu na raeku oh zemah athae kha na ae lan khyh oh.

³¹Nae vaetua kha nae mitmuihnaw khe a chia hae zemah a saw kha na ae lan khyh oh. Nae lann hae kha nae malang khe luadete a cciakhae cih hae zah, na muethui vae lan khyh oh. Nae tuu hae kha nae rhaw hae kalan pya athua cih hae zah ae bawm lan oh paw humhung sanmah um lan khyh.

³²Nae ccapaw hae te nae ccanung hae kha phang na do lya oh khe, milae kalan pya athua cih hae; minmin kha nae mit te ninlang na do cih oh, thuasalama ccangkhakheit cyi khonawpaw thawzung na hoi lan khyh oh.

³³Na ny lei oh paw ccungccaw hae nynh nae laephi kya-e athae te nae ryalaw mee balyn kha a ae cih hae; nanning tuh vawsaw pyanaw te sydenaw kha po na ing cih oh,

³⁴nae mit nynh a muih cih paw uccaw keiccuze nae lung amuakhaekuh cih.

³⁵BAWIPAW nynh nae ccukharu te nae ccu kyakhe dansah kho athua leipaw myarya ccihpaw balyh hae kha ae hoisah cih oh zah, nae ccuphe kyate nae lukhy cia apazaekuh cih.

³⁶Nanning kha thuasah, na hangthungku oh paw siapharan kha thuasah nanning te nae minpaaw hae nynh na ny lei oh paw minphuin kalan khe BAWIPAW nynh ae cciakhae cih oh zah, tuin kyakhe thing te thuasah, lung te thuasah raepaw ccangpaw pachia hae kha na beik cih oh.

³⁷BAWIPAW nynh ae cciakhae cihnaw oh ccungccaw hae laku khe nanning tuh ri lan umpaw, tousenaw phungpaw lang, te dothatheihpaw lang na tang cih oh.

³⁸Ccacii patae kha loo lang na cciakhae oh zemah tungkhipaw nynh a ae keiccuze beihtaraw kyalya kha na rue cih oh.

³⁹Misu khokhu hae kya misu na ccou cih oh zah na do-oih oh zemah ripaw nynh a ae keiccuze misutui kha na neih lan khyh oh zah athae kha na lokuh lan khyh oh.

⁴⁰Nae ram balyn kya oliv ku kha na hoi oh zemah nae oliv thae tuh akhuaku keiccuze oliv chitui kha na thuhkuh lan khyh oh.

⁴¹Ccanung hae te ccapaw hae kha na saahku oh zemah rhaw hae nynh a kyng keiccu hae ze, nae kya-e thua lan khyh hae.

⁴²Nae thingku balyn te nae laephi athae balyn tuh tarue hae nynh a zoukhae cih hae.

⁴³Nanning laku e ramccang hae tuh nanning luki houhouh a hangku thung lya hae khe, nanning tuh houhouh na ccahbung cih oh.

⁴⁴Nanning nynh minmin kha koiisahku leite minmin nynh nanning kha ae koiisakuh cih oh; minmin tuh lu athua cih hae zah nanning tuh aleihmae na thua cih oh.

⁴⁵BAWIPAW nae Pachia nynh kaw ae pya oh paw kawbya hae te phunglang hae kha zuite amaw bya kha na ngae khyh keiccu oh ze, nanning tuh ro na thua mawlaezung oh, hynh-e thyalawnaw balyn nynh nanning kha deehuite ae phah cih oh zah nae tungvaw accah cih.

⁴⁶Tuh-e thyalawnaw hae tuh nanning te nae ciihan hae tungvaw kya muihsahnaw te ngaeangnaw lante zungzae a um cih.

⁴⁷Atyn-are he na hoi oh te, lungtuanaw thinlung khate BAWIPAW nae Pachia kha lungtuate na beik khyh oh,

⁴⁸tukeiccuze BAWIPAW nynh ae sawnua cih oh paw nae rhaw hae kha vuelaw tuihaw te, boeining lawku leite, atyn-are ahobou lante rya na lawpah cih oh. BAWIPAW nynh nanning kha ae ro mawlaezung oh sivaw taphu kha nae nging kya ae khang cih oh.

⁴⁹Nanning kha mosipi hawte uingnuaku khylan, mih bya na thae lei oh paw, akum tangpaw kha sawtua leite akum nopaw kha mah thaw a ccih leipaw, thinrianaw mitmae a hoipaw minphuin kha BAWIPAW nynh asawnaw, laephi adianaw kyate ae konua cih oh.

⁵⁰

⁵¹Nanning na ro mawlaezung oh, tuh-e minphuin nynh nae sahiin-awvaw ataw hae te nae laephi athae kha a ae cih, nanning kha ae ro mawlaezung oh, ccathae, misutui te chitui kha thuasah, nae vaetua pungzaenaw te nae tuu ano hae paw kha thuasah ae cciatawpah lan khyh oh.

⁵²Nae ram balyn kya umpaw, na doliaku oh paw, ahangpaw te atynpaw nae lungrua hae kha a ting mawlaezung hae, nae khua balyn kha ae koihlu cih oh; BAWIPAW nae Pachia nynh ae pya oh paw ram balyn kya umpaw nae khua balyn kha ae koihlu cih oh.

⁵³Nae rhaw hae nynh ae koihlu oh zah vawsawnaw kha he ae pya oh tuh, BAWIPAW nae Pachia nynh ae pya oh paw, na saahku oh paw nae ccanung hae te nae ccapaw hae saw kha na ae cih oh.

⁵⁴Nanning laku e ozia anepaw te asung-epaw pise nynh a uno hae, a pompaw a zu te nyathya a hiinhypaw a ccaaw hae tungvaw hysah lan khyh zah,

⁵⁵aning nynh a ae cciamangpaw a ccaaw hae saw kha heize ccapyh san pyabua lan khyh hae, pawccecize nae rhaw hae nynh nae khua balyn kha koihlute vawsaw ae pya cih keiccu oh ze, amaw hanlan pawpaw mah umlae vae khyh.

⁵⁶Nanning lakuze myaryamaw a ozia ne zah a sung-e keiccuze a ccuphe te laephi a sy ngan leipaw, ozia anepaw te asung-epaw nopi nynh a pompaw a vawpaw tungvaw thuasah, a ccanung tungvaw thuasah, a ccapaw tungvaw thuasah looh kha hysah lan khyh zah,

⁵⁷nae khua hae kha rhaw nynh koihlu hae zah, ae lanpaw pawpaw mah a um vae khyh keiccuze a saahpaw a ccaaw hae te a phae te a phae laku kyate a poupaw a lang kha heize aruh lante a ae cih.

⁵⁸Hynh-e aphu-epaw te ri lan umpaw min, BAWIPAW nae Pachia rhaw kha ri leite, hynh-e ccauh kya azeikuhpaw hynh-e upadi kya-e bya hae balyn hynh zuakute na zui khyh oh zetuh,

⁵⁹BAWIPAW nynh naemaw te nae ciihan hae tungvaw kya le zah zungzae teingpaw vawsawnaw, le zah zungzae teingpaw ccinaw kha a ccawsah cih.

⁶⁰Na ri oh paw Izip ram e ccinaw balyn kha nae tungvaw bua a thuasah cih zah, tuh-e ccinaw hae nynh nanning kya a bahkuh cih hae.

⁶¹E upadi ccauh kya azeikuh leipaw ccangpaw ccinaw te vawsawnaw miakaw kha nanning ro na thua mawlaezung oh, BAWIPAW nynh nae tungvaw a ccawsah cih.

⁶²Vaawlui e awsi zeih na la lung oh zemah, BAWIPAW nae Pachia bya kha na ngae khyh keiccu oh ze, beihtaraw kyalya nynh na um vae cih oh.

⁶³Te BAWIPAW nynh hoynaw ae raepyanaw oh kya te ae pungzaesahnaw oh kya a lungtuakhaeku hawte, nanning rosahnaw kya te zosahnaw kya BAWIPAW tuh a lungtuakhaekuh cih; ccou khylan na teenua oh paw ram kyate nanning kha ae maemih cih oh.

⁶⁴BAWIPAW nynh nanning kha laephi voikheit lang te voikheit lang cia ccungccaw balyn laku kya ae pazaesakuh cih oh; tuin kyakhe nanning te nae minpaaw hae nynh na la ny boi lei oh paw, thing te thuasah, lung te thuasah raepaw ccangpaw pachia hae kha na beik cih oh.

⁶⁵Tuh-e minphuin hae laku kya nae thawdang lan khyh zah, nae ccuphe hanlan haeungnaw mah um lan khyh. BAWIPAW nynh lungriathaenaw, mit thawzyanaw te lungthawthangnaw kha ae pya cih oh.

⁶⁶Nae hiinnaw tuh thinphangnaw te a um zungzae cih; nae hiinnaw tuh aamahkhan um leite khuazi khuadae rikawte na um cih oh.

⁶⁷Nae thinlung nynh a ripaw te nae mit nynh a muihpaw keiccuze, awkhua ccyh vae ze, “Zete myng thua ravo nyn,” na ci cih oh zah, zete ccyh vae ze, “Awkhua myng thua ravo nyn,” na ci cih oh.

⁶⁸Na muihthui vae lan khyh oh cite bya kae kinpyaku oh paw laanpi khate BAWIPAW nynh nanning kha Izip ram lang sanphalung te ae kikhae cih oh; tuin kyakhe naemaw te naemaw kha seenung te seepaw lante nae rhaw hae kalan na zuakuh cih oh, thuasalama a retupaw um lan khyh.