Read Zotung Chin DEUTERONOMY 29 Bible Online

DEUTERONOMY 29 - Zotung Chin bible

DEUTERONOMY 29

¹Hynh-e hae hynh BAWIPAW nynh Israel hae ryte Horeb kya a raepaw byakinnaw apiaze, Israel hae ryte Moab ram kya byakinnaw rae khylan BAWIPAW nynh Moses kalan kaw a pyapaw byakinnaw kya-e bya hae nynh thua.

²Moses nynh Israel hae balyn kha pum hae zah hynhte a hopya hae: BAWIPAW nynh Izip ram nae mitmuihnaw kya Faro tungvaw thuasah, a see hae balyn kya thuasah, a ram balyn kya thuasah,

³nae mit nynh muihpaw myarya lepaw syntawnaw hae, muihsahnaw hae te myarya lepaw ngaeangnaw hae balyn kha phe na muih vae oh.

⁴Thuasalama thaethya nawlan thinlung, muih nawlan mit, thae nawlan nakaring kha BAWIPAW nynh atunin ae pya vae khyh oh.

⁵Nanning kha ramkaw kya kum sung pali lungkhu kae cciakhae vae oh. Nae tungvaw e boeining tuh pue khyh zah, nae ccu kya-e phanah mah pue khyh;

⁶Kae tuh BAWIPAW nae Pachia nynh ka thua cipaw na ny nawlan oh, sanlou kha na ae khyh oh zah misutui te ruithyapaw niapaw kha mah na neih khyh oh.

⁷Nanning nynh hynh-e hmin kya he na thua oh te, Heshbon siapharan Sihon te Bashan siapharan Og nynh aening kha rhawtuk khylan oun pounua hae zemah aening nynh phe ah tae oh.

⁸Minmin ram kha ah lah oh zah Reuben phin hae, Gad phin hae te Manasseh phin angankuh kalan khe rho lang ah pya oh.

⁹Tukeiccuze na cyi oh paw atyn-are kya nae laan nae sui a ua nawlan, hynh-e byakinnaw kya-e bya hae hynh zuakute zui oh.

¹⁰Atunin nanning tuh nae balynte, nae phin cciakhaetu hae, nae piccan hae, nae bawi hae, Israel pise balyn,

¹¹nae ccaaw hae, nae nopi hae, nae ryahmin kya umpaw ramccang hae, nae thing a tya hae paw te nae tui a the hae paw tuh BAWIPAW nae Pachia malang khe na thadyn oh,

¹²tuh-e na thadyn oh paw tuh BAWIPAW nae Pachia nynh nanning ryte atunin bya a kinkupaw, BAWIPAW nae Pachia kya-e byakinnaw lungkhu lang tee khylan nynh thua;

¹³oute nanning kya te nae minpaaw hae Abraham, Isak te Jakob kya bya a la kinku hawte, nanning hynh a ccungccaw lang tynsah khylan te amaw hynh nae Pachia lang tang khylan nynh thua.

¹⁴E byakinnaw hynh BAWIPAW ah Pachia malang kaening ryte hein kya atunin na thadyn oh paw nanning kyalya te raepaw thua leite,

¹⁵atunin aening kya a umbua lei hae paw ryte mah raepaw nynh thua.

¹⁶Izip ram kya pawtemou ah um oh cipaw te pawtemou minphuin hae laku kya po ah ccia oh cipaw kha na ny oh.

¹⁷Minmin kya umpaw anungsikuhpaw mih uccaw hae, thing te lung te ngun te sui te raekuhpaw athupaw zohtuh hae kha na muih vae oh.

¹⁸Hynh-e minphuin hae kya-e pachia hae kha beik khylan BAWIPAW ah Pachia kyate a thinlung a maeleihkuh vae paw pise thuasah, nopi thuasah, innbyn thuasah, minphuin thuasah nanning laku a um kho. Nanning laku kya sy a hoipaw te akhahpaw tharui apopaw a um kho.

¹⁹Hynh-e byakinnaw bya kha a thae hae paw balyn nynh mih thinlung kyakhe, “Ka lungkhung thyhte ka ccia zemah ka khyn mamin,” cite a tuaku hae. (Tuh-e nynh nanning ahoypaw te ahoy leipaw balyn kha ae roh cih oh),

²⁰BAWIPAW nynh aning kha ngaethya lan khyh, BAWIPAW thinrianaw te eiungnaw tuh aning tungvaw maeekhuh hawte akhuh cih. Hynh-e ccauh kya azeikuhpaw thyalawnaw balyn hynh a tungvaw accah cih zah, BAWIPAW nynh a min kha vaawlui zakaw kyate a thee cih.

²¹Hynh-e upadi ccauh kya zeikuhpaw byakinnaw kya-e thyalawnaw balyn thyhte, BAWIPAW nynh aning kha Israel phin balyn kyate vawsawnaw pya khylan a phia cih.

²²Malang she kya, nanning nukhute oun pui cih hae paw nae ccaaw hae te asawnaw ram kyate oun thua hae paw ramccang hae nynh hynh-e ram a ronaw te BAWIPAW nynh a ingsah hae paw vawsawnaw kha a muih cih hae,

²³tuh-e ram balyn tuh kemaee te loi te karae u zah ccacii ccou leinaw, athae thae leinaw te aku po leinaw nynh thua; BAWIPAW nynh a thinria zah a ropaw Sodom, Gomorrah, Admah te Zeboiim ronaw hawte nynh thua.

²⁴minmin te minphuin balyn nynh, “E ram kya BAWIPAW nynh pawcce hynhte a cyi? E myarya lepaw thinrianaw hynh paw keiccu mou?” cite mih ngaeang athua cih.

²⁵Tuh-e ccungccaw hae nynh, “Izip ram kyate he a poukhae hae te, mih minpaaw hae Pachia, BAWIPAW nynh minmin ryte a la raepaw byakinnaw kha a vua keiccu hae nynh thua.

²⁶Minmin nynh maeleihkuh hae zah a la ny lei hae paw te BAWIPAW nynh a khee hae paw ccangpaw pachia hae kha a beik hae;

²⁷tukeiccuze BAWIPAW thinrianaw nynh tuh-e ram kha maee lang ruanua zah, hynh-e ccauh kya azeikuhpaw thyalawnaw miakaw kha tuh-e ram kya a thuasah.

²⁸Thinrianaw, thinkhykunaw te myarya lepaw bungpawnaw khate BAWIPAW nynh minmin kha mih ram kyate dee hae zah, atu acyiku hawte ccangpaw ram lungkhu lang a vua hae,” cite a ho cih hae.

²⁹Thuruhpaw uccaw hae tuh BAWIPAW ah Pachia kya-e nynh thua, thuasalama hynh-e upadi kya-e bya hae balyn hynh zui khylan phy athuapaw uccaw hae tuh zungzaete aening te ah ccaaw hae kya-e nynh thua.