Read Zotung Chin DEUTERONOMY 3 Bible Online

DEUTERONOMY 3 - Zotung Chin bible

DEUTERONOMY 3

¹Aening nynh Bashan laanpi lang he ah cceihthung oh tuh, Bashan siapharan Og te a ccungccaw hae balyn nynh aening kha Edrei kya rhawtuk khylan oun pounua hae.

²BAWIPAW nynh ka kyakhe, “Amaw kha rih nan, pawccecize amaw ryte a ccungccaw hae te a ram hae kha na kuih kya kae pya vae. Heshbon a uktupaw Amor Siapharan Sihon tungvaw na cyi hawkhate a tungvaw kya cyitua,” yn cipya.

³Tukeiccuze BAWIPAW ah Pachia nynh Bashan siapharan Og te a ccungccaw hae balyn kha mah ah kuih kya oun pya. Ahiinpaw lu kheit sanmah a um lei lan ciate ah tae oh.

⁴Tuh ccyh lyaze a khua balyn kha ah law oh; aening nynh minmin kyate khua sung taruh, Argob pee marya te Bashan kya umpaw Og peenaw kha ah lah oh zah ah law lei oh paw khua khuakheit sanmah um khyh.

⁵E khua hae balyn tuh myarya lepaw khua hae patae apiaze, ahangpaw lungrua, koikua thyh ning, thingccaw hae te koihlupaw khua hae nynh thua hae.

⁶Heshbon siapharan Sihon tungvaw ah cyi oh hawte, minmin kha marya ah roh oh zah, khua raveih kya umpaw nopi hae, pise hae te imua hae kha khaleih ah chia oh.

⁷Thuasalama sahiin-awvaw balyn te khua hae kya-e ah luade oh paw uccaw hae kha tuh ahmaw hanlan ah nungku oh.

⁸Tukeiccuze tuh-e ccyh lyaze Amor hae siapharan lu ning kyate Jordan vaw nithua lang e ram, Arnon vaw kin kyate Hermon mua kyacia,

⁹(Sidon hae nynh Hermon kha Sirion cite ko hae zah, Amor hae nynh tuh Senir cite a ko hae),

¹⁰mua sangpyng hae kya umpaw khua hae balyn, Gilead ram khaleih, Bahsan ram abalyn, Salekah te Edrei kyacia Bashan kya umpaw Og a peenaw e khua hae kha ah law oh.

¹¹(Atu tuh Refa hae kya-e Bashan siapharan Og rou nynh a laehy vae. A ikhung, sivaw ikhung kha Amor hae khua Rabbah kya muih kho athua ung. Ccungccaw dong te dong takua sae zah dong pali ako.)

¹²Ram kha ah la law lya oh ze, Arnon Vaw kin umpaw Aroer palung lang, mua alungnaw Gilead ram angankuh te tuin kya-e khua hae kha Reuben phin hae te Gad phin hae kalan ka pya hae,

¹³te Gilead ram alaepaw te Og peenaw Bashan abalyn kha Manasseh phin angankuh kalan ka pya hae. (Argob pee abalyn: Refa hae ram cite leih a ko hae paw Bashan abalyn kha nynh thua;

¹⁴Manasseh phin athuapaw Jair nynh Argob pee abalyn, Geshur hae te Maakath hae ramri kyacia a lawku, Bashan acikuh hae paw khua hae tuh amaw min kha phu zah, amaw koute atunin cia Havvoth-jair a ci hae.)

¹⁵Makhir tuh Gilead khua kha ka pya.

¹⁶Reuben phin hae te Gad phin hae tuh Gilead kyate Arnon vaw kin cia, tuh-e vaw kin angaelung tuh ramri lante, Ammon hae ramri athuapaw Jabbok vaw kin cia ka pya hae.

¹⁷Arabah kha mah Jordan vaw te a vahue hae ryte, Khinnereth kyate Arabah rili, Rili Chihpaw kyacia, nithua lang umpaw Pisgah mua a nebungnaw balyn rykhate ka pya hae.

¹⁸Tuh ccyh lyaze nanning kha akawlan thyhte kae hopya oh: “BAWIPAW nae Pachia nynh e ram hynh nanning ccou khylan ae pya vae oh salamah nae rhawkaw hae balyn tuh nae puizia Israel rhawkaw hae hawte zunghe ccyngkute khuraw lang a zua cih hae.

¹⁹Nae zu hae, nae ccaaw hae te nae sahiin-awvaw hae kha tuh kae pya oh paw khua hae kya a umsya cih hae (sahiin-awvaw patae na hoi oh cipaw ka ny).

²⁰BAWIPAW nynh nae puizia hae kha nanning hawte haeungnaw pya hae zah, BAWIPAW nae Pachia nynh minmin a pya cih hae paw Jordan vaw nithua lang he a ccou hae te, nanning lu kheit cci tuh kae pya vae oh paw ram lang na ki cih oh,” kae cipya oh.

²¹Te tuh ccyh lyaze Joshua kha mah ka hopah zah, “BAWIPAW na Pachia nynh hynh-e siapharan lu ning tungvaw a cyipaw atyn-are kha na mit ccaccei te phe na muih vae; tukeiccuze alungkhu kya po na cceih vae cih paw ram balyn kyakhe BAWIPAW nynh yn cyih cih.

²²Minmin kha rih nan hae, pawccecize BAWIPAW nae Pachia tuh na hanlan rhaw ae tukpah paw nynh thua,” ka cipya.

²³Tuh ccyh lyaze BAWIPAW kha thawte ka ngiakuh zah,

²⁴“Pou BAWIPAW Pachia, na lesaenaw te na thungnaw kha na seepaw kya langsahpya lanpaw kha tho kyalya nynh na tho ung; vaawlui kya te laephi vawlan umpaw pawcihawpaw pachia nynh mou nang na raepaw hawte cyisahnaw te thungnaw kha a rae kho?

²⁵Jordan vaw khuraw lang e ram hoypaw mua alungnaw ram, ahoypaw te Lebanon kha muih khylan khuraw lang beih yn zuasah,” ka cipya.

²⁶Thuasalama nanning konglang te BAWIPAW nynh ka tungvaw a thinria zah ka bya kha yn ngaepah khyh. BAWIPAW nynh kae kha, “Zawsah! Hynh-e konglang hynh kharouhmaw bua yn hopah nan vae!

²⁷Pisgah mua dung langkhe kaethung lah nithua, niccaw, palung lang, alia lang na pepan kha dotua. Hoyte do, pawccecize hynh-e Jordan vaw hynh na zua vae lan khyh.

²⁸Thuasalama Joshua kha hopya tua, amaw kha lungtangsah lah thawzung pyatua, pawccecize aning tuh hynh-e ccungccaw hae hynh lupi lante po a cciakhae cih hae zah, na muih cih paw ram te ram kya-e khyndadyh lante a ccousah cih hae paw nynh thua,” yn cipya.

²⁹Tukeiccuze Beth-peor te arawsekunaw accya kyakhe ah um oh.