Read Zotung Chin DEUTERONOMY 30 Bible Online

DEUTERONOMY 30 - Zotung Chin bible

DEUTERONOMY 30

¹Nae malang ka nungpaw hynh-e uccaw hae balyn, hythuanaw te thyalawnaw hae hynh nae tungvaw he a cyihkuh te, BAWIPAW nae Pachia nynh ae deenaw oh minphuin hae laku khe tuh-e tuh na nyhthui oh zah,

²BAWIPAW nae Pachia kalan maeleihkute, atunin kaw kae pya oh thyhte, nanning te nae ccaaw hae nynh nae thinlung balyn te, nae tuanaw balyn te amaw bya kha na ngae oh zetuh,

³BAWIPAW nae Pachia nynh hoirumnaw kha pyathuite, thaw ae ccih cih oh zah, BAWIPAW nae Pachia nynh ae pazaesahkunaw oh ccungccaw balyn kyate ae sueluathui cih oh.

⁴Laephi adianaw cia dee na thua oh zemah, BAWIPAW nae Pachia nynh tuin kyate ae sueluathui cih oh zah, tuin kyate ae kikhae thui cih oh.

⁵Nae minpaaw hae nynh la ccou hae paw ram lungkhu langkhe BAWIPAW nae Pachia nynh ae cciakhae cih oh zah, tuh-e ram tuh na ccou cih oh; nae minpaaw hae laeze a hoi huapaw te a lung huapaw lang ae rae cih oh.

⁶Tuhpiaze, nanning hiin khylan BAWIPAW nae Pachia kha nae thinlung balyn te, nae tuanaw balyn te na sungsah oh ccaw cite, BAWIPAW nae Pachia nynh nae thinlung te nae ciihan hae thinlung vingdung kha a aw cih.

⁷BAWIPAW nae Pachia nynh hynh-e thyalawnaw balyn hynh nae rhaw hae tungvaw te nanning vawsaw ae pya oh paw tungvaw kyakhe a ccawsah cih.

⁸Oute atunin kaw kae pya oh paw a kawbya balyn hynh zuite BAWIPAW bya kha na ngaethui cih oh,

⁹te BAWIPAW nae Pachia nynh na cyi oh paw balyn kya thuasah, nae ccaaw hae kya thuasah, nae sahiin taw hae kya thuasah, nae laephi athae hae kya thuasah myarya a hoirumpaw lang ae rae cih oh. Nae thinlung balyn te, nae tuanaw balyn te BAWIPAW nae Pachia kalan na maeleihkuh oh zah, hynh-e upadi ccauh kya azeikuhpaw a kawbya hae te a phunglang hae hynh zuite BAWIPAW nae Pachia bya kha na ngae oh zetuh, BAWIPAW nynh nae minpaaw hae hoirumnaw kya a lungrythua hawte, nae hoirumnaw kya a lungrythua cih.

¹¹Atunin kaw kae pya oh paw hynh-e kawbya hynh nae hanlan myaryamaw arupaw te myaryamaw asawkuhpaw thua khyh.

¹²“Kawbya kha ah thae oh zah ah zui nawlan oh, hum nynh mou aening hanlan vaawlui lang a kae cih zah oun lawpah cih?” cite na ho lan oh ciate kawbya tuh vaawlui kya um khyh.

¹³“Kawbya kha ah thae oh zah ah zui nawlan oh, hum nynh mou aening hanlan rili khuraw lang oun zuapah cih zah, oun lawpah cih?” cite na ho lan oh ciate kawbya tuh rili khuraw lang um khyh.

¹⁴Bya tuh nanning te myarya anaekuh; nanning nynh zui khylan nae mung kya te nae thinlung kya nynh a um.

¹⁵Dotua oh, hiinnaw te hoirumnaw, chinaw te vawsawnaw hynh atunin nae malang ka nung vae.

¹⁶BAWIPAW nae Pachia kha sungsahte, amaw laanpi kha na zui oh zah, a kawbya hae, a phunglang hae te a phungzae hae kha zuite atunin kaw kae pya oh paw BAWIPAW nae Pachia kawbya hae hynh na zui oh zetuh, na hiin cih oh zah na pungzae cih oh, te ccou khylan na tee cih oh paw ram kya BAWIPAW nae Pachia nynh hythua ae pya cih oh.

¹⁷Thuasalama nae thinlung tuh paleihkute na thae ry khyh oh zah, ccangpaw pachia hae kha bakhungnuate beik khylan ae cciakhaesei oh zetuh,

¹⁸na roh cih oh cite atunin kae hopya oh; teenuate ccou khylan Jordan vaw na zuanua cih oh paw ram kya nae hiinshe sae lan khyh.

¹⁹Hiinnaw te chinaw, hythuanaw te thyalawnaw kha nanning malang ka nung vae cipaw atunin ccaekia lang vaaw te lae hynh ka ko hae.

²⁰Naemaw te nae ccaaw hae nynh BAWIPAW nae Pachia kha sungsahte, a bya na ngae oh zah amaw kha tynkaring lan kyngkute na hiin ccaw oh, hiinnaw kha pokuh oh; pawccecize tuh-e tuh nanning hanlan hiinnaw te hiinshe saenaw nynh thua, tuhteze nynh BAWIPAW nynh nae minpaaw hae Abraham, Isak te Jakob kya pya lan bya a kinpyaku hae paw ram kya na hiin cih oh.