Read Zotung Chin DEUTERONOMY 32 Bible Online

DEUTERONOMY 32 - Zotung Chin bible

DEUTERONOMY 32

¹Pou vaawlui hae, nae nakaring kha oun tuaku tua oh, bya ka ho cih; laephi nynh ka khalang kya-e bya hae hynh thaesah.

²Ka ccangpyanaw tuh khua hawte rah sah lah, ka bya tuh dangdy hawte ccahsah; lonua vawlan khe khuaaratui hawte, anopaw aku hae vawlan khe pharyphary rahpaw khuaa hawte thua vae sah.

³Pawccecize BAWIPAW min kha a thaesah cih hae; ah Pachia a lesaenaw kha thehoysah oh!

⁴Lungpi athuapaw Pachia, a ryalawnaw tuh ccing zah, a laanpi hae balyn tuh akyh. Alungzipaw Pachia, a hyn leipaw, ahmepaw te a dingpaw nynh thua;

⁵tuhzemah arohpaw a ccaaw hae nynh a tungvaw ahme lei lante a rae vae hae, laanpi a me hae paw te a thyaruh hae paw minphuin nynh thua hae.

⁶Pou mingaee hae te tuanaw hoi leipaw ccungccaw hae, tuhcite tou BAWIPAW kha na pyaru cih oh? Aning tuh nanning lang ae tangsah oh paw nae paaw, ae raetu oh paw te ae tynsah oh paw thua khyh tou?

⁷Langmaw e nin hae kha liathuitua, alia vae paw kum hynhsepi kha tuatua; na paaw kha khia lah, nang kha ae nysah cih; na piccan hae kha khia hae lah, ae hopah cih hae.

⁸Ahang Huaccepaw nynh minphuin hae kha mih rho nee hae zah, ccungccaw ccapaw hae kha he a phia hae te, Israel hae milu alung azya thyhte, ccungccaw hae ramri kha a ia hae;

⁹BAWIPAW nynh a ccoupaw tuh amaw ccungccaw hae kha nynh thua, Jakob tuh amaw nynh a ccoupaw rho nynh thua.

¹⁰Aning nynh Jakob kha laesia ram kya, khivae roi accaenaw ccungkia leipaw ram kyakhe a muih; Jakob kha a thungkhaw, a do-oih, a mitlungdy hawte phang a rin.

¹¹Mosipi nynh a bu kha hy zah, a taw luki khe a zou bungthung; a sake kha daw zah, a taw hae kha lawte, a sake khate ahangnaw kya a zoukhae hae hawte,

¹²BAWIPAW makhae nynh Jakob kha a cciakhae; amaw kya ramccang pachia um khyh.

¹³Laephi ahangnaw hmin hae kyakhe nung zah, loo kyate apoupaw khate aepaw a dang; Lungpi kya-e khoitui khate thuasah, rihlung kya-e chitui khate thuasah amaw kha a do-oih,

¹⁴Vaetua phu kya-e samateitui ahaawpaw te tuuphu kya-e mateitui, tuutaw tho te tuutepaw tho, Bashan ram e tangnuapaw hae te miaatepaw hae kha ahoypaw chanvuih ryte na ae zah, misu thae chiise kha na nia.

¹⁵Jakob tuh phe byn lan a ae; Jeshurun tuh yn thobaleih zah a ccu te a sy. Na tho, na ngesaw abeih, na ngesaw anae! Tetuh a raetupaw Pachia kha vua zah, a khumnaw Lungpi kha pawlangria khyh.

¹⁶Minmin nynh ramccang pachia hae khate amaw kha eiungnaw a hoisah hae, anungsikuhpaw uccaw hae khate a thinriasah hae.

¹⁷Minmin nynh Pachia kalan thua leite, raerangsaro hae kalan, nae minpaaw hae nynh a ri lei hae paw, athaw oun thua hae paw, a ny lei hae paw pachia hae kalan si a law hae.

¹⁸Nang lang ae tangsahpaw Lungpi kha pawlang na ria khyh; nang ae saahtupaw Pachia kha na ning.

¹⁹Tuh-e tuh BAWIPAW nynh he a muih te, a thinria zah, a ccapaw hae te a ccanung hae kha a vua hae.

²⁰Aning nynh, “Minmin kyate ka mitmae ka retawkuh cih hae, Minmin athangnaw hae tuh pawmou athua cih cipaw ka do cih; pawccecize minmin tuh a ccouseikuh hae paw ciihan nynh thua hae, zyn lan um leipaw ccaaw hae nynh thua hae.

²¹Minmin nynh pachia athua leipaw khate eiungnaw yn hoisah hae, mih zohtuh hae khate ka thin yn riasah hae. Tukeiccuze minphuin athua leipaw khate eiungnaw ka hoisah cih hae, angaeepaw minphuin khate mih thin ka riasah cih hae.

²²Pawccecize ka thinrianaw nynh maee kha ruasah zah, Akhunaw michi khua Sheol lang cia a u; laephi te laephi nynh a pousahpaw kha u zah, mua aleihpaw hae kha a u.

²³Mih tungvaw kya ronaw kha ka pum cih, minmin rawsete ka the hae kha ka mangnua cih hae:

²⁴Ccakannaw a teing cih hae, asopaw te ukunaw, myarya ccihpaw ccinaw khate a chih cih hae. Sarepaw hae haw kha thuasah, vuiping kya avawpaw sy a hoi hae paw kha thuasah ka sawnua cih hae.

²⁵Laanpi kyaze thaloi nynh a chisah cih hae zah, inn lungkhu kyaze bungzou thinphangnaw nynh a chisah cih hae. pawccecize ccangvae te liaccaw thuasah, matei zu ungpaw imua te taw zah a sang phe paw vae paw thuasah a chih kalang cih hae.

²⁶Minmin kha phiariphiarae nung lan te ccungccaw hae nynh a nynaw hae kyakhate zosah lan ka tuaku;

²⁷thuasalama mih rhaw hae nynh a lysahku lan hae paw kha ka thinphang, pawccecize mih rhaw hae nynh a thaesei cih hae zah, ‘Aening kuih nynh minmin kha a tae hae; hynh-e balyn a cyihtu tuh BAWIPAW thua khyh,’ cite a ho cih hae,” a ci.

²⁸Minmin tuh tuanaw a hoi lei hae paw minphuin nynh thua hae; a nyhthya lei hae paw nynh thua hae.

²⁹A haw hae paw athua hae ze, e hynh a nyhthya cih hae; athangnaw ccyh kya pawmou acyihkuh cih cipaw a nyh cih hae.

³⁰Mih Lungpi nynh minmin kha zua hae zah, BAWIPAW nynh rhaw a shungsah khyh hae ze, lu kheit nynh ccungccaw thong kheit kha pawtemou a dee kho cih hae zah, lu ning nynh thong haw kha pawtemou a ccuesah kho cih hae?

³¹Mih lungpi tuh aening Lungpi te lokuh ccaccing khyh; aening rhaw hae tuh mingaee hae nynh thua hae.

³²Minmin kya-e misu akaran hae tuh Sodom kya-e misu akaran kyate thuasah, Gomorrah misu khokhu kyate thuasah oun thua hae paw nynh thua; mih misu thae hae tuh sy a hoipaw misu thae hae nynh thua, mih misu ange hae tuh akhah hae;

³³Mih misutui tuh hupaw sy, myarya ccihpaw huparepaw sy nynh thua.

³⁴E hynh kamaw kya ka ccakhung zah, ka sisua bawng kya minkhiate a umpaw thua khyh tou?

³⁵Liarunaw te amee sangrunaw tuh kamaw kya-e nynh thua, pawccecize accyh zaw te mih ccu tuh athei cih; mih vawsawnaw nin tuh nae vae zah, minmin ronaw tuh arangte yn thua.

³⁶Mih huhan tuh thang vae zah, heedepaw ccungccaw te aluepaw ccungccaw um vae khyh hae cipaw he a nyh te, BAWIPAW nynh a see hae tungvaw thawccinaw a hoi cih zah, a ccungccaw hae kha thyaa a ccousah ccaccing cih hae.

³⁷Oute aning nynh: Mih pachia hae, a khynnaw hae paw lungpi tuh teimou a um hae?

³⁸Hum nynh mou si a lawnaw hae paw atho kha ae zah, si a lawnaw hae paw misutui kha a neih? Tuh-e hae nynh thokuh hae sah lah, ae bawm oh sah, minmin tuh nanning thungkhawtu thua hae sah!

³⁹Atu nytua oh, kamaw rou hynh nynh Pachia ka thua; Kamaw laelan ccangpaw pachia um khyh. Ka theih zah ka hiinsah; vaemaw ka muesah zah ka dansah; ka kuih kyate humhung nynh mah yn lua kho khyh.

⁴⁰Pawccecize ka kuih kha vaawlang ka hangthung zah, hynhcite bya ka kinku: Zungzae hiinpaw ka thua thyhawte,

⁴¹Dalahdalah akpaw ka thaloi kha he ka taw te, ka kuih nynh byapianaw kha ccavyng a kyng; Kae yn rhawtu hae paw tungvaw liarunaw ka rae cih zah, yn hua hae paw kha ka liaru cih hae.

⁴²A sang saepaw rhaw lu kyate, chia athua hae paw te kyng athua hae paw chiise khate Ka the hae kha chiise ka ruisah cih hae zah, ka thaloi nynh saw a ae cih.

⁴³Pou minphuin hae, a ccungccaw hae kha thehoysah oh, pachia hae nanning balyn, amaw kha beik oh! Pawccecize a ccaaw hae chiise phu kha a lah cih zah, a rhaw hae tungvaw kya liarunaw a rae cih; amaw a hua hae paw kha a liaru cih hae zah, a ccungccaw hae hanlan ram kha a thyaasah cih.

⁴⁴Moses tuh yn thua zah Nun ccapaw Joshua ryte hynh-e hlaw kya-e bya balyn hynh ccungccaw hae a thaenaw hae kyakhe a hopya hae.

⁴⁵Moses nynh hynh-e bya balyn kha Israel hae balyn kya a hopah kou hae te,

⁴⁶minmin kha, “Atunin nanning te arawsekuhte ccaekia kae khanpyaku oh paw hynh-e bya balyn hynh nae thinlung kya ccykekuh oh; e kawbya kya-e bya balyn hynh nae ccaaw hae nynh zuakute a zui nawlan hae, minmin kha kawbya hawte pya oh.

⁴⁷E hynh nanning hanlan huatawpaw uccaw thua khyh, thuasalama nae hiinnaw ccaccing nynh thua; hynh-e liate ccou khylan Jordan vaw na zuanua cih oh paw ram kya nae she asae cih,” a cipya hae.

⁴⁸Tuh-e nin ccaccei khe BAWIPAW nynh Moses kha akawlan e thyhte a hopya:

⁴⁹“Jeriko khua araw lang, Moab ram lungkhu Abarim muazung hae kya umpaw Nebo Mua lang kaethung lah, Israel hae nynh a pee lan hae ka pya cih hae paw Kanaan ram kha dotua;

⁵⁰na upaw Aaron tuh Hor Mua vawlan chih zah a puizia hae kalan sueluabua athua hawte, na kaepaw mua vawlan khe na chih cih zah, na puizia hae kalan sueluabua na thua cih;

⁵¹pawccecize nanning parouh mawte Zin ramkaw, Meribah-kadesh tui kya Israel hae laku khe ka tungvaw zynnaw kha na rosah zah, Israel hae laku kya athyaapaw lante ka saw nae tua khyh oh.

⁵²Israel hae ka pya cih hae paw ram kha asawnaw kyate na muih zemah, khah-e ram lungkhu lang na tee lan khyh,” a cipya.