Read Zotung Chin DEUTERONOMY 4 Bible Online

DEUTERONOMY 4 - Zotung Chin bible

DEUTERONOMY 4

¹Pou Israel, tukeiccuze atu, BAWIPAW , nae minpaaw hae Pachia nynh ae pya cih oh paw ram lungkhu lang teete ccou khylan na hiin ccaw oh, zui lan kae ccangpah cih oh paw phungbya hae te phungzae hae hynh ngaetua oh.

²Kae pya oh paw bya kya ccangkheit sanmah na biachih lan khyh oh zah, ccangkheit sanmah na vua lan khyh oh, kae hopya oh paw BAWIPAW nae Pachia kawbya hae hynh na tynsah cih oh.

³Baalpeor te asekuh lante BAWIPAW nynh pawtemou a cyi cipaw, Baalpeor a zuipaw miakaw kha nanning laku kyate BAWIPAW nae Pachia nynh pawtemou a ro hae cipaw kha naemaw ccaccei nynh phe na muih vae oh,

⁴BAWIPAW nae Pachia kha tynkaring lan na kyngkuh oh paw balyn tuh atunin na hiin oh.

⁵Dotua oh, BAWIPAW ka Pachia nynh yn hopya thyhte, ccou khylan na tee vae cih oh paw ram kya na zui lan oh paw phungzae hae te phungbya hae kha atu kae ccangpya oh.

⁶Hynh-e hae hynh zuakute na zui cih oh, pawccecize hynh-e hynh nynh nae hawnaw te nae nynaw kha ccungccaw hae kya a langsakuh cih zah, minmin nynh hynh-e phungbya balyn hynh he a thae hae te, “E minphuin lepaw hynh a hawpaw te a nyhpaw minphuin ccaccing nynh thua!” cite a ho cih hae.

⁷Pawccecize BAWIPAW ah Pachia nynh aening ah ko takyh oh te, oun naenuaku hawte, pawcihawpaw ccangpaw minphuin lepaw mou tuhte a naenuakuh hae paw pachia a hoi?

⁸Atunin nae malang kae nungpya oh paw hynh-e upadi balyn hawte pawcihawpaw ccangpaw minphuin lepaw mou phungbya hae te phungzae hae kha a hoi?

⁹Nae she balyn kya nae mit nynh a muihpaw uccaw hae kha na ning khyh nawlan oh te nae tuanaw kyate azo khyh nawlan, naemaw te naemaw raeringkute ccykekuh oh; tuh-e hae tuh nae ccaaw hae te nae mintaw hae kha nysah oh—

¹⁰BAWIPAW nynh kae kha, “Laephi vawlan ccungccaw hae nynh a hiin lungkhu hae balyn, kae kha yn rithya nawlan hae te mih ccaaw hae kha mah a ccangpya thya nawlan hae, minmin kha kamaw hanlan pum hae lah, ka bya kha ka thaesah cih hae,” cite he yn hopah tuh, BAWIPAW nae Pachia malang Horeb kya nanning nynh na thadyn oh;

¹¹nanning nynh mua leihpaw langkhe na naekuh oh zah, mua tuh vaawlui cia maeesoi te ruathung zah marae zipaw maeking nynh phang a bong.

¹²Oute BAWIPAW nynh maee kyate bya ae hopya oh. Bya accaepaw kha na thae oh salamah a muinsan kha na muih khyh oh; roi kyalya nynh accae.

¹³Zui lan ae pya oh paw a byakinnaw kha ae thaesah oh, tuh-e tuh kawbya ccanghaw kha nynh thua; te aning nynh tuh-e tuh lungphe phe ning vawlan khe a zei.

¹⁴Te tuh-e ccyh lyaze nanning nynh ccou khylan na tee vae cih oh paw ram kya na zui lan oh paw phungzae hae te phungbya hae kha nanning ccangpya khylan BAWIPAW nynh kae kha kaw yn pya.

¹⁵BAWIPAW nynh nanning kha Horeb kya maee lungkhu te ae hopya lya oh ze, a muinsan kha na muih khyh keiccu oh ze, naemaw te naemaw hoyte raeringkute ccykekuh oh,

¹⁶tuhteze nynh hankhakheit muinsan alo lante naemaw hanlan akawlan e zohtuh kha raekute ahoy leipaw ozia kha na zui lan khyh oh, tuh-e hae tuh: ccungccapaw khyhze ccungccanung muinsan,

¹⁷laephi vawlan umpaw sarangpaw phuinkhakheit muinsan, khivae kya azouthyapaw pavaw phuinkhakheit muinsan,

¹⁸lae vawlan avawpaw phuinkhakheit muinsan te lae kaw e tui kya umpaw ngasaw phuinkhakheit muinsan nynh thua.

¹⁹Te vaawlui lang na dothung oh zah, khuanin, sawpaw te awsi, vaawlui umpaw uccaw balyn kha he na muih oh te, vaawlui zakaw pawpaw kya umpaw ccungccaw balyn hanlan BAWIPAW nae Pachia nynh a ua hae paw khah-e uccaw hae kha bakhungnuate beiksei nan oh lah, zuisei nan oh.

²⁰Thuasalama nanning tuh atunin na um oh hawte, BAWIPAW nynh a ccou hae paw a ccungccaw hae ccaccei lang tang khylan nanning kha Izip ram, sivaw tuisah khopaw maeephu kyate ae lah oh zah ae poukhae oh.

²¹Nanning keiccuze BAWIPAW nynh ka tungvaw a thinria zah, Jordan vaw ka zua khyh nawlan te BAWIPAW nae Pachia nynh nae rho lang ae pya cih oh paw ram hoypaw lungkhu lang ka tee khyh nawlan bya a kinku.

²²Kae tuh Jordan vaw zua leite e ram kya ka chih cih, thuasalama nanning tuh ram hoypaw kha ccou khylan khuraw lang na zua cih oh.

²³Tukeiccuze BAWIPAW nae Pachia nynh nanning kya a raepaw byakinnaw kha na ning khyh nawlan oh te BAWIPAW nae Pachia nynh ae khee oh paw hankhakheit muinsan alo lante zohtuh na raeku khyh nawlan oh raeringkuh oh.

²⁴Pawccecize BAWIPAW nae Pachia tuh aruapaw maee, a eiungpaw Pachia nynh thua.

²⁵Tuh-e ram kya ccaaw hae te mintaw hae kha na hoi oh zah nae rynaw he accing te, hankhakheit muinsan lante zohtuh raekute hoyleinaw kha na rae oh zah, BAWIPAW nae Pachia mitmuihnaw kya hoyleinaw raete a thin na riasah oh zetuh,

²⁶ccou khylan Jordan vaw na zuanua cih oh paw ram kyate aro mawze khaleih na mih cih oh cite atunin nanning rawsete vaaw te lae kha ccaekia lang ka ko hae; tuh-e ram kya nae she sae lan khyh, marya na chih cih oh.

²⁷BAWIPAW nynh nanning kha ccungccaw hae laku ae phiasakuh cih oh; BAWIPAW nynh ae cciakhae cihnaw oh minphuin hae laku kya nanning beihtaraw kyalya na lae cih oh.

²⁸Tuin ram kya a muih kho leipaw, nawthae kho leipaw, a ae kho leipaw te amyn a thae kho leipaw, thing te lung hae kyate kuih te raepaw ccangpaw pachia hae kha na beik cih oh.

²⁹Tuin kyate BAWIPAW nae Pachia kha na ccung cih oh zah, nae thinlung balynte, nae tuanaw balynte na ccung oh ze, amaw kha na muih cih oh.

³⁰Nae vawsawnaw kya yn thua cih paw ccyh kya tuh-e vawsawnaw hae balyn nae tungvaw he yn cyihkuh te, BAWIPAW nae Pachia kalan na kithui cih oh zah, a bya kha na ngae cih oh.

³¹BAWIPAW nae Pachia tuh ngaethyaumsah thyapaw Pachia athua keiccuze nanning kha ae vua lan khyh oh zah ae roh lan khyh oh; nae minpaaw hae kya bya a kinpyaku hae paw byakinnaw kha ning lan khyh.

³²Pawccecize Pachia nynh laephi vawlan ccungccaw a rae takaw nin te nanning maw e kum hynhsepi e akonglang balyn kha atu khiatua oh; vaawlui voikheit lang te voikheit lang cia khiatua oh: hynhcih alepaw hankhakheit acyihkuh boi tou, tuhkhyhze hynh tahawpaw kha thae boi athua tou?

³³Nanning nynh maee lungkhu te a hopaw pachia roi kha na thae oh hawte thae boi zah ahiinpaw hum ccungccaw mou a um?

³⁴Tuhkhyhze BAWIPAW nae Pachia nynh Izip ram kyaze nae mit ccaccei malang khe nae hanlan ae cyipya oh hawte syntawtuanaw, muihsahnaw te ngaeangnaw, rhawdounaw, athungpaw kuih te kuih dyngnaw, ri lan umpaw huhan langsahnaw liate minphuin phuin kheit kha amaw hanlan ccangpaw minphuin laku kyate law khylan ccianua lan a zuakuh boi paw pachia ccangkhakheit a um boi tou?

³⁵BAWIPAW tuh Pachia nynh thua cipaw na ny nawlan oh, hynh-e hynh nanning kalan langsahpyaku athua; amaw laelan ccangpaw um khyh.

³⁶Nanning ccangpya khylan vaawlang te a roi kha ae thaesah oh: laephi vawlan alesaepaw a maee kha ae langsahpakuh oh zah, maee kyate yn poupaw a bya kha na thae oh.

³⁷Te nae minpaaw hae kha a sungsah keiccu hae ze, mimaw nukhute mih ciihan hae kha a po hae. Nanning kha Izip ram kyate amaw malang ccaccei khe alesaepaw huhan khate ae poukhae oh,

³⁸Nanning laeze ale huapaw te athawsae huapaw minphuin hae ram kha nanning kalan rho lang pyate a lungkhu lang teekhae khylan, atunin cia acyiku hawte minmin kha nae malang te a dee hae.

³⁹Tukeiccuze BAWIPAW tuh ahangnaw vaawram te anenaw laephi kyaze Pachia nynh thua cipaw kha atunin nyh oh lah, nae thinlung kya ccykeku tua oh; ccangpaw um khyh.

⁴⁰Naemaw te nae nukhu e nae ciihan hae ngedang lungpawnaw hanlan atunin kaw kae pya cih oh paw a phungbya hae te a kawbya hae kha tynsah oh, tuhteze nynh nanning tuh BAWIPAW nae Pachia nynh zungzae hanlan ae pya cih oh paw ram kya nae hiinshe asae cih.

⁴¹Oute Moses nynh khuapi khua thum kha Jordan vaw nithua langkhe ccangte a phia hae,

⁴²langmaw ze rhawkunaw a umty leite ccangpaw ccungccaw kha paccynnuaku leite a theihseipaw lukhakheit tuh tuh-e khuapi hae kalan khe a ccue kho; ccungccaw theihpaw nynh tuh-e khua khuakhakheit kalan khe a ccue cih zah a hiin cih;

⁴³tuh-e khuapi hae tuh Reuben phin hae kya-e ramkaw accya umpaw Bezer, Gad phin hae kya-e Gilead kya umpaw Ramoth, te Manasseh phin hae kya-e Bashan kya umpaw Golan nynh thua hae.

⁴⁴E tuh Moses nynh Israel hae kya a nungpya hae paw upadi nynh thua.

⁴⁵E hae tuh Israel hae nynh Izip ram kyate he a pou hae te, Moses nynh Israel hae a hopya hae paw phunglang hae, phungbya hae te phungzae hae nynh thua.

⁴⁶Moses te Israel hae nynh Izip ram kyate he a pou hae te, a tae hae paw Heshbon a uktupaw Amor hae siapharan Sihon ram kya, Jordan vaw nithua lang, Beth-peor te arawsekunaw accya kyakhe a hopya hae.

⁴⁷Minmin nynh Sihon ram te Bashan Siapharan Og ram kha a law hae, tuh-e hae tuh Jordan vaw nithua lang umpaw Amor hae siapharan hae lu ning nynh thua hae.

⁴⁸Arnon Vahue akin lang umpaw Aroer kyate Sirion Mua kyacia, (tuh-e tuh Hermon nynh thua),

⁴⁹tuh-e hae ryte Jordan vaw nithua lang umpaw Arabah abalyn kyate Pisgah mua hary apannaw zakaw umpaw Arabah Rili kyacia a law hae.