Read Zotung Chin DEUTERONOMY 5 Bible Online

DEUTERONOMY 5 - Zotung Chin bible

DEUTERONOMY 5

¹Moses nynh Israel hae balyn kha ko hae zah hynhte a hopya hae: Pou Israel, atunin kae hopya oh paw phungbya hae te phungzae hae kha ngaetua oh; khah-e hae kha na ccangkuh cih oh zah hoyte na zui cih oh.

²BAWIPAW ah Pachia nynh Horeb kya aening ryte byakinnaw a rae.

³E byakinnaw hynh BAWIPAW nynh aening minpaaw hae ryte rae khyh, thuasalama atunin hein kya ah hiin oh paw aening balyn ryte nynh a rae.

⁴BAWIPAW nynh mua kyakhe mae hawiliakute maee lungkhu te bya ae hopya oh.

⁵(Tuh ccyh lyaze kae tuh BAWIPAW bya kha nanning kalan thaesah khylan BAWIPAW te nanning laku khe ka thadyn; pawccecize nanning tuh maee keiccuze na rih oh zah, mua lang na kaethung khyh oh.) Te BAWIPAW nynh:

⁶Kae tuh Izip ram seetangnaw kyate ae poukhae oh paw BAWIPAW nae Pachia nynh ka thua;

⁷kamaw laelan ccangpaw pachia hae kha na hoi lan khyh oh.

⁸Naemaw hanlan ahangnaw vaawram kya thuasah, anenaw laephi kya thuasah, lae kaw umpaw tui kya thuasah, hankhakheit muinsan alo lante zohtuh kha na raekuh lan khyh oh.

⁹Khah-e zohtuh hae kha bakhungnuate na beik lan khyh oh; pawccecize kae tuh BAWIPAW nae Pachia, a eiungpaw Pachia nynh ka thua, kamaw yn vua hae paw kha she thum, she pali cia, nungpaaw hae seinaw hanlan ccaaw hae tungvaw kya de a tah hae paw nynh ka thua,

¹⁰thuasalama kae kha yn sungsah zah, ka kawbya kha a zui hae paw kyakhe mih she thong kheit cia atynpaw sungsahnaw kha a langsahpakuh hae paw nynh ka thua.

¹¹BAWIPAW na Pachia min kha ahme lei lante na mang lan khyh, pawccecize amaw min kha ahme lei lante a mangpaw tuh BAWIPAW nynh ngaethya lan khyh.

¹²BAWIPAW na Pachia nynh kaw ae pya thyhte, sabbath nin kha naawsah lah, thyaasah.

¹³Nin taruh lungkhu rya na lah cih zah, na ryalaw balyn kha na lawkuh cih.

¹⁴Thuasalama nin sarinaw nin tuh BAWIPAW na Pachia hanlan sabbath nynh thua, tuh-e nin kya namaw, na ccapaw, na ccanung, na seenung, na seepaw, na vaetua, na lann, na sahiin-awvaw miakaw te na khua kya umpaw mikhia nynh pawpaw rya mah na lah lan khyh oh, tuhteze nynh na seenung te na seepaw hae tuh namaw hawte a haeungbua cih hae.

¹⁵Izip ram kya see lang na la tangpaw, te BAWIPAW na Pachia nynh Izip ram kyate athungpaw kuih te a dyngpaw kuih khate ae poukhaepaw kha ning nan; tukeiccuze BAWIPAW na Pachia nynh sabbath naawsah lanpaw kha kaw ae pya.

¹⁶BAWIPAW na Pachia nynh kaw ae pya thyhte na nung te na paaw kha sawtua, tuhteze nynh BAWIPAW na Pachia nynh ae pya cih paw ram kya na hiinshe asae cih zah, ngedang lungpawte na um cih.

¹⁷Ccungccaw na theih lan khyh.

¹⁸Milae zu kya khyhze milae vawpaw kya na sei lan khyh.

¹⁹Na ruh lan khyh.

²⁰Na innpaw kha rawsete ahme leipaw ccaekia lang na tang lan khyh.

²¹Na innpaw zu kha na duaa lan khyh. Na innpaw kya-e inn, loo, seenung, seepaw, vaetua, lann, na innpaw kya-e hankhakheit kha na duaa lan khyh.

²²BAWIPAW nynh hynh-e bya hae hynh mua kya na pumkuh oh paw balyn kalan maee, maeking te marae zipaw mohnaw kyate roi accae lante ae hopah oh zah, ccangpaw ae hopah chih vae khyh oh. E bya hae hynh lungphe phe ning vawlan zei zah, kae kha yn pya.

²³Mua tuh maee lang arua cciamang lyakhe nanning nynh mohnaw kya-e roi kha he na thae oh te, nae phin kya-e lupi hae balyn te nae piccan hae tuh ka kalan oun naekuh hae;

²⁴nanning nynh, “Dotua, BAWIPAW ah Pachia nynh a phu-enaw te a lesaenaw kha oun langsahpakuh vae zah, maee kyate a roi kha kae thae vae. Pachia te ccungccaw tuh bya a hoku hae zemah, ccungccaw tuh phang ahiin ung cipaw atunin kae muih vae.

²⁵Tukeiccuze aening tuh atu pawcce ah chih cih oh? Pawccecize hynh-e myarya lepaw maee nynh aening kha pong oun u cih; BAWIPAW ah Pachia roi kha hynhlaeze accyh aro lante bua ah thae oh zetuh ah chih cih oh.

²⁶Maee lungkhu te bya yn hopaw ahiinpaw Pachia roi kha aening hawte thae zah a hiin ungpaw hum ccungccaw mou a um?

²⁷Namaw ccaccei nynh naekuh lah BAWIPAW ah Pachia nynh a ho cih paw bya balyn kha la ngaetua. Oute BAWIPAW ah Pachia nynh ae hopyapaw atyn-are kha oun hopah lah, kaening nynh kae ngae cih zah kae cyih cih,” na ci oh.

²⁸Nae hopya oh paw bya kha BAWIPAW nynh he a thae te, BAWIPAW nynh kae kha, “E ccungccaw hae nynh ae hopya hae paw bya kha phe ka thae vae. Minmin nynh a ho hae paw bya balyn tuh ahme.

²⁹Minmin nynh kae kha ri khylan te ka kawbya balyn kha zungzae zui khylan, atu hawte hynhcihawpaw thinlung kha a hoi hae ze rou nynh minmin te mih ccaaw hae tuh ngedang lungpawte zungzae a um cih hae.

³⁰La cceih lah minmin kha, ‘Nae bu kalan ki ccavae oh,’ cite hopah hae.

³¹Thuasalama nang tuh ka pe hin thadyn lah minmin kalan na ccangpya lan hae paw kawbya balyn, phungbya hae te phungzae hae kha kae hopah cih, tuhteze nynh rho lang ka pya cih hae paw ram kyakhe minmin nynh khah-e hae kha a zui cih hae,” yn cipya.

³²Tukeiccuze BAWIPAW nae Pachia nynh kaw ae pya oh hawte, hoyte na cyih cih oh, nanning nynh voilang ranglang na maekuh lan khyh oh.

³³BAWIPAW nae Pachia nynh kaw ae pya oh paw laanpi kha asasite na zui cih oh, tuhteze nynh na ccou cih oh paw ram kya ngedang lungpawte na hiin cih oh zah, nae hiinshe asae cih.