Read Zotung Chin DEUTERONOMY 6 Bible Online

DEUTERONOMY 6 - Zotung Chin bible

DEUTERONOMY 6

¹Hynh-e hae tuh nanning nynh ccou khylan na ccianua oh paw ram kya zui lan cite nanning ccangpya khylan BAWIPAW nae Pachia nynh yn hopyapaw kawbya hae—phungbya hae te phungzae hae nynh thua,

²tuhteze nynh naemaw te nae ccaaw hae, te nae mintaw hae nynh nae hiinshe balyn kya BAWIPAW nae Pachia kha na rih cih oh zah, kaw kae pya oh paw a phunglang hae te a kawbya hae kha na zui cih oh zah nae she asae cih.

³Tukeiccuze, pou Israel, nae minpaaw hae Pachia, BAWIPAW nynh bya ae kinpyaku thyhte ngedang lungpawte na um nawlan te, mateitui te khoilutui aluanaw ram kya pataepi na pungthung nawlan, kawbya hae hynh ngae lah zuakute zuitua.

⁴Pou Israel, ngaetua: BAWIPAW tuh ah Pachia, ccangkheit kyalyapaw BAWIPAW nynh thua.

⁵BAWIPAW na Pachia kha na thinlung balyn te, na tuanaw balyn te, na thawzung balyn te na sungsah cih.

⁶Atunin kaw kae pyapaw hynh-e bya hae hynh na thinlung kya ccykekuh.

⁷Hynh-e bya hae hynh na ccaaw hae kya hopah bua hae lah, innvaw na um ze thuasah, laansaw lang na um ze thuasah, na ih ze thuasah, na thoku ze thuasah hynh-e bya hae kong hynh hopah hae.

⁸Hynh-e bya hae hynh muihsahnaw lante na kuih kya khiikuh lah, na terui kyakhe syntawnaw lante khiidekuh,

⁹te na inn thuakaw tung hae kya te na koikua hae kyakhe zei hae.

¹⁰BAWIPAW na Pachia nynh na minpaaw hae Abraham, Isak te Jakob kya pya lan bya a kinpyaku hae paw ram tuh—ram hoypaw, nang nynh na sak leipaw khuapi hae nynh thua,

¹¹na teekhae leipaw uccaw ahoypaw aphuinphuin te phe beihpaw inn hae, na thae leipaw tuisung hae, na lin leipaw misu khokhu hae te oliv ku hae kalan cciate—na ae zah he na byn te,

¹²Izip ram seetangnaw kyate ae poukhaepaw BAWIPAW kha na ning khyh nawlan raeringkuh.

¹³BAWIPAW na Pachia kha na rih cih, amaw kha na beik cih zah, amaw min kyalya te bya na kinkuh cih.

¹⁴Ccangpaw pachia hae, na pepan umpaw ccungccaw hae kya-e pachia hankhakheit kha na zui lan khyh,

¹⁵pawccecize ae umkhaepaw BAWIPAW Pachia tuh a eiungpaw Pachia nynh thua. BAWIPAW Pachia thinrianaw nynh maee lang ae ruanua cih zah, laephipi kyate ae rohsei cih.

¹⁶BAWIPAW na Pachia kha Massah kya na syntawtua hawte, syntaw nan.

¹⁷BAWIPAW na Pachia nynh kaw ae pyapaw a kawbya hae, a phungbya hae te a phunglang hae kha zuakute na zui cih.

¹⁸BAWIPAW mitmuihnaw kyakhe ahmepaw te ahoypaw kha cyitua, tuhteze nynh BAWIPAW nynh bya ae kinpyaku thyhte na rhaw hae balyn kha na malang te na dee kho cih hae zah, BAWIPAW nynh na minpaaw hae kyaze nanning kha pya lan bya a kinpyaku hae paw ram hoypaw kalan na tee cih, na ccou kho cih zah ngedang lungpawte na um cih.

²⁰Malang ccyh kya na ccaaw hae nynh, “BAWIPAW ah Pachia nynh kaw ae pyapaw phunglang hae, phungbya hae te phungzae hae asuilan hynh pawmou athua?” cite he ae khia hae te,

²¹nang nynh na ccaaw hae kha, “Kaening tuh Izip ram kya Faro see lang kae la tang, thuasalama BAWIPAW nynh athawsaepaw kuih te Izip ram kyate oun poukhae.

²²BAWIPAW nynh Izip ram, Faro te a innbyn hae balyn kha rawsete, ri lan umpaw muihsahnaw ale hae paw te ngaeangnaw hae kha kaening mitmuihnaw kya a langsahku.

²³Ah minpaaw hae kyaze aening pya lan bya a kinpyaku hae paw ram lungkhu lang teekhae khylan Izip ram kyate aening hynh oun poukhae.

²⁴Atu acyiku hawte, aening hiinnaw thungkhaw khylan te aening zungzae hoynaw hanlan BAWIPAW ah Pachia kha ri lanpaw te hynh-e phungzae hae balyn zui lanpaw hynh BAWIPAW nynh aening kha kaw oun pya.

²⁵BAWIPAW ah Pachia nynh kaw oun pya thyhte amaw malang khe hynh-e kawbya balyn hynh zuakute ah zui oh zetuh, adingpaw kya ah um cih oh,” cite na hopah cih hae.