Read Zotung Chin DEUTERONOMY 7 Bible Online

DEUTERONOMY 7 - Zotung Chin bible

DEUTERONOMY 7

¹Nang nynh ccou khylan na tee vae cih paw ram lungkhu langkhe BAWIPAW na Pachia nynh ae cciakhae zah, na malang e minphuin patae, Hit hae, Girgash hae, Amor hae, Kanaan hae, Periz hae, Hiv hae te Jebu hae, nanning laeze mih thawsaehua zah alunghua hae paw minphuin phuin sari kha dee hae zah,

²BAWIPAW na Pachia nynh minmin kha namaw kalan ae pya zah, he na tae te, minmin kha marya na roh cih hae. Minmin ryte byakinnaw na rae lan khyh zah, minmin tungvaw thawccinaw na langsakuh lan khyh.

³Minmin ryte zuvaw lang na tang lan khyh oh, na ccanung hae kha mih ccapaw hae kalan na pya lan khyh, na ccapaw hae hanlan mih ccanung hae kha zu lang na dypah lan khyh hae.

⁴Pawccecize na ccaaw hae kha ccangpaw pachia hae beik khylan kamaw zuinaw kyate ccanglang a maesakuhsei cih hae. Tetuh BAWIPAW thinrianaw nynh maee lang ae ruanua cih zah, nang kha arangte ae roh cih.

⁵Thuasalama minmin tungvaw hynhte na cyih cih: mih silawhang hae kha na phoupah cih hae, mih lungpum hae kha na ropah cih hae, mih Ashrim thing hae kha na baepah cih hae zah, a raeku hae paw mih khozi zohtuh hae kha maee te na upah cih hae.

⁶Pawccecize nanning tuh BAWIPAW nae Pachia hanlan athyaapaw minphuin nynh na thua oh. BAWIPAW nae Pachia nynh nanning kha laephi vawlan e ccungccaw balyn kyate a ccungccaw hae lang, asung-epaw a rho lang ae poku vae oh.

⁷Nanning tuh ccangpaw minphuin laeze na lunghua keiccu oh ze, BAWIPAW nynh ae sungsah oh zah, ae poku oh paw thua khyh, nanning tuh mingccang hae laeze azya huaccepaw nynh na thua oh.

⁸BAWIPAW nynh nanning kha ae sungsah oh zah, nae minpaaw hae kya bya a la kinkupaw byakinnaw kha a tynsah keiccuze nanning kha Izip siapharan Faro kuih kyate thuasah, seetangnaw kyate thuasah BAWIPAW nynh a thawsaepaw kuih te ae poukhae oh zah, ae shawkhaw oh.

⁹Tukeiccuze BAWIPAW nae Pachia tuh Pachia thua zah, amaw kha a sungsah hae paw te a kawbya a zui hae paw tungvaw kya she thong kheit cia, byakinnaw te lungzi sungsahkunaw kha a tynsahpaw Pachia nynh thua cipaw nytua oh,

¹⁰te amaw kha a vua hae paw ccungccaw hae tungvaw kya a liarupaw Pachia nynh thua cipaw kha nytua oh. Amaw kha a vua hae paw kya thysung leite a liaru hae.

¹¹Tukeiccuze atunin kaw kae pya oh paw kawbya—phungbya hae te phungzae hae hynh zuakute zui oh.

¹²E phungzae hae hynh zuakute na zui oh zah na ngae oh zetuh, BAWIPAW nae Pachia nynh nae minpaaw hae kya bya a kinpyaku hae paw byakinnaw te lungzi sungsahkunaw kha nae kya a tynsah cih;

¹³BAWIPAW nynh ae sungsah cih oh, hythua ae pya cih oh zah ae pungzaesah cih oh, nanning pya khylan nae minpaaw hae kya bya a kinpyaku hae paw ram kya nae ccaaw hae te nae laephi kya-e thingthae-eccang hae, nae looh, nae misutui, nae chitui, nae sahiin pungthungnaw te nae tuuphu ataw hae kha hythua a pya cih.

¹⁴Nanning tuh minphuin hae kyaze hythua a mue huaccepaw na thua cih oh zah, nanning laku kya thuasah, nae sahiin-awvaw kya thuasah atinpaw um lan khyh.

¹⁵BAWIPAW nynh ccinaw miakaw kha nanning kyate a vua cih, na la ny oh paw Izip ram kya-e ri lan umpaw ccinaw balyn kha nae tungvaw thua sah lan khyh, thuasalama nanning ae hua oh paw tungvaw kya tuh-e ccinaw tuh a thuasah cih.

¹⁶BAWIPAW nae Pachia nynh ae pya cih oh paw ccungccaw balyn kha thawccinaw langsapyaku leite na roh cih oh; mih pachia hae kha na roh cih oh; mih pachia hae kha na beik lan khyh oh, pawccecize nae hanlan tuh-e tuh kaang athua cih.

¹⁷“Hynh-e minphuin hae tuh kaening laeze alunghua hae; pawtemou kae luade kho cih hae?” cite nae thinlung kya na tuaku oh ze,

¹⁸minmin kha rih nan oh. Faro tungvaw te Izip hae balyn tungvaw BAWIPAW nae Pachia nynh pawtemou a cyi cipaw kha thuasah,

¹⁹nae mit nynh a muihpaw alepaw syntawnaw hae kha thuasah, BAWIPAW nynh ae poukhaenaw oh paw muihsahnaw hae te ngaeangnaw hae athawsaepaw kuih te a dyngpaw kuihbaw kha thuasah liathui oh. BAWIPAW nae Pachia nynh na ripya oh paw ccungccaw balyn tungvaw kyakhe tuhawte a cyih cih.

²⁰Tuhpiaze a hiinhy hae paw te a rekuh hae paw kha heize a ro makhia hae, BAWIPAW nae Pachia nynh khoingae kha a sawnua cih hae.

²¹Minmin kha rih nan oh, pawccecize ae umkhae oh paw BAWIPAW nae Pachia tuh alesaepaw te ri lan umpaw Pachia nynh thua.

²²BAWIPAW nae Pachia nynh khah-e minphuin hae kha nae malang te beihtararaw khate a dee cih hae; minmin kha arangte na thangsah kho lan khyh oh, tuhkhyhze tuh loramsaw hae tuh nae hanlan myaryamaw alungsei cih hae.

²³Thuasalama BAWIPAW nynh minmin kha nanning kalan ae pya cih oh zah, minmin a ro makhia hae, myaryamaw a siisakuh cih hae.

²⁴BAWIPAW nynh mih siapharan hae kha nae kuih kya ae pya cih oh zah, minmin kha vaawlui zakaw kyate a maemih cih hae; minmin kha na ro makhia oh, lu kheit nynh sanmah rawsete ae thadynnua kho lan khyh oh.

²⁵A soii hae paw mih pachia hae kha maee te na u cih oh, tuh-e pachia hae kya umpaw ngun te sui kha duaa nan oh lah, naemaw hanlan lawkuh nan oh, pawccecize tuh-e liate kaang na kae sei cih oh; pawccecize tuh-e tuh BAWIPAW nae Pachia hanlan anungsikuhpaw nynh thua.

²⁶Anungsikuhpaw uccaw kha nae inn lungkhu lang teekhae nan oh, tuhkhyhze tuh tuh-e uccaw hawte ro khylan phia na thuasei cih oh. Tuh-e tuh myaryamaw na hua cih oh zah anungsikuhpaw lang na ria cih oh, pawccecize ro khylan phia athua.