Read Zotung Chin DEUTERONOMY 8 Bible Online

DEUTERONOMY 8 - Zotung Chin bible

DEUTERONOMY 8

¹Nanning nynh na hiin oh zah na pungthung nawlan oh te BAWIPAW nynh nae minpaaw hae kya bya a kinpyaku hae paw ram lungkhu lang teete na ccou kho nawlan oh, atunin kaw kae pya oh paw hynh-e kawbya balyn hynh zuakute na zui hahe cih oh.

²A kawbya kha na zui oh tou, na zui khyh oh tou cipaw te nae thinlung kya umpaw kha ny nawlan syntawtuate nanning zakawsangsahku thya khylan BAWIPAW nae Pachia nynh ramkaw kya kum sung pali lungkhu ae cciakhaenaw oh asawpaw laanpi kha liathui oh.

³Ccungccaw hynh looh kyalya te hiinkuh khyh, thuasalama BAWIPAW khalang kyate yn poupaw bya miakaw te nynh ahiinku cipaw thaethyasah khylan nae vuelawsahte zakaw ae sangsahku oh, nanning nynh thuasah, nae minpaaw hae nynh thuasah na la ny boi lei oh paw manna sanlou kha ae dang oh.

⁴Hynh-e kum sung pali lungkhu nae boeining pue khyh zah nae ccu mah phin khyh.

⁵Nungpaaw nynh ccaaw kha a thuihei hawte BAWIPAW nae Pachia nynh nanning kha ae thuihei oh cipaw kha nae thinlung te nyh oh.

⁶Tukeiccuze amaw laanpi kha zuite, amaw rawrite BAWIPAW nae Pachia kawbya kha zui oh.

⁷Pawccecize BAWIPAW nae Pachia nynh ahoypaw ram lungkhu lang vaw taraw hae, mua hae kya te accya hae kya a pouthungpaw lae kaw e tui te tuidy aluanaw ram,

⁸chanvuih, barli, misu ku hae, thaeku ku hae te ccalee ku hae alungnaw ram, oliv ku hae te khoitui alungnaw ram,

⁹sanlou akhin lei lante na ae cihnaw oh te pawpaw mah na khin cih leinaw oh ram, a lung hae tuh sivaw lang a tang cihnaw te mua hae kyate sohin na thae kho cihnaw oh ram lang ae cciakhae cih oh.

¹⁰Phe byn lang na ae cih oh zah BAWIPAW nae Pachia nynh ae pya oh paw ram hoypaw hanlan amaw kha the na hoysah cih oh.

¹¹Atunin kaw kae pya oh paw a kawbya hae, a phungzae hae, a phungbya hae kha zui leite BAWIPAW nae Pachia kha na ning khyh nawlan oh raeringkuh oh.

¹²Phe byn lang na ae oh zah ahoypaw inn hae kha na sak oh zah tuh-e inn hae kya he na um oh te thuasah,

¹³nae vaetua phu hae te nae tuuphu hae tuh pungthung hae zah nae sui te nae ngun tuh lungthung zah na hoi oh paw balyn tuh he a lungthung te thuasah,

¹⁴Izip ram seetangnaw kyate ae poukhae oh zah, myarya akopaw te ri lan umpaw ram, sy a hoipaw hupaw te zekang lung zah tui um leinaw ramrou kya ae cciakhae oh paw BAWIPAW nae Pachia kha ningte naemaw te naemaw thehoysakuh nan oh. Nanning hanlan rihlung kyate tui luasah zah,

¹⁶nanning kha zakawsangsahku khylan te syntawtuate athangnaw kya nae hanlan hoynaw raepya khylan nae minpaaw hae nynh a ny lei hae paw manna sanlou khate ramkaw kya ae dang oh.

¹⁷Naemaw te naemaw kha, “Ka huhan te ka kuih thungnaw nynh hynh-e hoirumnaw hynh yn muesah,” cite tuakuh nan oh.

¹⁸BAWIPAW nae Pachia kha ning nan oh; pawccecize aning tuh atunin a cyi hawte nae minpaaw hae kya bya a kinpyaku hae paw a byakinnaw kha a tynsah nawlan hoirumnaw muenawpaw huhan ae pyatu oh paw nynh thua.

¹⁹BAWIPAW nae Pachia kha na ning oh zah ccangpaw pachia hae kha zuite na beik oh zah rya na lawpya oh zetuh na roh ccaccing cih oh cipaw atunin raeringnaw hoyte kae pya oh.

²⁰BAWIPAW nae Pachia roi kha na ngae khyh keiccu oh ze, BAWIPAW nynh nae malang a ro hae paw minphuin hae hawte na roh cih oh.