Read Zotung Chin DEUTERONOMY 9 Bible Online

DEUTERONOMY 9 - Zotung Chin bible

DEUTERONOMY 9

¹Pou Israel, ngaetua, nang laeze ale huapaw te athawsae huapaw minphuin hae kha thuasah, khuapi pi hae te vaawlui phe phah lan cia koihkhawkuhpaw khuapi hae kha thuasah,

²na ny hae paw Anak ciihan hae athawsaepaw te ahangpaw ccungccaw hae kha teenuate law khylan atunin Jordan vaw kha na zua vae cih. Minmin nynh, “Hum nynh mou Anak hae kha a thadynnua kho cih hae,” cite a ho hae paw kha na thae vae.

³Oute BAWIPAW na Pachia tuh aruapaw maee hawte atunin na malang po cceih cih paw nynh thua cipaw nytua; BAWIPAW nynh bya ae kinpyaku thyhte minmin kha arangte na dee hae zah na ro kho nawlan hae, BAWIPAW nynh minmin kha na malang khe a shungsah cih hae zah a tae cih hae.

⁴BAWIPAW na Pachia nynh minmin kha na malang khe he a dee hae te, namaw te namaw kha, “E tuh ka dingnaw liate BAWIPAW nynh hynh-e ram ccou khylan yn cciakhae,” cite tuakuh nan; e tuh hynh-e minphuin hae hoyleinaw keiccuze BAWIPAW nynh minmin kha na malang te a dee lan hae paw kha nynh athua hae.

⁵Na dingnaw liate thuasah, na thinlung dingnaw liate thuasah mih ram kha ccou khylan na tee lanpaw thua khyh; thuasalama BAWIPAW nynh na minpaaw Abraham, Isak te Jakob kya byakinpyakute a la raepaw byakinnaw kha ccingsah khylan hynh-e minphuin hae hoyleinaw keiccuze BAWIPAW na Pachia nynh minmin kha na malang khe a dee lan hae paw nynh thua.

⁶Oute na dingnaw keiccuze hynh-e ram hoypaw hynh ccou khylan BAWIPAW na Pachia nynh ae pya lan khyh cipaw kha nytua; pawccecize nang tuh alungkhungpaw ccungccaw nynh na thua.

⁷BAWIPAW na Pachia a thinria nawlan ramkaw kya pawtemou na rae cipaw kha ning nan lah liathuitua; Izip ram atolang na pou nin kyate hynh-e hmin na thua cia BAWIPAW kha na dou vae.

⁸Horeb kya heize BAWIPAW kha a thin na riasah keiccuze BAWIPAW tuh na tungvaw myaryamaw a thinria zah, nang kha ro lan ciate a paccynkuh.

⁹BAWIPAW nynh nanning ryte byakinnaw a raenawpaw lungphe hae kha law khylan mua lang he ka kaethung tuh, mua vawlan nin sung pali te zi sung pali ka um; looh mah ka ae khyh zah tui mah ka neih khyh.

¹⁰Te BAWIPAW kuihdung te zeipaw lungphe phe ning kha BAWIPAW nynh yn pya; pumkunaw nin kya mua vawlan maee lungkhu te BAWIPAW nynh ae hopya oh paw bya balyn tuh tuh-e lungphe hae vawlan a um.

¹¹Nin sung pali te zi sung pali athang te byakinnaw lungphe phe ning kha BAWIPAW nynh yn pya.

¹²Oute BAWIPAW nynh kae kha, “Thokuh lah, hynh-e kyate arangte cceihbung, pawccecize Izip ram kyate na poukhae hae paw na ccungccaw hae nynh ozia ahoy lei lante a cyi vae hae. Kaw ka pya hae paw laanpi kyate arangte a maekuh vae hae; minmin nynh mimaw hanlan zohtuh kha laeekute a raeku vae hae,” yn cipya.

¹³Tuhpiaze BAWIPAW nynh kae kha, “E ccungccaw hae hynh mih lungkhungpaw nynh thua ccaccing hae cipaw ka muih vae.

¹⁴Minmin kha ka roh hae zah mih min kha vaawlui zakaw kyate ka the ccaw hae, ka makhaete yn umsah; nang kha minmin laeze athunghuapaw te alung huapaw lang kae rae cih,” yn cipya.

¹⁵Tukeiccuze mua vawlan maee rua lyakhe ka maeleihkuh zah mua kyate ka cceihbung; byakin lungphe phe ning tuh ka kuih voi ning kya a um hae.

¹⁶Oute vaetuataw azuh muinsan kha nae hanlan raekute BAWIPAW nae Pachia tungvaw na sei ccaccing vae oh cipaw kha ka muih; BAWIPAW nynh kaw ae pya oh paw laanpi kyate maeku lan myarya nae thyrang.

¹⁷Tukeiccuze lungphe phe ning kha ka lah zah, ka kuih voi ning te ka vua zah, nae muihnaw kya ka koi hae.

¹⁸Oute langmaw hawte BAWIPAW malang nin sung pali zi sung pali ka bakhung; BAWIPAW mitmuihnaw kya hoyleinaw na rae oh zah amaw kha thinriasahte seinaw na rae oh paw balyn keiccuze looh mah ka ae khyh zah tui mah ka neih khyh.

¹⁹Pawccecize nanning kha ro lan ciate a thinria keiccuze myarya lepaw BAWIPAW thinrianaw kha ka rih. Thuasalama tuh-e ccyh kya mah BAWIPAW nynh ka bya kha yn ngaepya.

²⁰BAWIPAW nynh Aaron tungvaw myarya a thinria zah, Aaron kha ro lan a paccynku, thuasalama tuh ccyh lya mah Aaron hanlan saw ka sangpya.

²¹Oute na rae oh paw aseipaw uccaw athuapaw vaetuataw kha ka lah zah, maee te ka u zah ka tuisah, akhui lang phe tang lan cia ka miaa; tuh-e akhui kha mua kyate a luabungpaw vaw taraw kyakhe ka vua.

²²Teberah, Massah kya te Kibroth-hattaavah kyakhe mah BAWIPAW kha a thin na riasah oh.

²³Te BAWIPAW nynh Kadesh-barnea kyate ae saw oh zah, “Cceihthung oh lah, kae pya oh paw ram kha lawku tua oh,” cite he ae cipah oh te, BAWIPAW nae Pachia nynh kaw ae pya oh paw kha na dou oh, amaw kha na zyn khyh oh zah na zui khyh oh.

²⁴Nanning kha kae ny nin oh kyate BAWIPAW kha na dou vae oh.

²⁵BAWIPAW nynh nanning kha ro lan he a tuakuh te, nin sung pali te zi sung pali lungkhu balyn BAWIPAW malang bakhungte,

²⁶BAWIPAW kalan saw ka sang zah, “BAWIPAW Pachia, na lesaenaw te na shawkhaw hae paw, athungpaw na kuih te Izip ram atolang na poukhae hae paw, na ccou ccaccing hae paw ccungccaw hae kha roh nan hae.

²⁷Na see hae Abraham, Isak te Jakob kha ning nan hae; hynh-e ccungccaw hae lungkhungnaw, mih hoyleinaw te mih seinaw kha ccuinpah nan hae,

²⁸Tuhkhyhze tuh kaening nae poukhaenaw ram nynh, ‘BAWIPAW nynh bya a kinpyaku hae paw ram lungkhu lang a cciakhae kho vae khyh keiccu hae ze thuasah, minmin kha a hua keiccu hae ze thuasah, ramkaw kya chisah khylan a poukhae hae,’ cite a hosei cih hae.

²⁹Pawccecize minmin tuh alesaepaw na huhan te thuasah, na dyngpaw na kuih te thuasah na poukhae hae paw na ccou ccaccing hae paw ccungccaw hae nynh thua hae,” ka ci.