Read Zotung Chin JOHAN 1 Bible Online

JOHAN 1 - Zotung Chin bible

JOHAN 1

¹Athotakawnaw kya Bya a um, Bya tuh Pachia ryte a umkheih hae, Bya tuh Pachia nynh thua.

²Tuh-e Bya tuh athotakawnaw kyamawte Pachia ryte a umkheih hae.

³Tynre balyn tuh amaw liate nynh rae athua, amaw leite raepaw ccangkheit san um khyh.

⁴Amaw kya tuh hiinnaw um zah, hiinnaw tuh ccungccaw hae awnaw nynh thua.

⁵Awnaw tuh mohnaw kya a aw, thuasalama mohnaw nynh tuh-e awnaw tuh the kho khyh.

⁶Johan a ci hae paw ccungccapaw lu kheit kha Pachia nynh a saw.

⁷Tuh-e paw liate ccungccaw hae balyn nynh a zyn nawlan hae, awnaw kong ccaekiakhan khylan ccaekia lang yn thua.

⁸Aning tuh awnaw thua khyh, awnaw kong ccaekiakhan khylan yn thuapaw nynh thua.

⁹Tuh-e ahmepaw awnaw tuh laephi vawlan yn thua zah ccungccaw miakaw kha a awsah.

¹⁰Aning tuh laephi vawlan um zah laephi hynh amaw liate rae athua, tuhzemah laephi nynh amaw kha nyh khyh.

¹¹Aning tuh amaw ram lang yn thua, thuasalama a ccungccaw hae nynh amaw kha lehkhan khyh hae.

¹²Thuasalama amaw kha lehkhan hae zah amaw min a zynpaw balyn kha Pachia ccaaw thuanaw kaw a pya hae.

¹³Minmin tuh chiisaw te saahpaw ccaaw, pynsaw rynaw te saahpaw ccaaw, ccungccaw rynaw te saahpaw ccaaw thua khyh hae; thuasalama Pachia rynaw te saahpaw ccaaw nynh athua hae.

¹⁴Bya tuh ccungccaw lang yn tang zah aening kya a um, aning tuh thawccinaw te byaccing te phe beih zah, Paaw kya-e lu kheit kyalyapaw Ccapaw phu-enaw lante a phu-enaw kha ah muih vae oh.

¹⁵Johan nynh amaw kong kha ccaekiakhan zah, “ ‘Kamaw koute yn thua cih paw ccungccapaw tuh kamaw laeze a lesaehua, pawccecize aning tuh kamaw laeze a umty,’ cite a kong ka hopaw kha hynh-e paw nynh thua,” cite thawte a sia.

¹⁶Amaw a ccingnaw kyate thawccinaw tungvaw thawccinaw kha aening balyn nynh ah mue oh.

¹⁷Pawccecize kawbya tuh Moses liate pya athua, thawccinaw te byaccing tuh Jesu Khri liate nynh yn thua.

¹⁸Hum nynh sanmah Pachia tuh muih boi khyh, Paaw by vaw kya a umpaw, lu kheit kyalyapaw Ccapaw nynh Pachia kha a langsah vae.

¹⁹Judah hae nynh, “Nang hynh hummou?” cite Johan kha khia khylan Jerusalem kyate ranpibawi hae te Levi hae kha a saw lya hae ze Johan nynh hynhte ccaekia a khan.

²⁰Johan nynh mih bya tuh ei leite, “Kae tuh Messiah ka thua khyh,” cite ccaerarih lan a khung hae.

²¹Minmin nynh, “Tuhteze nang tuh hummou? Elijah na thua tou?” cite a khia hae. Johan nynh, “Ka thua khyh,” a ci. Minmin nynh, “Profeh na thua tou?” cite bua a khia hae. Aning nynh, “Ka thua khyh,” a ci.

²²Tetuh minmin nynh, “Hummou na thua? Kaening oun saw hae paw kalan kae la hopya ccaw hae namaw te namaw kha hum na ciku mou?” cite a khia hae.

²³Johan nynh, “‘Bawipaw a ccianaw laanpi kha lawbabin lan raepah oh,’ cite profeh Isaiah nynh a ho vae hawte, kae tuh ramkaw kya a siapaw lukheitpaw roi nynh ka thua,” a ci.

²⁴Minmin a sawtu hae tuh Farasi hae nynh athua hae.

²⁵Minmin nynh Johan kha, “Nang tuh Messiah na thua khyh, Elijah mah na thua khyh, profeh mah na thua khyh lanze, pawccemou baptisma na pya hae?” cite a khia hae.

²⁶Johan nynh minmin kha, “Kae nynh tui kya baptisma ka pya hae, thuasalama nae laku kya na ny lei oh paw lu kheit a um.

²⁷Aning tuh ka nulang te yn thua salamah kae tuh a phanah rui phoupya lan san ka ngaekuh khyh,” a cipya hae.

²⁸E hynh Johan nynh baptisma a pyanaw hae Jordan vaw khuraw lang umpaw Bethabara khua kya nynh acyiku.

²⁹Awkhualan khe Johan nynh a kalan yn cceihpaw Jesu kha muih zah, “Laephi seinaw a cciakhaepaw Pachia Tuutaw khuh dotua oh!

³⁰‘Ka nulang te yn thua cih paw ccungccapaw tuh kae laeze a lesae huapaw nynh thua, pawccecize aning tuh kae laeze a umty vae,’ cite a konglang ka hopaw kha amaw lahyn athua.

³¹Amaw kha ka la nyh khyh, thuasalama Israel hae nynh amaw kha a ny nawlan hae kae nynh tui te baptisma ka pya hae,” a ci.

³²Johan nynh ccaekiakhan zah, “Muisaw nynh vaawlang te vahu hawte yn rungbung zah a tungvaw kya a ccupaw kha ka muih.

³³Amaw kha ka la nyh khyh, thuasalama tui te baptisma pya lan yn sawtupaw nynh kae kha, ‘Muisaw nynh yn rungbung zah a tungvaw a ccupaw kha na muih cih; tuh-e paw tuh Thyaa Muisaw te baptisma a pyatu nynh thua,’ cite yn hopya.

³⁴Kae nynh ka muih vae zah, e paw tuh Pachia Ccapaw nynh thua cite ccaekia ka khan vae,” a ci.

³⁵Awkhualan khe Johan te a zuitu hae lu ning nynh a thadyn lya hae khe,

³⁶Johan nynh Jesu a cciapaw kha do zah, “Pachia Tuutaw khuh dotua oh!” a ci.

³⁷Zuitu hae lu ning nynh Johan bya kha thae hae zah Jesu kha a zui hae.

³⁸Jesu nynh maeleihkuh zah minmin nynh a zui hae paw kha he a muih tuh, “Pawmou na ccung oh?” cite a khia hae. Minmin nynh, “Rabbi, pawkyamou na um?” a ci hae. (Rabbi cipaw tuh Sazae cipaw nynh thua).

³⁹Jesu nynh minmin kha, “Rang oh lah oun dotua oh,” a cipya hae. Minmin nynh cceih hae zah a umnaw kha a muih hae; tuin nin tuh amaw ryte a umkheih hae, pawccecize tuh lya tuh zete suimilan ccangpali loukaw acih vae.

⁴⁰Johan bya kha thae hae zah Jesu a zui hae paw lu ning lakuze lu kheit tuh Simon Peter neitaw Andru nynh thua.

⁴¹Aning nynh a upaw Simon kha masaty muih zah, “Messiah kha kae muih vae,” a cipya. (Messiah cipaw tuh Khri cipaw nynh thua).

⁴²Simon kha Jesu kalan a cciakhae. Jesu nynh amaw kha do zah, “Nang tuh Johan ccapaw Simon nynh na thua. Nang tuh Sefas cite ko na thua cih,” a cipya. (Sefas cipaw tuh Peter cipaw te lokuh zah asuilan tuh “lungpi” cipaw nynh thua).

⁴³Awkhualan Jesu tuh Galilee pee lang ccia lan a paccynkuh. Filip kha muih zah, “Yn zui,” a cipya.

⁴⁴Filip tuh Andru te Peter hae khua athuapaw Bethsaida khuapaw nynh thua.

⁴⁵Filip nynh Nethanal kha muih zah, “Moses nynh Kawbya ccauh kya a konglang a zeipaw te profeh hae nynh mah a konglang a zei hae paw kha kaening nynh kae muih vae; aning tuh Josef ccapaw Jesu, Nazareth khuapaw nynh thua,” a cipya.

⁴⁶Nethanal nynh, “Nazareth khua kyate uccaw hoypaw ccangkhakheit a pou kho cih tou?” cite a khung. Filip nynh, “Rang lah yn dotua,” a cipya.

⁴⁷Jesu nynh a kalan yn cceihpaw Nethanal kha muih zah, “Thyaruhnaw thinlung a hoi leipaw Israel paw ccaccing khuh dotua oh!” cite a konglang a ho.

⁴⁸Nethanal nynh, “Pawtemou kae hynh nae ny?” cite a khia. Jesu nynh, “Filip nynh ae ko maw, thaeku ku kaw na um lya kha phe kae muih vae,” a cipya.

⁴⁹Nethanal nynh, “Sazae, nang tuh Pachia Ccapaw nynh na thua! Nang tuh Israel Siapharan nynh na thua!” cite a khung.

⁵⁰Jesu nynh, “ ‘Thaeku ku kaw kya kae muih,’ cite kae hopya keiccu tou nae zyn? E laeze ale huapaw uccaw hae nae muih ung cih,” a cipya.

⁵¹Jesu nynh, “Byaccaccing kae hopya oh, vaaw tuh yn hungkuh zah Pachia vaaw hae nynh Ccungccaw Ccapaw tungvaw a rungbung hae paw te a kaethung hae paw kha nae muih cih oh,” cite amaw kha a hopya.