Read Zotung Chin JOHAN 11 Bible Online

JOHAN 11 - Zotung Chin bible

JOHAN 11

¹Mary te a unung Martha hae khua, Bethani khuapaw Lazaruh a ci hae paw lu kheit tuh a la ccih.

²Mary tuh Bawipaw ccu kya zimuin thuhpah zah a sang te a hupahnung nynh thua, a ccihpaw Lazaruh tuh a raeepaw nynh thua.

³Tukeiccuze a ccianung hae nynh Jesu kalan ccungccaw saw hae zah, “Bawipaw, na sungsahpaw na banpaw tuh a ccih,” cite a hosahpya hae.

⁴Jesu nynh tuh-e bya he a thae tuh, “E ccinaw tuh chi khopaw ccinaw thua khyh; Pachia phu-enaw hanlan te Pachia Ccapaw nynh phu-enaw a ccou nawlan nynh thua,” a ci.

⁵Jesu nynh Martha te a neitawnung te Lazaruh kha a sungsah hae.

⁶Tukeiccuze Jesu nynh Lazaruh a ccih cipaw he a thae te, tuin a umnaw kya mawkhe nin ning bua a um ung.

⁷Tukoute Jesu nynh a zuitu hae kha, “Judea ram lang bua cceih oh sih,” a cipya hae.

⁸Zuitu hae nynh, “Sazae, Judah hae nynh anulang lya lung te deih lan ae ry hae khaw, tuhlang tuh bua na cceih cih tou?” a cipya hae.

⁹Jesu nynh, “Khuadae kya suimilan haw lae ning um khyh tou? Khuadae kya a cceihpaw ccungccaw tuh hynh-e laephi awnaw kha a muih keiccuze thykuh khyh.

¹⁰Thuasalama khuazi kya a cceihpaw ccungccaw tuh amaw kya awnaw a um khyh keiccuze a thykuh,” cite a khung hae.

¹¹Jesu nynh tuhte a ho koute, “Ah banpaw Lazaruh tuh a ih, thuasalama amaw kha tho khylan ka cceih cih,” a cipya hae.

¹²A zuitu hae nynh, “Bawipaw, aning tuh a i lanze, phe yn dan cih,” a ci hae.

¹³Jesu nynh tuh Lazaruh a chinaw kong kha nynh a ho, thuasalama minmin nynh tuh a ipaw maw kha nynh a ho cite a tua hae.

¹⁴Tukeiccuze Jesu nynh ccaerarih lan hopah hae zah, “Lazaruh tuh a chih vae.

¹⁵Tuin kya ka la um khyhpaw tuh nanning na zyn nawlan oh athua keiccuze nae hanlan ka lungtua, atu amaw kalan cceih oh sih,” a cipya hae.

¹⁶Ccaawphei a ci hae paw Thomas nynh, “Bawipaw ryte chikheih khylan aening mah cceihbua oh sih,” cite zuitu a ruiban hae kha a hopya hae.

¹⁷Jesu yn thua tuh, Lazaruh kha shaw lungkhu a uunaw hae te nin pali acih vae cipaw a ny.

¹⁸Bethani khua tuh Jerusalem te naekuh zah me ning loukaw nynh asaw.

¹⁹Mih raeepaw nynh a chitaw hae paw Martha te Mary kha lungtangbya hopya khylan Judah hae patae tuh oun thua hae.

²⁰Martha nynh Jesu yn thua cipaw he a thae tuh, cceih zah Jesu kha a cciadue; Mary tuh innvaw nynh a um.

²¹Martha nynh Jesu kha, “Bawipaw, hein kya na la um ze, ka raeepaw hynh a chih cih leipaw.

²²Thuasalama atumaw hynh Pachia kalan na ngiapaw miakaw kha Pachia nynh ae pya cih cipaw ka ny,” a cipya.

²³Jesu nynh, “Na raeepaw tuh bua yn thoo cih,” a cipya.

²⁴Martha nynh, “Nyathya nin thoothuinaw kya yn thoothui cih cipaw tuh ka nyh,” a cipya.

²⁵Jesu nynh Mata kha, “Kae tuh thoothuinaw te hiinnaw nynh ka thua, kae yn zynpaw tuh a chi zemah a hiin cih,

²⁶Humhung zemah hiin zah kae yn zynpaw tuh mazi chih vae lan khyh. Tuh-e tuh na zyn tou?” a cipya.

²⁷Martha nynh, “Athua, Bawipaw, nang tuh laephi vawlan yn thuapaw, Pachia Ccapaw Messiah nynh na thua cipaw ka zyn,” cite a khung.

²⁸Tuhcite he a ho koute, Martha nynh cceih zah a neitawnung Mary kha aruh lante zya ko zah, “Sazaepaw yn thua zah, nang kha ae ko,” a cipya.

²⁹Mary nynh tuh-e bya he a thae tuh, arangte thokuh zah Jesu kalan a cceih.

³⁰Jesu tuh khualae kya thua loh khyh; Martha te a tungkunaw hae kya nynh a um ung.

³¹Innvaw kya Mary lungtangbya a hopah hae paw Judah hae nynh Mary tuh arangte thokuh zah a cciapaw kha he a muih hae tuh, shawku lang raw khylan nynh a ccia cite tua hae zah a zui hae.

³²Mary nynh Jesu a umnaw kya thua zah amaw kha he a muih tuh, a cculeihpaw khe bakhung zah, “Bawipaw, hein kya na la um ze, ka raeepaw tuh a chih cih leipaw,” cite a hopya.

³³Mary nynh a rawpaw te oun thuakheih hae paw Judah hae nynh a raw hae paw kha Jesu nynh he a muih tuh, myarya a thinlungccih zah a lungvawsaw.

³⁴Jesu nynh, “Pawkyamou Lazaruh tuh na uu oh?” a ci. Minmin nynh, “Bawipaw, rang lah yn dotua,” a ci hae.

³⁵Jesu tuh a rah.

³⁶Judah hae nynh, “Dotua oh, Lazaruh kha pawcih baban mou a sungsah!” a ci hae.

³⁷Abang nynh, “Mitmohpaw a mit a awsahtupaw hynh-e ccungccapaw nynh Lazaruh kha chi leite umsah kho khyh tou?” a ci hae.

³⁸Tukoute Jesu tuh a thinlung bua ccih zah shaw kalan a cceih. Tuh-e shaw tuh lungkarung thua zah lung te phang a hu hae.

³⁹Jesu nynh, “Lung kha nue oh,” a ci. Achihpaw a ccianung Martha nynh, “Bawipaw, atu tuh phe thuh vae cih, pawccecize a chinaw te nin pali acih vae,” a cipya.

⁴⁰Jesu nynh Martha kha, “Na zyn ze Pachia phu-enaw na muih cih cite kae hopah khyh tou?” a cipya.

⁴¹Minmin nynh athuhhu kha a nue hae. Jesu nynh dothung zah, “Apang, ka bya nae thaepya keiccuze na tungvaw ka lungtua.

⁴²Ka bya hynh zungzae nae thaepya cipaw ka ny; thuasalama hein kya a thadynpaw ccungccaw hae nynh kae tuh nang nynh na sawpaw cipaw kha a zyn ccaw hae cite minmin khylan nynh hynhte ka ho,” a ci.

⁴³Tuhcite Jesu nynh a ho koute, “Lazaruh, yn pou!” cite thawte a sia.

⁴⁴Achihpaw Lazaruh tuh a kuih te a ccu kha boeining te phang khiidekuh zah, a mae mah boeining te phang alungkuh lante yn pou. Jesu nynh, “Phoupah oh lah cceih sah,” a ci.

⁴⁵Mary te oun cceihkheih hae paw Judah hae patae nynh Jesu nynh a cyipaw kha muih hae zah amaw kha a zyn hae.

⁴⁶Thuasalama ccungccaw abang nynh Farasi hae kalan cceih hae zah Jesu nynh a cyipaw kong kha a hopya hae.

⁴⁷Ranpibawi lepaw hae te Farasi hae nynh kungsi meeting ko hae zah, “Pawtemou ah cyih cih oh? E paw nynh muihsahnaw patae a langsaku vae.

⁴⁸Amaw kha hynhcite ah sawphah oh ze, ccungccaw balyn nynh amaw kha oun zyn cih hae, te Rom hae nynh oun cceih cih hae zah hmin thyaapaw te ah minphuin hynh oun roh cih hae,” a ci hae.

⁴⁹Minmin lakuze lu kheit, tuh-e kum kya ranpibawi lupi athuapaw Kaiafas nynh, “Pawpaw mah na nyh khyh oh!

⁵⁰Minphuin pynpi aro khyh nawlan, ccungccaw patae hanlan ccungccaw lu kheit a chi lanpaw tuh nae hanlan ahoyhua cipaw na nyhthya khyh oh,” a cipya hae.

⁵¹E bya hynh amaw kaw te ho khyh, aning tuh tuh-e kum kya ranpibawi lupi athua thyhawte, Jesu tuh tuh-e minphuin hanlan yn chih vae cih cipaw te

⁵²tuh-e minphuin hanlan kyalya thua leite, a phiakuh hae paw Pachia ccaaw hae kha pynkheihlan suelua khylan yn chih cih cipaw kha profehbya a hopaw nynh thua.

⁵³Tuin nin kyate vae tuh Jesu kha chia lan khua a khanku vae hae.

⁵⁴Tukeiccuze Jesu tuh Judah hae laku alangkuh lante cceih vae khyh, tuin kyate pou zah ramkaw te anaekunaw Efraim a ci hae paw khua lang a cceih; tuin kyakhe a zuitu hae ryte a um hae.

⁵⁵Judah hae Kawtaw Poi tuh nae vae zah ccungccaw patae tuh Kawtaw Poi azaw maw mimaw te mimaw ccikanku khylan khua taraw hae kyate Jerusalem lang oun cceihthung hae.

⁵⁶Minmin nynh Jesu kha a ccung hae, beikinn pe khe thadyn hae zah, “Pawte na tua oh? Aning tuh poi kalan yn thuabua lan khyh tou?” cite a hoku hae.

⁵⁷Ranpibawi lepaw hae te Farasi hae nynh Jesu kha kyng khylan humhung zemah Jesu a umnaw a nyhpaw tuh kae kalan nae hopah cih oh, cite kaw a pya hae.